Vato. 17 - Bhaibheri Rakachena muChindau

Mikha neZvimwari

¹ Kwaiyapo munhu munyika yemitunhu yaEfuremu, zina rake ndiMikha.

² Wakati kunamai ake, “Zvigurwa zvesirivha mazana gumi narimwe (1,100) zvakatorwa kubva kwomuri, zvemwakatuka ndizvo, mukaereketa ndizvozve mukuzwa kwangu, ringirai, sirivha iyo ineni; ndakazvitora asi zvino ndinozvipetudza kwomuri.” Namai ake akati, “Mambo Mwari ngaakufumise, mukororo wangu!”

³ Zvino wakahwirinza kunamai ake zvigurwe zvesirivha mazana gumi narimwe; (1,100); mai ake akati, “Ndinopira yaamho sirivha iyi kunaMambo Mwari kubva kunyara dzangu kuita yomukororo wangu, kunasira ndiyo muedzaniso wakaumbwa.”

⁴ Ndizvo apo ahwirinza mare iyo kunamai ake, namai ake akatora mazana mairi (200) ezvigurwa zvesirivha iyo, akaipa kumunyungurusi wesimbi, uwo wakanasira ndiyo muedzaniso wakatsetswa, nowakaumbwa; nawo waiya mumhatso yaMikha.

⁵ Nouwo munhu Mikha waiya nemhatso yezvimwari, naye wakanasira efodhi neterafimu, wakadzodza umwe wevana vake, nouwo wakaita mupristi wake.

⁶ Mumazuva awo kwaiya kusina mambo muIsuraeri, asi munhu weshe waiita izvo zvaiya zvakasisira mukuona kwake.

⁷ Zvino kwaiyapo jaha muBhetherehema raJudha wedzinza raJudha waiya muRevhi, waiya chigarandimo apo.

⁸ Nouwo munhu wakabuda kubva kudhorobha reBhetherehema muJudha, kuti aende koogara apo paanokona kugara. Wakauya kumhatso yaMikha munyika yemitunhu yaEfuremu.

⁹ Mika wakati kwaari, “Unobva kuri?” Wakati, “Ndiri muRevhi weBhetherehema raJudha, ndiri murwendo kutsvaka ndau kunyazwi ngepari pendingagara.”

¹⁰ Zvino Mikha wakati kwaari, “Gara neni, uite kwendiri baba nomupristi; ndinozokupa zvigurwa zvesirivha gumi ngegore, chipani chezvokusimira, nezvokudya kwako.”

¹¹ NomuRevhi wakatenda kuti agare nomunhu uwo; nejaha rakaita kwaari kudai ngoumwe wevakororo vake.

¹² Ndizvo Mikha wakadzodza uwo muRevhi; nejaha rakaita mupristi wake, wakagara mumhatso yaMikha.

¹³ Zvino Mikha wakati, “Zvino ndinozia kuti Mambo Mwari unozondiitira zvakanaka, kwechioneka kuti ndaano muRevhi unoita mupristi wangu.”