Vato. 16 - Bhaibheri Rakachena muChindau

Samusoni paGaza

¹ Naapo Samusoni wakaenda Gaza, apo paakaona chifebi, wakapotera kwechiri.

² VaGaza vakaronzerwa kuti, “Samusoni waguma uno.” Navo vakamukombera mukati, vakamuhwarira usiku hweshe ngepamusiwo wedhorobha. Vakanyarara usiku hweshe vechiti, “Mangwanani apo kwaedza tinozomuuraya.”

³ Asi Samusoni wakaata metsa pakati pousiku. Zvino wakamiruka pakati pousiku, naye wakabata kubvita misiwo nesika mbiri dzemusiwo wedhorobha, wakabuda kuenda nadzo, zveshe nomupiningidzo, wakazvidzvara pamapfudzi ake, akakwira nazvo padera pomutunhu wakaringirana naHebroni.

Samusoni naDherira

⁴ Ngesure kweizvo wakada mudzimai waigara mubani reSoreki, zina rake raiya Dherira.

⁵ Madzimambo evaFiristia vakwira kuuya kwaari, vakati kwaari, “Nasa kumunyengerera, uone kuti simba rake guru rinobva pari, nokuti tingamuita manyisirenyi, kuti tikone kumusunga timushwinyise; nesu tinozopa kwouri munhu weshe zvigurwa zvesirivha mazana ari gumi narimwe.” (1,100)

⁶ Ndizvo Dherira wakati kunaSamusoni, “Ndinokupota, nasa kundironzera kuti simba rako guru rinobva pari, nokuti ungaita masungirwenyi kuti ushwinyiswe.”

⁷ Samusoni wakati kwaari, “Kudai mwechizondisunga ngesinga nomwe dzisati dzaoma, naapo ndinozoita usina simba, ndiite kudai ngevamuna vamweni.”

⁸ Zvino madzimambo evaFiristia vakaunza kwaari singa nomwe dzisati dzaoma, naye wakamusunga ndidzo.

⁹ Zvino kwaiyapo vamuna vaigara mukamera rake vakahwarira. Naye wakati kwaari, “VaFiristia vaapano kukubata, Samusoni!” Naye wakadambura singa idzo kudai ngemabvurubvuru anodambuka apo apishwa ngomuriro. Ndizvo simba rake arizi kuziikanwa.

¹⁰ Zvino Dherira wakati kunaSamusoni, “Wona, wandichengedzera wechindironzera manyepo; zvino ndironzere, ndinokupota, kuti ungaita masungirwenyi.”

¹¹ Naye wakati kwaari, “Kudai vechizondisunga kakurutu ngetambo itsva, dzisati dzamboshandiswa, naapo ndinozoita usina simba, ndiite kudai ngevamuna vamweni.”

¹² Ndizvo Dherira wakatora tambo itsva, akamusunga ndidzo, akati kwaari, “VaFiristia vaapano kukubata, Samusoni!” Zvino kwaiyapo vamuna vaigara naye mukamera rake vakahwarira. Asi wakadzidambura kubva mumioko yake kudai ngezvimapote.

¹³ Dherira wakati kunaSamusoni, “Metsa zvino iwewe wandichengedzera, wechindironzera manyepo; ndironzere kuti ungaitwa masungirwenyi.” Naye wakati kwaari, “Kudai wechizoruka nyunzu dzangu nomwe dzesoro rangu ngebande udzigwinyise ngembambo, neni ndinozorembedzeka kudai ngevamuna vamweni.”

¹⁴ Ndizvo apo achakaata, Dherira wakatora nyunzu nomwe dzesoro rake, akadziruka kuita nyunza imwe, akaigwinyisa ngembambo, akati kwaari, “VaFiristia vaapano kukubata, Samusoni!” Asi wakamuka kubva muhope dzake, akabvita rumbomba rwomuti wedando nebande rakarukwa.

¹⁵ Zvino wakati kwaari, “Ungaita maronzerenyi kuti, ‘Ndinokuda,’ apo mwoyo wako usiri kwendiri? Wandiitira jee aka katatu, auzi kundironzera apo panobva simba rako guru.”

¹⁶ Kwakaitika apo aangirira kumunyengerera mazuva eshe ngemazwi ake, akamutambudza metsa mweya wake wodo kufa.

