Vato. 19 - Bhaibheri Rakachena muChindau

MuRevhi neBunha Rake

¹ Ngaawo mazuva, apo kwaiya kusina mambo muIsuraeri muRevhi umweni waigara ngomujingachinga munyika yemitunhu yaEfuremu, wakadzitorera bunha kubva kuBhetherehema muJudha.

² Asi bunha rake rakaita ufebi rikabva kwaari, rakamusiya rikakwira kumhatso yababa aro kuBhetherehema muJudha, naro rakagareyo mwedzi yeshe mirongomuna.

³ Zvino mwamuna waro wakamiruka akariteera, kuti aerekete kweriri ngokuiyanisa nokuhwirira narozve.Wakahamba nomuranda wake, nezvimbongoro zvake zviiri. Naapo aguma pamhatso yababa aro, baba omusikana uwo vamuona vakauya ngokudakara kukurutu kooshongana naye.

⁴ Nomuzvere wake, baba omusikana, vakamuaraidza; naye wakagara navo mazuva matatu. Ndizvo vakadya vakamwa nokuata apo.

⁵ Ngezuva rechirongomuna, vakamuka mangwanani maishi, naiye wakanasirira kuenda; asi baba omusikana vakati kumukwambo wavo, “Gwinyisa mwoyo wako ngekachingwa aka, ngesure kwazvo munozoenda henyu.”

⁶ Ndizvo vamuna vairi avo vakagara pashi, vakadya nokumwa vari pamwepo; baba omusikana akati kunomunhu uwo, “Tenda, ndinokupota kuti uate usiku hweshe, nomwoyo wako ngaudakare.”

⁷ Naapo munhu wakamiruka kuti aende, muzvere wake wakamupota. Ndizvo wakaata apozve.

⁸ Naye wakamiruka mangwanani maishi ngezuva rechishanu kuti aende. Baba omusikana vakati kwaari, “Gwinyisa mwoyo wako, ndinokupota,” ndizvo vakazungaira, metsa kutengama kwezuva; navo vakadya vari vairi.

⁹ Naapo munhu nebunha rake pamwepo nomuranda wake amiruka kuti aende, vazvere vake, baba omusikana, vakati kwaari, “Ringira zvino, zuva rodo kubira. Ndinokupota, atazve pano, kuti mwoyo wako udakare, namangwani unozofumira kuenda njira yako, kuti ugume kanyi.”

¹⁰ Asi munhu aazi kutenda kuata apo uhwo usiku; wakamiruka akaenda, akaguma apo pakaringirana neJebhusi, (iro ndiro Jerusarema.) Waiya anazvo zvimbongoro zviiri zvakasungirwa, nebunha rake naro raiya naye.

¹¹ Naapo vaiya pasinde peJebhusi zuva rakabira; nomuranda wakati kunamambo wake, “Uya, ndinokupota, ngatipaukire mudhorobha revaJebhusi, tiatemwo.”

¹² Asi mambo wake wakati kwaari, “Atizopaukiri kudhorobha revapara, avo vasiri vaIsuraeri; tinozodarika kuenda Gibhea.”

¹³ Zvino wakati kunomuranda wake, “Uya, tikwedzere kuneimwe yeidzi ndau tiatepo usiku hweshe, muGibhea nokuti muRama.”

¹⁴ Ndizvo vakadarika kuenda ngenjira yavo; nezuva rakavapotera vaapasinde peGibhea, iro riri raBhenjamini.

¹⁵ Navo vakapauka apo kupotera mudhorobha kuti vaate muGibhea. Vakapotera, vakagara pashi mupato romudhorobha, asi apana naumwe munhu wakavapinza mumhatso mwake kuti vaatemwo.

¹⁶ Zvino madeekoni kwasvipa kwakaguma apo munhu musharuka echibva mumunda wake. Uwo naye waiya womunyika yemitunhu yaEfuremu, naye waigara muGibhea; (asi vamuna vendau iyo vaiya vaBhenjamini.)

¹⁷ Naapo musharuka amirudza madziso ake, wakaona muhambi akagara mupato romudhorobha; nomunhu musharuka wakati, “Unoenda kuri? Wambobva kuri?”

¹⁸ Wakati kwaari, “Tinopinda kubva Bhetherehema raJudha kuenda kujingachinga renyika yemitunhu yaEfuremu, ndikwo kwendinobva. Ndakaenda Bhetherehema raJudha, neni ndinoenda kumhatso yaMambo Mwari; asi akuna munhu wandiashira mumhatso yake.

¹⁹ Asi tinazvo zveshe mwenje wakaoma nokudya kwembongoro dzedu; tinechingwazve nevhini zvinotikwanisa nomurandakadzi wako, nejaha iro rinohamba nomuranda wako. Akuna chiro chetinotama.”

²⁰ Munhu musharuka wakati, “Kunyarara ngakugare kwouri. Inini ndichakupa zveshe zvounotama; kwega musaata mupato.”

²¹ Ndizvo wakamuunza mumhatso yake, wakapa zvimbongoro zvokudya; vakashamba tsoka dzavo, vakadya nokumwa.

²² Zvino vachadakadzisa mwoyo yavo, penya, vamuna vedhorobha, vanhu vakashata, vakatendenedza mhatso, vakakuhudza pamusiwo. Vakaereketa nomunhu wemhatso, uwo musharuka, vechiti, “Budisai uwo munhu wapotera mumhatso yako, kuti tiite kwaari kudai ngomukadzi.”

²³ Nomunhu uwo wemhatso wakabuda kwavari, akati kwavari, “Haiwa hama dzangu, haiwa, ndinomupota, musaita kushata kwakadaro. Mwechiona kuti uyu munhu wapotera mumhatso yangu, musaita uhwo upenzi.

²⁴ Wonai, uri pano mwanasikana wangu waamhandara, nebunha rake; ava ndinovabudisa kwomuri zvino, muvapfaise, muite zvomunoda kwavari; asi kunouyu munhu musaita chiro chakadaro kushata kwaari.”

²⁵ Asi vanhu avazi kutenda kumupurutana. Ndizvo munhu wakatora bunha rake, wakaribudisa kwevari; navo vakashanja naro, vakamushaishira metsa usiku hweshe kukaedza mangwanani. Naapo zuva rotanga kuedza vakamurekera kuti aende.

²⁶ Naapo mukadzi uwo wakauya mukuedza kwokubanze, wakawa pamusiwo wemhatso yomunhuwo mwaiya namambo wake, metsa kwakaedza.

²⁷ Namambo wake wakamiruka mangwanani, wakabeura musiwo wemhatso, akabuda kuti aende njira yake. Penya, mukadziwo bunha rake raiya rakawa pashi pamusiwo wemhatso, nenyara dzake dzaiya padimba.

²⁸ Wakati kwaari, “Miruka ngatiende.” Asi apana mupinguro. Naapo uwo munhu wakamutora, akamuisa pambongoro, nomunhuwo wakamiruka akaenda kundau yake.

²⁹ Naapo apotera aguma mumhatso yake, wakatora banga naye wakabata bunha rake, wakaritematema, pamwepo nemagodo aro, kuita zvigurwa gumi nazviiri, wakazvitumira kunyika dzeshe dzaIsuraeri.

³⁰ Zvino wakapanga vamuna avo vaakatuma echiti, “Munozoti kuvaIsuraeri, ‘Akuzi kumboitika chiro chakadai nokuti kumbooneka metsa kuzuva revakakwira vaIsuraeri kubva kunyika yeEgipite metsa nanyamashi. Pinimidzai ndicho, mupangane, muerekete chomunopinimidza.’ ”