Vato. 6 - Bhaibheri Rakachena muChindau

Gidheoni

¹ VaIsuraeri vakaita zvakashata mukuona kwaMambo Mwari, naMambo Mwari wakavapira munyara dzevaMidhiani makore manomwe.

² Nenyara yaMidhiani yakanyisa padera pevaIsuraeri; ngendaa yevaMidhiani vaIsuraeri vakadziitira ndau dzokuhwara mumitunhu, nomumapako, nendau dzakagwinya dzokuhwara.

³ Ngokuti vaiti apo vaIsuraeri vakusha mbeu, vaMidhiani nevaAmareki, nevanhu vokumabvazuva vaikwira kuuya koorwisana navo.

⁴ Vaiemesa matende avo kurwisana navo, nokuparadza zvirimwa zvenyika metsa kuguma Gaza, vasikasii nechiro chokudya kunevaIsuraeri, kunyazwi hwai, nokuti n'ombe, nokuti mbongoro.

⁵ Ngokuti ivo nezvifuyo zvavo vaikwira, nematende avo, vechiuya vakawanda kudai ngendongwe; ngokuti ivo nemakamera avo zvaiya zvisikaerengeki; navo vaipotera munyika kuiparadza.

⁶ Ndizvo vaIsuraeri vakaita varombo ngendaa yevaMidhiani, navo vakachema kuna Mambo Mwari kuti avadetsere.

⁷ Naapo vaIsuraeri vachema kunaMambo Mwari ngendaa yevaMidhiani,

⁸ Mambo Mwari wakatuma muprofeti kunevaIsuraeri, wakati kwavari, “Unoronza izvi Mambo Mwari, Mwari waIsuraeri: Ndakamuunza kubva Egipite, ndikamubudisa kubva kumhatso youhloko.

⁹ Ndakamusunhura kubva munyara dzevaEgipite, nokubva kunyara dzeavo veshe vaimutambudza, ndikavadzinga kubva pamberi penyu, ndikamupa nyika yavo.

¹⁰ Ndikati kwomuri, ‘Inini ndiri Mambo Mwari, Mwari wenyu; musadira zvimwari zvevaAmori, avo vomunogara munyika yavo.’ Asi amuzi kupurutana izwi rangu.”

¹¹ Zvino ngirosi yaMambo Mwari, yakauya ikagara pashi pomuti womuokhi waiya muOfira, uwo waiya waJoashi muAbhieza; naGidheoni mukororo wake waipura koroni pandau yokukamurira vhini, kuti aifishe kubva kuvaMidhiani.

¹² Ngirosi yaMambo Mwari yakaoneka kwaari, yakati kwaari, “Mambo Mwari unewe, iwewe ngwazi inesimba.”

¹³ Gidheoni wakati kweiri, “Asi mambo, kudai Mambo Mwari anesu, izvi zveshe zvinotigumira ngenyi? Iri pari mishando yake yeshe inoshamisa, iyo madzibaba edu akatironzera ndiyo, vechiti, ‘Mambo Mwari aazi kutikwidza here kubva Egipite?’ Asi zvino Mambo Mwari wakatirasha, akatipira munyara dzevaMidhiani.”

¹⁴ Zvino Mambo Mwari wakakunukukira kwaari akati, “Enda neiri simba rako, newe unozoponesa Isuraeri kubva munyara dzevaMidhiani. Andini here ndakutuma?”

¹⁵ Naye wakati kwaari, “Asi Mambo wangu, ndingazoita maponeserenyi Isuraeri? Ringira dzinza rangu ndiro rakarembedzeka yaamho mudzinza raManase, neni ndakatsongesesa mumhatso yababa angu.”

¹⁶ Asi Mambo Mwari wakati kwaari, “Ngegwinyiso ndinozoa newe, newe unozouraya vaMidhiani kudai ngomunhu umwe.”

¹⁷ Zvino wakati kwaari, “Kudai ndaona nyasha mukuona kwako, zvino ndipangidzire chioniso chokuti ndiwe unoereketa neni.

¹⁸ Usabva pano, ndinokupota, metsa ndiuyezve kwouri, ndiuye nechipo changu, ndichiise pamberi pako.” Naye wakati, “Ndinozogara metsa uuyezve.”

¹⁹ Ndizvo Gidheoni wakapotera mumhatso yake, akanasira kachimbudzana kembudzi, nezvingwa zvisina mumera zveefa roufu; wakaisa nyama muchitundu, nomuto wakauisa muhari, wakazviunza kwaari pashi pomuti womuokhi, wakazvipa kweiri.

²⁰ Ngirosi yaMwari yakati kwaari, “Tora nyama nezvingwa zvisina mumera, uzviise padera pebuwe iri, udurure muto.” Naye wakaita kudaro.

