Vato. 15 - Bhaibheri Rakachena muChindau

¹ Ngesure kwomukuwo, ngomukuwo wokucheka koroni, Samusoni wakahambira mukadzi wake anechimbudzana; wakati, “Ndinoda kupotera kunomukadzi wangu mukamera rake.” Asi baba ake aazi kumutendera kuti apoteremwo.

² Baba ake akati, “Ngegwinyiso ndaipinimidza kuti unomunyenya yaamho; ndizvo ndakamupa kuneshamwari yako. Munun'una wake aazi kupinda kuringirika here kuna iye? Mutore, ndinokupota, pandau yake.”

³ Samusoni wakati kwevari, “Panguva ino ndikaita zvakashata kuvaFiristia zvino ndinozoita usina ndaa.”

⁴ Ndizvo Samusoni wakaenda, akabata hava mazana matatu, akatora masasi, akasungira miswe kunemiswe, akaisa masasi pakati pemiswe.

⁵ Naapo aiya atungidza muriro kumasasi, akadzitinhira pakati pekoroni isati yachekwa yevaFiristia, akapisha iyo yaiya yaitwa mwanda, neiyozve yaiya isati yachekwa, pamwepo nemivhini nemaorivhi.

⁶ Naapo vaFiristia vakati, “Ndiani waita ichi?” Navo vakapingura, “NdiSamusoni, mukwambo womuThimina, ngokuti iye wakatora mukadzi wake akamupa kuneshamwari yake.” NevaFiristia vakakwira, vakamupisha iye nababa ake ngomuriro.

⁷ Samusoni wakati kwavari, “Kudai izvi zvirizvo zvomunoita, ndinopika ngegwinyiso andizorekeri metsa ndaunzidzira.”

⁸ Naye wakavabaya nhunji nezvizva ngokuuraya kukuru; wakadzaka akagara mubako rebuwe reEtamu.

Samusoni Unonyisa VaFiristia

⁹ Zvino vaFiristia vakakwira, vakaemesa matende avo muJudha, vakarwisa muRehi.

¹⁰ Vamuna vokwaJudha vakati, “Munokwirirenyi kurwa nesu?” Navo vakapingura vechiti, “Kuti tisunge Samusoni, tiite kwaari kudai ngezvaakaita kwetiri.”

¹¹ Zvino vamuna makumi emazana matatu (3,000) evaJudha vakadzaka kubuwe rinozwi Etamu, vakati kunaSamusoni, “Auzii here iwewe kuti vaFiristia vanotonga padera pedu? Chiinyi chewaita kwetiri?” Naye wakati kwavari, “Kudai ngezvevakaita kwendiri, ndizvo ndakaitawo kwavari.”

¹² Navo vakati kwaari, “Tadzaka kuuya kukusunga, kuti tikupire munyara dzevaFiristia.” NaSamusoni wakati kwavari, “Pikai kwendiri kuti imwimwi amuzondiurayi mwemene.”

¹³ Vakaereketa kwaari vechiti, “Haiwa, asi tinozokusunga kwega, nokupira munyara dzavo; ngegwinyiso atizokuurayi.” Ndizvo vakamusunga ngetambo mbiri itsva, vakamukwidza kubva pabuwe.

¹⁴ Naapo auya Rehi, vaFiristia vakamuheudza; noMweya waMambo Mwari wakauya padera pake ngesimba, netambo dzaiya mumioko yake dzakaita kudai ngetambo dzakatsva ngomuriro, nezvisungo zvake zvakasunhuka kubva munyara dzake.

¹⁵ Naye wakaona godo rorutsaya rwembongoro rutsva, akatambanudza nyara yake, akarutora, akauraya vamuna gumi remazana (1,000) ndirwo.

¹⁶ NaSamusoni wakati, “Ngorutsaya rwembongoro, mirwi padera pemirwi, ngorutsaya rwembongoro, ndakauraya vamuna gumi remazana.” (1,000)

¹⁷ Naapo apedza kuereketa, wakarasha rutsaya rwembongoro kubva munyara yake; naye wakadudza zina reiyo ndau kuti Ramathi-rehi.

¹⁸ Naye waiya apera ngenyota kakurutu, wakadaidza kunaMambo Mwari echiti, “Iwewe wakapa uku kusunhurwa kukuru munyara dzomuranda wako. Zvino ndinozofa here ngenyota, ndiwire munyara dzaavo vasikazi kuchekwa?”

¹⁹ Ndizvo Mwari wakabeura mhango paRehi, nemvura yakabuda mukati mwayo; naapo amwa, mweya wake wakapetuka, naye wakagwinyiswa. Ndizvo wakadudza zina reiyo ndau kuti Enihakore, iri muRehi metsa nanyamashi.

²⁰ Naye wakatonga vaIsuraeri ngemazuva evaFiristia makore makumi mairi.