Vato. 13 - Bhaibheri Rakachena muChindau

Kubarwa kwaSamusoni

¹ VaIsuraeri vakaitazve zvakashata mukuona kwaMambo Mwari, naMambo Mwari wakavapira munyara dzevaFiristia makore makumi marongomuna.

² Kwaiyapo munhu umweni weZora wedzinza raDhani, uwo zina rake raiya Manoa; nomukadzi wake waiya ngomwa, asikabereki.

³ Nengirosi yaMambo Mwari yakaoneka kunouwo mukadzi, yakati kwaari, “Ringira zvino, uri ngomwa, aubereki; asi unozoita ukosha, ubereke mukororo.

⁴ Ndizvo zvino ngwara, ndinokupota, usamwa vhini nokuti zvinoradzisa, usadya chiro chinosvipisa,

⁵ ngokuti unozoita ukosha, ubereke mukororo. Apana chisvo chinozopara soro rake, ngokuti mwana uwo unozoita muNaziriti kunaMwari kubvira mundani. Ndiye unozotanga kusunhura vaIsuraeri kubva munyara dzevaFiristia.”

⁶ Zvino mukadzi wakauya, akaronzera mwamuna wake, akati, “Munhu waMwari wakauya kwendiri, nehope yake yakaringirika kudai ngehope yengirosi yaMwari, inotyisa kakurutu; asi andizi kumubvunza kuti wakabva kuri, aazi kundironzera zina rake.

⁷ Asi wakati kwendiri, ‘Ringira, unozoita ukosha, ubereke mukororo. Ndizvo zvino usazomwa vhini nokuti zvinoradzisa, nokuti kudya chiro chakasvipiswa, ngokuti mwana uwo unozoita muNaziriti kunaMwari kubvira mundani metsa kuguma kuzuva rokufa kwake.’ ”

⁸ Zvino Manoa akapota kunaMambo Mwari, akati, “A Mambo wangu, tendera munhu waMwari wowakatuma kuti auyezve kwetiri, atidzidzise zvetinozoita kunomwana uwo unozobarwa.”

⁹ NaMwari wakapurutana izwi raManoa; nengirosi yaMambo Mwari yakauyazve kunomukadzi akagara mumunda, asi Manoa mwamuna wake waiya asipo naye.

¹⁰ Ndizvo mukadzi wakakasira, akarumba, akaronzera mwamuna wake echiti, “Munhu wakauya kwendiri zuva rimweni wauyazve kwendiri.”

¹¹ NaManoa wakamiruka, akateera mukadzi wake, akaguma kumunhu, akati kwaari, “Ndiwe here munhu uwo wakaereketa nomukadzi uyu?” Naye wakati, “Ndini.”

¹² NaManoa wakati, “Zvino apo mazwi ako echizoitika, tinozoita maitirenyi kwaari?”

¹³ Ngirosi yaMambo Mwari yakati kunaManoa, “Kuneizvo zveshe zvendakaereketa kunomukadzi, ngaanase kuzvingwarira.

¹⁴ Asazodya chiro nachimwe chemivhini, zve, asazomwa vhini nokuti zvinoradzisa, nokuti kudya chiro chakasvipiswa. Izvo zveshe zvendakamupanga ngaazvingwarire.”

¹⁵ Manoa wakati kungirosi yaMambo Mwari, “Ndinokupota, chimbogara pano metsa tikunasirire kachimbudzana.”

¹⁶ Ngirosi yaMambo Mwari yakati kunaManoa, “Kudai mwechizondigarisa pano, andizodyi kudya kwako; asi kudai wechida kuita mudiro wokupisha, zvino upire kunaMambo Mwari.” (Ngokuti Manoa waiya asikazi kuzia kuti ingirosi yaMambo Mwari.)

¹⁷ Zvino Manoa wakati kungirosi yaMambo Mwari, “Ndiani zina rako, kuti apo izvi zvewaereketa zvoitika, tingazokuremeredza?”

¹⁸ Nengirosi yaMambo Mwari yakati kwaari, “Unondibvunzirenyi zina rangu, wechiona kuti riri rinoshamisa?”

¹⁹ Ndizvo Manoa wakatora chimbudzana pamwepo nomudiro wezviyo, naye wakapira kunaMambo Mwari padera pebuwe. Ngirosi yakaita ngokushamisa, naManoa nomukadzi wake vakaringira.

²⁰ Zvino apo murazvu wakwira kubva paarita kuenda mudenga, ngirosi yaMambo Mwari yakakwira nomurazvu paarita, naManoa nomukadzi wake vakazviringira; vakawa pashi pamavhu ngehope dzavo.

²¹ Asi ngirosi yaMambo Mwari aizi kuchazoonekazve kunaManoa nomukadzi wake. Zvino Manoa wakazia kuti waiya ngirosi yaMambo Mwari.

²² NaManoa wakati kunomukadzi wake, “Ngegwinyiso tinozofa, ngokuti tamuona Mwari.”

²³ Asi mukadzi wake wakati kwaari, “Kudai Mambo Mwari aida kutiuraya, asaizotenda kuashira mudiro wokupisha, nowezviyo kubva kunyara dzedu, nokuti kutionesa izvi zviro zveshe, nokuti zvino kuronza kwetiri zviro zvakadai ngeizvi.”

²⁴ Mukadzi wakabereka mukororo, wakadudza zina rake kuti ndiSamusoni. Nomwana wakakura, naMambo Mwari wakamufumisa.

²⁵ Mweya waMambo Mwari wakatanga kumusunda muMahanedhani pakati peZora naEshitaori.