¹⁷ Ndizvo wakamuronzera zveshe zvaiya mumwoyo mwake, wakati kwaari, “Achizi kutongoapo chisvo padera pesoro rangu; ngokuti ndakaita muNaziriti kunaMwari kubvira mundani yamai angu. Kudai ndechizoparwa, simba rangu rinozobva kwendiri, neni ndinozoita usina simba ndidai ngevamuna vamweni.”

¹⁸ Naapo Dherira aona kuti waiya amuronzera zveshe zvaiya mumwoyo mwake, wakatuma, akadaidza madzimambo evaFiristia echiti, “Kwirai kamwe kano kega, ngokuti iye wandironzera zveshe zviri mumwoyo mwake.” Naapo madzimambo evaFiristia vakakwira kwaari, vakaunza mare munyara dzavo.

¹⁹ Iye wakamuita kuti aate pazvizva zvake; wakadaidza munhu, akamuita kuti agunde nyunzu nomwe dzesoro rake. Wakatanga kumushwinyisa, nesimba rake rakabuda kubva kwaari.

²⁰ Wakati, “VaFiristia vaapano kukubata, Samusoni!” Naye wakavunzumuka kubva muhope dzake akati, “Ndinozobuda kudai ngemikuwo imweni ndidzizuwe.” Naye aazi kuzia kuti Mambo Mwari waiya amusiya.

²¹ Asi vaFiristia vakamubata, vakamutumbura madziso ake. Vakamuunza kudzaka Gaza, navo vakamusunga ngemanguri ethusi; iye waigaisa ari mumhatso yetirongo.

²² Asi bvudzi resoro rake rakagundwa rakatangazve kukura.

Rufu rwaSamusoni

²³ Zvino madzimambo evaFiristia vakadziunganidza pamwepo kuti vapire mubairo mukuru kunaDhagoni chimwari chavo, nokuti vadakare; ngokuti vakati, “Chimwari chedu chakatipa munyara dzedu Samusoni gaa redu.”

²⁴ Naapo vanhu vamuona, vakakudza chimwari chavo; ngokuti vakati, “Chimwari chedu chakatipa munyara dzedu gaa redu, nomuurayi wenyika yedu, uwo wakauraya vazhinji vedu.”

²⁵ Apo mwoyo yavo yaiya yechidakara, vakati, “Daidzai Samusoni, kuti ambotitambira.” Ndizvo vakadaidza Samusoni kubva kumhatso yetirongo; naye wakavatambira. Vakamuisa pakati pesika;

²⁶ naSamusoni wakati kunomurumbwana waimutungamirira ngokubata nyara, “Nditendere, ndinokupota, kuti ndibate sika dzemhatso dzinoigwinyisa, kuti nditseame kwedziri.”

²⁷ Zvino mhatso yaiya yakazara ngevamuna nevakadzi; nemadzimambo eshe evaFiristia waiya varimwo; kwaiyapo ngepadera pedenga remhatso vaida kukwana makumi emazana matatu (3,000) evamuna nevakadzi, vairingira apo Samusoni aivatambira.

²⁸ Samusoni wakakumbira kunaMambo Mwari, akati, “A Mambo Mwari, Mwari, ndicherechedze, ndinokupota, kega kamwe kano, A Mwari, kuti ndiunzidzire kamwe kuvaFiristia ngendaa yemadziso angu mairi.”

²⁹ Samusoni wakabata sika mbiri dzepakati, idzo dzakagwinyisa mhatso, dzaaiya akatseama kwedziri, imwe ngenyara yake yokumudyo, neimweni ngenyara yake yokumuoshwe.

³⁰ Zvino Samusoni wakati, “Ngandife pamwepo nevaFiristia.” Wakadzikotamisa ngesimba rake reshe; nemhatso yakawa padera pemadzimambo nevanhu veshe vaiya mukati mwayo. Ndizvo vakafa vaakauraya ngomukuwo wokufa kwake vakapinda kuwanda kuneavo vaakauraya achapona.

³¹ Zvino hama dzake, nevemhatso yeshe yababa ake vakadzaka kuuya koomutora, vakakwira naye, vakamuika pakati peZora neEshitaori mundau yokuika yababa ake Manoa. Naye wakatonga Isuraeri makore makumi mairi.