Vato. 20 - Bhaibheri Rakachena muChindau

VaIsuraeri Vanonasirira Kurwa Hondo

¹ Naapo vaIsuraeri veshe vakabuda, nembungano yakaunganidzwa pamwepo kuita munhu umwe, kubvira Dhani metsa kuguma Bheerishebha, pamwepo nevenyika yeGireadhi, pamberi paMambo Mwari muMizipha.

² Madzimambo evanhu veshe, vemadzinza eshe aIsuraeri vakadziunza mumushongano wevanhu vaMwari, vanhu mazana marongomuna emakumi emazana (400,000) vaihamba ngetsoka, vakapakatira shoti.

³ Zvino vaBhenjamini vakazwa kuti vaIsuraeri vaiya vakwira Mizipha. Naapo vaIsuraeri vakati, “Tironzerenyi kuti uku kushata kwakaita maitirenyi?”

⁴ NomuRevhi, mwamuna womukadzi wakaurawa, wakapingura echiti, “Ndakaguma Gibhea iro riri revaBhenjamini, inini nebunha rangu, kuti tiatemwo usiku.

⁵ Vamuna veGibhea vakandimukira kundirwisa, vakatendenedza mhatso usiku, vanechidisiso chokundiuraya. Navo vakamanikidza bunha rangu, metsa rakafa.

⁶ Neni ndakatora bunha rangu ndikaritematema kuita zvigurwa, ndikaritumira munyika dzeshe dzenhaka yaIsuraeri; ngokuti vakaita kushaisha nezvoupenzi muIsuraeri.

⁷ Ndizvo zvino imwimwi muri vaIsuraeri, ronzai pano kupanga kwenyu nezano renyu.”

⁸ Nevanhu veshe vakamiruka ngomwoyo umwe vechiti, “Akuna naumwe wedu unozoenda kutende rake, akunazve naumwe wedu unozokunukurira kuenda kumhatso yake.

⁹ Asi zvino ichi ndicho chiro chetinozoita Gibhea: tinozokwira ngokuita mabhigidha kuti tirwe naro.

¹⁰ Tinozotsanangura vamuna gumi kubva mukati mwezana (100) rimwe ngarimwe kubva kumadzinza eshe evaIsuraeri, nezana (100) revamuna kubva mukati mwevamuna varigumi emazana (1,000) negumi emazana (1,000) evamuna kubva kugumi emakumi emazana (1,000), kuti vaunzire zvokudya zvevarwi, vanozounzidzira Gibhea raBhenjamini kuti vaite kudai ngoupenzi hweshe hwevakaita muIsuraeri.”

¹¹ Ndizvo vamuna veshe vaIsuraeri vakaungana kumukira iro dhorobha, vakasungana pamwepo ngomwoyo umwe.

¹² Madzinza evaIsuraeri akatuma vamuna kuhamba mudzinza reshe raBhenjamini vechiti, “Kushata kwakaitawani uku kwakaitwa pakati penyu?

¹³ Ndizvo zvino, budisai avo vamuna, vamuna vakashata vomuGibhea, kuti tivauraye, tiduse kushata kubva pakati pevaIsuraeri.” Asi vaBhenjamini avazi kupurutana izwi rehama dzavo vaIsuraeri.

¹⁴ VaBhenjamini vakadziunganidza pamwepo kubva mumadhorobha, kuenda Gibhea, kuti vabude koorwa nevaIsuraeri.

¹⁵ Ngezuvaro vaBhenjamini vakaerengwa ngouwo mukuwo vaiya makumi mairi namatanhatu emakumi emazana (26,000) vamuna vakapakatira shoti, kubva kumadhorobha ngepabanze pevagari veGibhea, avo vakaerengwa navo vaiya vamuna vari mazana manomwe vakatsanangurwa.

¹⁶ Pakati peava vamuna vaiyapo vamuna vari manyaboshwe vakatsanangurwa mazana manomwe (700), umwe ngaumwe wavo waikona kuposhera ngechimvii mapuwe kufura katambo kakatsonga kebvudzi, vasikaposhi.

