Vato. 14 - Bhaibheri Rakachena muChindau

Samusoni noMusikana Waibva Thimina

¹ NaSamusoni wakadzaka kuenda Thimina, nepaThimina wakaona mukadzi wevaFiristia.

² Naye wakakwira, akaronzera baba ake namai, “Ndaona mukadzi muFiristia paThimina. Zvino nditorerei kuti aite mukadzi wangu.”

³ Asi baba ake namai ake vakati kwaari, “Akuna here mukadzi pakati pevanasikana vehama dzako, nokuti pakati pevanhu vedu veshe, zvounoda kuti uende kootora mukadzi kubva kuvaFiristia, avo vasikazi kuchekwa?” NaSamusoni wakati kunababa ake, “Nditorerenyi uwo, ngokuti unondidakadza kakurutu.”

⁴ Asi baba ake namai ake vasaizia kuti ichi chakabva kunaMambo Mwari, ngokuti waitsvaka kuitira ndaa nevaFiristia. Panguva iyo vaFiristia vaitonga padera pevaIsuraeri.

⁵ Zvino Samusoni nababa ake, namai ake, vakadzaka Thimina; naapo vaguma paminda yemivhini yeThimina, paripo mhondoro itsva yakabuda kwaari yechidzvova.

⁶ Mweya waMambo Mwari wakauya ngesimba padera pake, naye wakabaura mhondoro kudai ngounobaura kambudzana, asina chiro munyara dzake. Asi aazi kuronzera baba ake nokuti mai ake izvo zvaaiya aita.

⁷ Zvino wakadzaka, akaereketa nomukadzi uwo; naye wakamudakadza Samusoni kakurutu.

⁸ Ngesure kwomukuwo wakapetukazve koomuroora; wakapauka parutii koona muiri wemhondoro, wakaona bumbira renyuchi dzaiya nouchi mukati mwomuiri wemhondoro.

⁹ Wakatora uchi munyara dzake, akahamba echidya. Naapo aguma kunababa ake namai, wakavapa umweni, navo vakaudya. Asi aazi kuvaronzera kuti waiya atora uchi kubva mumuiri wemhondoro.

¹⁰ Ndizvo baba ake vakadzaka kuenda kumukadzi uwo; naSamusoni wakanasira apo dhiri, ngokuti ndiwo waiya muitiro wemajaha.

¹¹ Naapo vanhu vamuona, vakaunza shamwari makumi matatu kuti dzigare naye.

¹² Samusoni wakati kwavari, “Zvino ndinozoita chinai kwomuri. Kudai mwechizokona kuchidudzira yaamho kwendiri pakati pemazuva ari manomwe edhiri nokuchizia, zvino ndinozomupa zvokusimira nemihizo zviri makumi matatu nezvokupfeka zvezvipani makumi matatu.

¹³ Asi kudai mwechizokorera kuchidudzira kwendiri, zvino munozondipa mihizo makumi matatu nezvokupfeka zvezvipani makumi matatu.” Navo vakati kwaari, “Chironza chinai chako, kuti tichizwe.”

¹⁴ Naye wakati kwavari, “Kubva kunomudyi kwakabuda chokudya, nokubva kune unesimba kwakabuda chinotapira.” Navo avazi kukona kududzira chinai ngepakati pemazuva matatu.

¹⁵ Ngezuva rechirongomuna, vakati kunomukadzi waSamusoni, “Nyengerera mwamuna wako, kuti iye atidudzire chinai ichi, kuti tisazokupisha iwewe nemhatso yababa ako ngomuriro. Mwakatikoka kuti mutitorere zvetinazvo here?”

¹⁶ Ndizvo mukadzi waSamusoni wakachema pamberi pake, akati, “Iwewe unondizonda, aundidi akadi. Wakaronza chinai kunevanhu vokwangu, auzi kuchidudzira kwendiri.” Naye wakati kwaari, “Ringira, inini andizi kuchidudzira kunababa angu, nokuti kunamai angu, neni ndingachidudzira kwouri ngenyi?”

¹⁷ Naye wakachema pamberi pake mazuva manomwe edhiri. Ngezuva rechinomwe wakamuronzera, ngokuti iye wakamunesa kakurutu. Zvino wakadudzira chinai kunevanhu vake.

¹⁸ Vamuna vedhorobha vakati kwaari ngezuva rechinomwe risati rapota zuva, “Chiinyi chinotapira kupinda uchi? Chinyini chinesimba kupinda mhondoro?” Naye wakati kwavari, “Kudai musikazi kurima ngetsiru rangu, musaizokona kuzia chinai changu.”

¹⁹ Zvino mweya waMambo Mwari wakauya padera pake, naye wakadzaka kuenda Ashikeroni. Wakauraya vamuna vomudhorobha makumi matatu, wakatora zvakachakatwa zvavo, wakapa zvokusimira zvezvipani makumi matatu kwavari vaiya vakadudza chinai. Muushungu hwake hwaibaka wakakwira kumhatso yababa ake.

²⁰ Asi mukadzi waSamusoni wakapuwa kushamwari yake, iyo yaiya aita muemeri.