Vato. 5 - Bhaibheri Rakachena muChindau

Nduyo yaDhebhora naBharaki

¹ Zvino Dhebhora naBharaki mukororo waAbhinoamu vakaemba ngeiro zuva vechiti:

² “Kudzai Mambo Mwari, imwimwi ngendaa yokuunzidzira kwaakaitira Isuraeri apo vanhu vakadzipa ngokuda.

³ Izwai, imwimwi madzimambo; purutanai, imwimwi vazvare; inini, inini ndinozoemba kukudza kunaMambo Mwari Mwari waIsuraeri.

⁴ Mambo Mwari, apo iwewe wakabuda kubva Seira, apo wakahamba kubva mushango reEdhomu, nyika yakahuta, nematenga akadonha, nemakore nawo akadonha mvura.

⁵ Mitunhu yakaondomoka pamberi paMambo Mwari, Umwe weSinai, kubva pamberi paMambo Mwari, Mwari waIsuraeri.

⁶ Mumazuva aShamugari mukororo waAnathi, mumazuva aJaeri, mapato aazi kuhambwa ngomunhu, nevahambi vakahamba ngenjira dzemishwashwairo.

⁷ Vagari vemaguta vakapera, muIsuraeri vakapera, metsa iwewe Dhebhora wamiruka, metsa wamiruka kudai ndimai muIsuraeri.

⁸ Apo vatsanangura zvimwari zvitsva, ndizvo paiya nokurwa mumisiwo. Kwakaoneka here chihlangu nokuti mukhondo pakati pemakumi marongomuna emakumi emazana (40,000) muIsuraeri?

⁹ Mwoyo wangu unechidisiso kuvatongi vaIsuraeri, avo vakadzipira ngokuda pakati pevanhu. Kudzai imwimwi Mambo Mwari.

¹⁰ Pupurai ndizvo, imwimwi munogadha mbongoro dzakachena, imwimwi munogara pamanhi akanaka, nemwi munohamba munjira.

¹¹ Avo vakaponeswa kubva kunebope revaposhi vemisee mundau dzokuchera mvura, apo vanozopupura ngemishando yakarurama yaMambo Mwari, eya, mishando yake yakarurama kunevagari vemaguta ake muIsuraeri. Zvino vanhu vaMambo Mwari vakadzaka kumisiwo.

¹² Muka, muka, Dhebhora: muka, muka, emba ruyo! Miruka, Bharaki, utungamirire vabatwa vako kuita hloko, iwewe mukororo waAbhinoamu.

¹³ Zvino wakaita kuti uwo wakasara atonge padera pevakuru, pakati pevanhu; naMambo Mwari wakandiita kuti nditonge padera pevanesimba.

¹⁴ Kubva kunaEfuremu vakauya avo verunzinde rwaAmareki; sure kwako kwakauya Bhenjamini, nehama dzako; kubva Makhiri kwakadzaka vatongi, nokubva Zebhuruni kwakauya avo vanobata ndonga yokunyisa.

¹⁵ Nduna dzaIsakha dzakauya naDhebhora; naIsakha wakagondeka kunaBharaki; mubani vakarumba kuteera tsoka dzake. Pakati pedzinza raRubheni kwaiyapo kutsvakisisa kukuru mumwoyo.

¹⁶ Wakagara ngenyi mukati mwedanga rehwai wechipurutana kurira kwemitanga yehwai? Pakati pedzinza raRubheni kwaiyapo kutsvakisisa kukuru mumwoyo.

¹⁷ Gireadhi wakagara ngoruseri rweJorodhani; naDhani wakagara ngenyi mungarava? Asha wakaangira kugara muhumbikumbi yoruandhle, wakagara muchipforo chake.

¹⁸ Asi Zebhuruni naNafitariwo vanhu vaiya vasikatyi metsa parufu; mundau dzakakwirira dzomushango.

¹⁹ Madzimambo akauya, akarwa, zvino akarwisa madzimambo evaKhenani paTaanakhi ngepasinde pemvura yeMegido; avazi kuuyirwa ngemare yesirivha.

²⁰ Nyeredzi dzakarwa kubva kudenga; nyeredzi munjira dzadzo dzakarwa naSisera.

²¹ Ndwizi dzaKishoni dzakavakukuzva, urwo rwizi rwekare, rwizi Kishoni. Hamba, mweya wangu, ngesimba!

²² Zvino madondova emahachi akatinhirisa nyika ngendaa yokurumba kwawo, kurumba kwemahachi avo anesimba.

²³ Tukai imwimwi Merozi, inoronza ngirosi yaMambo Mwari, vatukenyi imwimwi kakurutu vagari vayo; ngokuti avazi kuuya kudetsera Mambo Mwari, kudetsera Mambo Mwari kurwa nengwazi.

²⁴ Ngaafumiswe pakati pevakadzi Jaeri, mukadzi waHebha muKheni, unozofumiswa kupinda vakadzi vari mutende.

²⁵ Wakakumbira mvura, naye wakamupa mukaka; wakaunza mukaka wakakora muchidziyo chakapindisisa kunaka.

²⁶ Wakabata ngenyara hoko, nenyara yake yokumudyo wakabata hamera yevashandi; ngehamera iyo wakaponda Sisera, wakapwanya soro rake, akamurova kupotya huma yake.

²⁷ Wakakotama patsoka dzake, wakawa, wakaata; apo paakakotama ndipo paakafira.

²⁸ Mai aSisera vakaringira ngepafasitera, akadaidzira ngepamukana echiti, ‘Ngenyi ngoro dzake dzanonoka kuuya? Anononoka ngenyi madondova emhuka dzengoro dzake?’

²⁹ Vasikana vake vakangwara vakamupingura, ngegwinyiso unopingura mubvunzo pachake,

³⁰ ‘Avazi kudzitsvakira nokukowana zvakachakatwa here? Munhu weshe adzitorere musikana nokuti vairi; Sisera unodzitorera zvokusimira zvinemaara akaparadzana, zvokusimira zvakachakatwa zvinemiara yakanemeswa ngokusonwa kumarutii eshe, inosisira mitsipa yeavo vanotora zvakachakatwa.’

³¹ Ndizvo ngavapere kufa magaa ako eshe, A Mambo Mwari! Asi avo vanokuda ngavadai ngokubuda kwezuva apo rinojeka musimba raro.” Nenyika yaiya nokuzorora makore makumi marongomuna.