¹⁷ Nevamuna vaIsuraeri ngepabanze paBhenjamini vakaerengwa vaiya mazana marongomuna emakumi emazana (400,000) veavo vamuna vaipakatira shoti, veshe ava vaiya varwi vehondo.

Hondo yoKurwisa Bhenjamini

¹⁸ VaIsuraeri vakamiruka, vakakwira kuBhetheri, apo pevakabunza kupangwa ndiMwari, vakati, “Ndiani pakati pedu unozotanga kukwira kurwisana nevaBhenjamini?” NaMambo Mwari wakati, “Judha ndiye unozotanga kukwira.”

¹⁹ VaIsuraeri vakamiruka mangwanani, vakaemesa matende avo pasinde peGibhea.

²⁰ VaIsuraeri vakabuda koorwisana naBhenjamini; nevaIsuraeri vakadzirongedza kuzorwa navo muGibhea.

²¹ VaBhenjamini vakabuda kubva kuGibhea, vakauraira pashi ngeiro zuva vamuna vaIsuraeri makumi mairi namairi emakumi emazana (22,000).

²² VaIsuraeri vakadzishingisa, vakadzirongazve kurwa pandau yavaiya vakadzirongedza ngezuva rokutanga.

²³ VaIsuraeri vakakwira, vakachema pamberi paMambo Mwari metsa madeekoni, vakabvunza kupangwa ndiMambo Mwari vechiti, “Tinozokwirazve here koorwa nehama dzedu vaBhenjamini?” Mambo Mwari wakati, “Kwirai koorwa navo.”

²⁴ Ndizvo vaIsuraeri vakakwedzerazve pasinde pevana vaBhenjamini ngezuva rechipiri.

²⁵ Bhenjamini wakabuda kurwa navo kubva muGibhea ngezuva rechipiri, navo vakauraya vamuna veIsuraeri gumi nemasere emakumi emazana (18,000), veshe ava vaipakatira shoti.

²⁶ Zvino vaIsuraeri veshe, varwi veshe vakahwirira kuBhetheri, vakachema, vakagara apo pamberi paMambo Mwari; vakaera kudya ngeiro zuva metsa madeekoni. Zvino vakapira midiro yokupisha nemidiro yokunyarara pamberi paMambo Mwari.

²⁷ NevaIsuraeri vakabvunza kunaMambo Mwari, (ngokuti bhokisi rechitenderano chaMwari raiyapo ngaawo mazuva.

²⁸ NaFinehasi mukororo waEreaza mukororo waAroni, ndiye waiema pamberi paro ngaawo mazuva,) vechiti, “Tinozokwirazve here kuenda koorwa nehama dzedu vaBhenjamini, nokuti tirekere here?” Mambo Mwari wakati, “Kwirai, ngokuti mangwani ndinozovapira munyara dzenyu.”

²⁹ Ndizvo vaIsuraeri vakaemesa vamuna vakahwarira kutendenedza Gibhea.

³⁰ Zvino vaIsuraeri vakakwira koorwa nevaBhenjamini ngezuva rechitatu, vakadzirongedza koorwa neGibhea, kudai ngemikuwo imweni.

³¹ Naapo vaBhenjamini vakabuda koorwa navanhu ava, navo vakakwezviwa kubva mudhorobha. Vakatanga kubaya vanhu nokuuraya kudai ngemikuwo imweni, vari mumapato, rimwe rawo raikwira kuenda kuBhetheri nerimweni raienda Gibhea nomushango, vakauraya vamuna vaida kuguma makumi matatu vevaIsuraeri.

³² VaBhenjamini vakati, “Vanonyiswa pamberi pedu kudai ngemikuwo yokutanga.” Asi vaIsuraeri vakati, “Ngatitize tivaozve kubva kudhorobha kuenda kumapato.”

