Vato. 18 - Bhaibheri Rakachena muChindau

Mikha neDzinza raDhani

¹ Mumazuva awo kwaiya kusina mambo muIsuraeri. Mumazuva awo dzinza raDhani rakadzitsvakira ndau yokuti rigare; ngokuti metsa ngeiro zuva vaiya vasati vaane nyika yeshe yenhaka yavo pakati pemadzinza aIsuraeri.

² Ndizvo vana vaDhani vakatuma vanhu vashanu vedzinza ravo kubva kumigano yavo, vamuna vanoshinga, kubva Zora nokubva Eshitaori, kuti vanengere nyika nokuiona; vakati kwavari, “Endai munengere nyika.” Naapo vaguma kunyika yemitunhu yeEfuremu, kumhatso yaMikha, vakaata apo.

³ Naapo vari pamhatso yaMikha, vakazia izwi rejaha raiya muRevhi; ndizvo vakapaukira kuenda apo, vakati kwaari, “Ndiani wakakuunza pano? Unoshandenyi pandau iyi? Chiinyi chounacho pano?”

⁴ Naye wakati kwavari, “Mikha wakandiitira ichi neichi, wakanditora ngomuthuso neni ndiri mupristi wake.”

⁵ Zvino vakati kwaari, “Tibvunzire kubva kunaMwari, tinokupota, kuti tizie kuti rwendo rwedu runozobudirira.”

⁶ Mupristi wakati kwavari, “Endai ngokunyarara. Njira yenyu yomunohamba ndiyo iri pamberi paMambo Mwari.”

⁷ Vamuna vashanu vakaenda, naapo vaguma Raishi, vakaona vanhu avo vaigaremwo, vaigara vakangwaririka, kudai ngevaSidhoni, vakanyarara, vakangwaririka, vasikatami chiro, munyika, vaine upfumi.Navo vaiya kuretu kubva kuvaSidhoni, vaiya vasina chokuita naAramu kunyazwi ngouri.

⁸ Vaguma kuhama dzavo paZora naEshitaori vakati kwavari, “Ronza tizwe.”

⁹ Navo vakati, “Mirukai tiende koorwa navo; ngokuti takaiona nyika, yakanaka kakurutu. Nemwi munonyarara here? Musaita nungo. Musanonoka kuenda koogara nhaka yenyika iyo.

¹⁰ Naapo mwechizoenda munozoguma kunevanhu vakangwaririka, nokunyika yakakura, ngokuti Mwari unoipa munyara dzenyu, ndau isikatamiki chiro kunyazwi ngechiri chomunyika.”

¹¹ Vamuna mazana matanhatu (600) vedzinza raDhani vakabuda kubva Zora neEshitaori, vaiya vakapakatira mhumbi dzokurwa.

¹² Navo vakakwira, vakaemesa matende avo muKiriathijearimu, rokwaJudha. Ngendaa iyi vakadudza zina reiyo ndau kuti Mahanedhani metsa nanyamashi; ringirai iri kumabirirazuva kweKiriathijearimu.

¹³ Vakahamba kubva apo kuenda kunyika yemitunhu yaEfuremu, vakaguma kumhatso yaMikha.

¹⁴ Zvino vakapingura avo vamuna vashanu vaiya vakaenda koonengera nyika yeRaishi, vakati kuhama dzavo, “Amuzii here kuti riripo muidzi mhatso efodhi, neterafimu, nomuedzaniso wakatsetswa nowakaumbwa? Ndizvo zvino pinimidzai kuti chiinyi chomungazoita.”

¹⁵ Ndizvo vakapaukira kuenda apo, vakaguma kumhatso yejaha raiya muRevhi, kumhatso yaMikha, vakamuchingamidza.

¹⁶ Naapo vamuna mazana matanhatu (600) vaiya vakapakatira nhumbi dzokurwa, vaiya vedzinza raDhani vakaema ngepamusiwo.

¹⁷ Vamuna vashanu vaiya vakaenda koonengera nyika vakapotera apo, vakatora muedzaniso wakatsetswa, neefodhi, neterafimu, nomuedzaniso wakaumbwa; nomupristi wakaenda pokupotera pamusiwo pamwepo nevamuna mazana matanhatu (600) vaiya vakapakatira nhumbi dzokurwa.

¹⁸ Naapo vapotera mumhatso yaMikha, vakatora muedzaniso wakatsetswa, neefodhi, neterafimu, nomuedzaniso wakaumbwa, mupristi wakati kwavari, “Munoitenyi?”

¹⁹ Vakati kwaari, “Nyarara! Isa nyara yako pamuromo wako, uuye nesu, uite kwetiri baba edu nomupristi wedu. Kwakapinda kunaka here kuti uite mupristi kuvemhatso yomunhu umwe, kuno kuti uite mupristi kudzinza nemhuri muIsuraeri?”

²⁰ Zvino mupristi wakatenda, naye wakatora efodhi, neterafimu, nomuedzaniso wakatsetswa, akahamba ari pakati pevanhu.

²¹ Ndizvo vakatangazve rwendo rwavo, vakaisa vadoko nen'ombe nemitwaro pamberi pavo.

²² Naapo vahamba kuenda kuretu kwemhatso yaMikha, vamuna avo vaiya mumhatso dziri pasinde nemhatso dzaMikha vakadaidzwa, vakarwisa vaDhani.

²³ Vakadaidzira kunevaDhani, vakakunukuka hope dzavo vakati kunaMikha, “Ndaa ngeyenyi kwouri, kuti uuye nembungano yakadai?”

²⁴ Naye wakati, “Imwimwi mwakatora zvimwari zvangu zvendakaita, nomupristi, nemwi munoenda. Ndasara nei inini? Chiinyi ichi chomunoronza kwendiri mwechiti, ‘Ndaa ngeyenyi kwouri?’ ”

²⁵ NevaDhani vakati kwaari, “Izwi rako risazozwika pakati pedu, kuti vanhu vanoushungu vasazokubaya, uurawe iwewe, nevemhatso yako.”

²⁶ Zvino vaDhani vakaenda njira yavo. Naapo Mikha aona kuti vaiya nesimba kakurutu kupinda iye, wakakunukuka, akapetuka kumhatso yake.

²⁷ VaDhani vatora zviro zvaaiya akanasira Mikha, nomupristi waaiya naye, vakaguma Raishi, kunevanhu avo vaigara mukunyarara nomukungwaririka; navo vakavabaya ngokupinza kweshoti, vakapisha dhorobha iro ngomuriro.

²⁸ Kwaiya kusina mununuri, ngokuti raiya kuretu kubva Sidhoni, navo vaiya vasina chokuita naAramu; naro raiya mubani rakaita maringwa neBhethi-rehobhi. Navo vakaakisa dhorobha, vakagara umwo.

²⁹ Vakadudza zina redhorobha iro kuti Dhani, kutumidzira zina rababa avo Dhani, uwo wakabarwa ndiIsuraeri; asi zina redhorobha iro ngekaretu raiya Raishi.

³⁰ Zvino vaDhani vakadziemesera uwo muedzaniso wakatsetswa. Jonathani mukororo waGershomu, mukororo waMosi, nevakororo vake vaiya vapristi kudzinza raDhani metsa kuguma kuzuva rokutorwa kwevanhu venyika kuita hloko.

³¹ Ndizvo vakaemesa muedzaniso wakatsetswa waMikha, waakanasira, mukuwo weshe wemhatso yaMwari yaiya muShiro.