Vato. 21 - Bhaibheri Rakachena muChindau

Vakadzi Vanotsvakirwa Dzinza raBhenjamini

¹ Zvino vamuna vaIsuraeri vaiya vakapika vari paMizipha vechiti, “Kusazoapo naumwe wedu unozoroodza mwanasikana wake kunavaBhenjamini.”

² Navanhu vakauya kuBhetheri, vakagara apo metsa madeekoni vari pamberi paMwari, navo vakaboorera, vakachema kakurutu.

³ Vakati, “A Mambo Mwari, Mwari waIsuraeri, izvi zvaita ngenyi muIsuraeri, kuti kutamike nyamashi dzinza rimwe muIsuraeri?”

⁴ Ngezuva rechimangwani vanhu vakamiruka mangwanani maishi, vakaaka apo arita, navo vakapira midiro yokupisha padera paro nemidiro yokunyarara.

⁵ Zvino vaIsuraeri vakati, “Ndiani kwaari eshe madzinza aIsuraeri usikazi kuuya mumushongano waMambo Mwari?” Ngokuti vaiya vakapika kakurutu ngendaa youwo usikazi kuuya kunaMambo Mwari muMizipha, kwechizwi, “Ngegwinyiso unozourawa.”

⁶ Asi vaIsuraeri vakasvipa mwoyo ngendaa yehama yavo Bhenjamini, vakati, “Riripo dzinza rimwe ragurwa nyamashi kubva muIsuraeri.

⁷ Tinozoita maitirenyi kuti avo vakasara vaane vakadzi, techiona kuti takapika kunaMambo Mwari techiti, ‘Akuna naumwe wedu unozoroodza mwanasikana wake kwavari.’ ”

⁸ Zvino vakati, “Uripo here umwe unobva kudzinza raIsuraeri usikazi kukwira kunaMambo Mwari paMizipha?” Ringirai, akuzi kuuya naumwe kubva Jabheshigireadhi kukamba kumushongano.

⁹ Ngokuti vanhu vaerengwa, ringira, kwaiya kusina naumwe apo wevagari veJabheshigireadhi.

¹⁰ Ndizvo mbungano yakatuma kuenda iyo vamuna gumi namairi emakumi emazana (12,000) veavo vaiya ngwazi, navo vakavapanga vechiti, “Endai mubaye vagari veJabheshigireadhi ngokupinza kweshoti, nevakadzi nevana.

¹¹ Ichi ndicho chiro chomunozoita; munozouraya vamuna veshe, nevakadzi veshe vakaatana nevamuna.”

¹² Navo vakaona pakati pevagari veJabheshigireadhi mhandara mazana marongomuna (400), dzisikazi kuatana nomwamuna, navo vakadziunza kukamba kuShiro, munyika yeKhenani.

¹³ Mbungano yeshe yakatuma vamweni kuti vaende kooereketa nevaBhenjamini vaiya pabuwe reRimoni, nokudaidzira kunyarara kwavari.

¹⁴ VaBhenjamini vakauyazve ngouwo mukuwo; vakavapa vakadzi vevaiya vaponesa kuvakadzi veJabheshigireadhi; asi avazi kuvakwana.

¹⁵ Vanhu vakasvipa mwoyo ngendaa yaBhenjamini, ngokuti Mambo Mwari waiya akaisa mukana pakati pemadzinza aIsuraeri.

¹⁶ Ndizvo vakuru vembungano vakati, “Tinozoitenyi kuti vaone vakadzi avo vakasara, techiona kuti vakadzi vakaurawa kubva kuvaBhenjamini?”

¹⁷ Navo vakati, “Kunotamika kuti kuapo nhaka kwavari vakapokonyoka vaBhenjamini, kuti dzinza risazorova kubva muIsuraeri.

¹⁸ Asi zvakanyadaro atingaroodzi vanasikana vedu kuti vaite vakadzi vavo.” Ngokuti vaIsuraeri vakapika vechiti, “Ngaatukwe uwo unopa mukadzi kunomunhu weBhenjamini.”

¹⁹ Ndizvo vakati, “Ringira, uripo mushongano wokudya muShiro gore ngegore mundau iri ngedera kweBhetheri, ngokumabvazuva kwepato rinokwira kubva Bhetheri kuenda Shekhemu, ngokubani kweRebhona.”

²⁰ Navo vakapanga vaBhenjamini vechiti, “Endai muhwarire mumivhini.

²¹ Murinde, muringire, naapo vanasikana veShiro vouya koozvina mukuzvina, naapo munozobuda kubva mumivhini, munhu weshe adzibatire mukadzi wake kuvanasikana veShiro, muende kunyika yaBhenjamini.

²² Zvino kudai madzibaba avo nokuti vakoma vavo vechizouya kwetiri kuita ndaa, tinozoti kwavari, ‘Vaitire nyasha ngepamusoro pedu; ngokuti atizi kuponesera munhu weshe mukadzi wake mukurwa. Asi imwimwi amuzi kupa kwavari ngouwo mukuwo nokuti mungaane ndaa zvino.’ ”

²³ VaBhenjamini vakaita kudaro, navo vakadzitorera vakadzi kudai ngouwandu hwavo, kweavo vaizvina, vevakabata. Zvino vakaenda, vakahwirira kunhaka yavo, vakaakisa madhorobha, vakagara mukati mwawo.

²⁴ Ndizvo vaIsuraeri vakabva apo ngouwo mukuwo, munhu weshe kudzinza rake nokumhuri yake, vakabva apo munhu weshe kuenda kunhaka yake.

²⁵ Ngaawo mazuva kwaiya kusina mambo muIsuraeri; munhu weshe waiita izvo zvaioneka kuti zvakanaka mukuona kwake.