³³ Vamuna veshe vaIsuraeri vakamiruka kubva kundau dzavo, vakadzirongedza kurwisa kuBhaaritamari, nevahwariri vaIsuraeri vakamiruka kubva kundau dzavo, kubva kumabirirazuva eGibhea.

³⁴ Vakauya kurwisana neGibhea vamuna gumi remakumi emazana (10,000) vakatsanangurwa kubva kuvaIsuraeri veshe, nokurwisana kwakatyisa. Asi vaBhenjamini avazi kuzia kuti dambudziko raiya pasinde kuvagumira.

³⁵ Mambo Mwari wakanyisa Bhenjamini pamberi pevaIsuraeri; vaIsuraeri vakauraya ngeiro zuva vaBhenjamini vamuna makumi mairi namashanu emakumi emazana nezana rimwe, (25,100) veshe ava vaipakatira shoti.

³⁶ Zvino vaBhenjamini vakaona kuti vainyiswa. VaIsuraeri vakaita pfundamutete kunevaBhenjamini ngokuti vaigonda vahwariri vevaiya vaemesa kurwisa muGibhea.

Kunyisa kweVakaita vaIsuraeri

³⁷ Varwi vaiya vakahwarira vakakasira kurumba kuenda Gibhea. Zvino vakabaya veshe vaiya mudhorobha ngokupinza kweshoti.

³⁸ Zvino kwakatenderwana chioniso pakati pevanhu vaIsuraeri nevahwariri chokuti vanozopisha muriro mukuru unechiushi kubaka kubva kudhorobha,

³⁹ vamuna veshe vaIsuraeri vaiya vapetuka kubva koorwa. Asi vaBhenjamini vakatanga kubaya nokuuraya vanhu vaIsuraeri vaida kuguma makumi matatu; ndizvo vakati, “Ngegwinyiso vanozonyiswa pamberi pedu, kudai ngehondo yokutanga.”

⁴⁰ Asi apo murazvu womuriro watanga kukwira kubva mudhorobha unemvumi yechiushi, vaBhenjamini vakaringira sure kwavo, nakwo kwaiya nechiushi chedhorobha reshe chaikwira mudenga.

⁴¹ Zvino vamuna vaIsuraeri vakakunukukira sure, vamuna vaBhenjamini vakapera simba, ngokuti vakaona kuti kushata kunovagumira.

⁴² Ndizvo vakafuratira mishana yavo kunevaIsuraeri kutiza ngenjira inoenda mushango; asi kurwa kwakavagumira, naavo vakabuda kubva pakati pemadhorobha vakavauraya vari pakati pavo.

⁴³ Ngokudaro vakatendenedza vaBhenjamini pakati, vakavarumbirira, vakavatsikatsika pashi kubvira Noha rakaringirana neGibhea ngokumabvazuva.

⁴⁴ Vakaurawa vaBhenjamini vamuna gumi namasere emakumi emazana (18,000), veshe ava vaiya ngwazi.

⁴⁵ Naapo vakunukuka kutiza kuenda mushango kubuwe reRimoni, vakavanongeredza mumapato vamuna makumi emazana mashanu (5,000), vakavarumbirira kakurutu metsa vaguma Gidhomu, vakauraya vamuna vavo makumi emazana mairi (2,000).

⁴⁶ Ndizvo avo vakaurawa vaBhenjamini ngeiro zuva vaiya makumi mairi namashanu emakumi emazana (25,000) evamuna, vaipakatira shoti; veshe ava vaiya ngwazi.

⁴⁷ Asi vamuna mazana matanhatu (600) vakakunukuka, vakatizira mushango kuenda kubuwe reRimoni, vakagara pabuwe reRimoni mwedzi mirongomuna.

⁴⁸ Nevamuna vaIsuraeri vakahwirira kuvaBhenjamini, vakavauraya ngokupinza kweshoti, vamuna vemadhorobha eshe nen'ombe dzeshe, neizvo zveshe zvevakaona umwozve. Vakapisha ngomuriro madhorobha eshe evakaguma kwaari.