²¹ Zvino ngirosi yaMambo Mwari yakatambanudza ndonga yaiya munyara yayo, ikagwama nyama nezvingwa zvisina mumera ngokumagumo kwayo, naapo kwakabuda muriro kubva pabuwe, wakapedza kupisha nyama nezvingwa zvisina mumera; nengirosi yaMambo Mwari yakanyangarika kubva mukuona kwake.

²² Zvino Gidheoni wakaona kuti ngirosi ingirosi yaMambo Mwari; Gidheoni wakati, “Ndidetserei, Mambo Mwari, Mwari! Ngokuti ndaona ngirosi yaMambo Mwari hope kuhope.”

²³ Asi Mambo Mwari wakati kwaari, “Kunyarara ngakugare newe; usatya, auzofi.”

²⁴ Zvino Gidheoni wakaakira apo Mambo Mwari arita, naye akaridudza kuti, “Mambo Mwari Kunyarara”: riripo nyamashi muOfira raAbhieza.

²⁵ Ngousiku uhwo Mambo Mwari wakati kwaari, “Tora mukono wababa ako, mukono wechipiri unemakore manomwe, upwanyire pashi arita raBhaari raanaro baba ako, utemere pashi sika yokudira iri pasinde paro.

²⁶ Uakire Mambo Mwari, Mwari wako arita padera peiri buwe, ngenjira kwayo, utore mukono wechipiri, uupire kuita mudiro wokupisha ngehuni dzesika yokudira yowakatemera pashi.”

²⁷ Ndizvo Gidheoni wakatora vamuna gumi kubva pakati pevaranda vake, wakaita kudai ngezvaakamupanga Mambo Mwari; asi ngokuti waitya vemhuri yemhatso yababa ake, nevamuna vedhorobha, kuzviita masikati, wakazviita usiku.

²⁸ Naapo vamuna vedhorobha vamuka mangwanani maishi, vakaona arita raBhaari rapwanyirwa pashi, nesika yokudira yaiya pasinde paro yaiya yatemerwa pashi, nomukono wechipiri waiya wapirwa kuita mudiro paarita raiya rakaakiwa.

²⁹ Ndizvo vakati umwe kunoumweni, “Ndiani waita ichi chiro?” Naapo vatsvakisisa nokubvunzisisa, vakaronzerwa, “NdiGidheoni mukororo waJoashi wakaita ichi chiro.”

³⁰ Zvino vamuna vedhorobha vakati kunaJoashi, “Budisa mwana wako kwetiri, kuti afe, ngokuti wakapwanyira pashi arita raBhaari, nokutemera pashi sika yokudira yaiya pasinde paro.”

³¹ Asi Joashi wakati kwavari veshe vaimumukira, “Ndimwi munozorwira Bhaari here? Ndimwi munozomuponesa here? Nouwo unorwira Bhaari unozourawa mangwanani. Kuti ari chimwari ngaadzirwire emene, ngokuti umwe wakapwanyira pashi arita rake.”

³² Ndizvo ngeiro zuva Gidheoni wakadudzwa kuti Jerubhaari, ndiko kuti, “Bhaari ngaarwe naye,” ngokuti iye wapwanyira pashi arita rake.

³³ Zvino vakaungana vaMidhiani, vaAmareki, nevanhu vokumabvazuva, vakaambuka Jorodhani, vakaemesa matende avo mubani raJezireeri.

³⁴ Asi Mweya waMambo Mwari wakadzaka padera paGidheoni, naye wakaridza gwama; vakaungana kwaari vaAbhieza kuti vamuteere.

³⁵ Wakatuma nhumwa kuhamba mukati mwenyika yaManase yeshe; navo vakadaidzwa kumuteera.Wakatuma nhumwa kunaAsha, Zebhuruni, nokunaNafitari; navo vakakwira kooshongana navo.

³⁶ Zvino Gidheoni wakati kunaMwari, “Kuti ndione kuti munozoponesa Isuraeri ngenyara yangu, kudai ngezvemwakaronza,

³⁷ ndinozoisa mamviri ehwai mumbuwa yokupurira; nokudai beto rechizoa padera pemamviri pega, pakaoma pamavhu eshe akaatendenedza, zvino ndinozozia kuti munozoponesa Isuraeri ngenyara yangu, kudai ngezvemwakaronza.”

³⁸ Nazvo zvakaitika kudaro. Naapo amuka mangwanani maishi, akakamura mamviri pamwepo, wakakamura beto kubva kumamviri kukadzara ndiro ngemvura.

³⁹ Zvino Gidheoni wakati kunaMwari, “Ushungu hwako husazobaka kwendiri, nditenderei neni ndinozoereketa kamwe kano kega; ngandiedzezve kamwe kano kega ngaaya mamviri; ngakuite kuti mamviri aome ega, nepadera pemavhu eshe ngariapo beto.”

⁴⁰ Mambo Mwari wakaita kudaro ngouhwo usiku. Paiya pakaoma pamamviri pega, asi raiyapo beto padera pemavhu eshe.