Vato. 11 - Bhaibheri Rakachena muChindau

¹ Zvino Jefetha muGireadhi mukororo wechifebi waiya ngwazi inesimba.Gireadhi waiya baba aJefetha.

² Mukadzi waGireadhi wakamuberekera vakororo; nevakororo vomukadzi wake vakura, vashononesa Jefetha, vakati kwaari, “Auzogari nhaka mumhatso yababa edu; ngokuti uri mukororo womukadzi chifebi.”

³ Zvino Jefetha wakatiza kubva kuvanun'una vake, naye wakagara munyika yeTobhi. Kwakaungana kwaari Jefetha vanhu zvireshe, navo vakabuda kuenda naye.

⁴ Ngesure kwomukuwo vaAmoni vakarwa nevaIsuraeri.

⁵ Naapo vaAmoni vakarwa nevaIsuraeri, vakuru veGireadhi vakaenda kooteera Jefetha kubva kunyika yeTobhi.

⁶ Navo vakati kunaJefetha, “Uya uite nduna yedu, kuti tirwe nevana vaAmoni.”

⁷ Asi Jefetha wakati kuvakuru veGireadhi, “Amuzi kundiramba here, mukandidzinga kubva kumhatso yababa angu? Munouyirenyi kwendiri zvino apo mwaano kutambudzika?”

⁸ Vakuru veGireadhi vakati kunaJefetha, “Ndizvo takunukukira kwouri zvino, kuti iwewe uende nesu, nokurwa nevaAmoni, uite nduna yedu padera pevagari veshe veGireadhi.”

⁹ Jefetha wakati kuvakuru veGireadhi, “Kudai mwechizondiunzazve kanyi kuti ndirwe nevaAmoni, naMambo Mwari echizovapa kuti vanyiswe pamberi pangu, ndinozoita nduna yenyu here?”

¹⁰ Nevakuru veGireadhi vakati kunaJefetha, “Mambo Mwari ngaaite chapupu pakati pedu, kudai tisikazoiti kudai ngokuronza kwemazwi ako.”

¹¹ Ndizvo Jefetha wakaenda nevakuru veGireadhi, nevanhu vakamuita mukuru nenduna padera pavo; naJefetha wakaereketa eshe mazwi ake pamberi paMambo Mwari muMizipha.

¹² Zvino Jefetha wakatuma nhumwa kunamambo wevaAmoni echiti, “Unendaa yenyi kwendiri yokuti unouya koorwisa munyika mwangu?”

¹³ Mambo wevaAmoni wakapingura nhumwa dzaJefetha, “Ngokuti vaIsuraeri vakatora nyika yangu, apo vachabuda kubva Egipite, kubvira Arinoni metsa kuguma Jabhoki, nokuJorodhani; ndizvo zvino, petudza sure idzi nyika ngokunyarara.”

¹⁴ NaJefetha wakatumazve nhumwa kunamambo wevaAmoni.

¹⁵ Naye wakati kwaari, “Unoronza izvi Jefetha: VaIsuraeri avazi kutora nyika yaMoabhi, nokuti nyika yaAmoni.

¹⁶ Asi apo vaIsuraeri vakwira kubva Egipite, vakahamba kuparura kuguma kuRuandhle Rwakatsvuka, vakaguma Kadheshi.

¹⁷ Naapo vaIsuraeri vakatuma nhumwa kunamambo weEdhomu vechiti, ‘Nditendere, ndinokupota, kuhamba kupinda ngomunyika mwako;’ asi mambo weEdhomu aazi kupurutana icho. Ngokudarozve vakatuma kunamambo weMoabhi, asi iye aazi kuvatendera. Ndizvo vaIsuraeri vakagara muKadheshi.

¹⁸ Naapo vakahamba ngomushango, vakamonerera nyika yeEdhomu, nenyika yeMoabhi, vakauya ngokumabvazuva kwenyika yeMoabhi, vakaemesa matende avo ngokurutii rwokumabvazuva rweArinoni. Asi avazi kuguma mukati mwenyika yeMoabhi, ngokuti Arinoni ndiwo mugano wenyika yeMoabhi.

¹⁹ NevaIsuraeri vakatuma nhumwa kunaSihoni mambo wevaAmori, mambo weHeshibhoni; nevaIsuraeri vakati kwaari, ‘Titendere tinokupota kuti tihambe ngomunyika yako kuenda kunyika yedu.’

²⁰ Asi Sihoni aazi kugonda vaIsuraeri kuti vahambe ngomunyika yake; asi Sihoni wakaunganidza pamwepo vanhu vake veshe, vakaemesa matende avo muJahazi, vakarwisana nevaIsuraeri.

²¹ Zvino Mambo Mwari, Mwari waIsuraeri, wakapira Sihoni nevanhu vake veshe munyara dzevaIsuraeri, navo vakavauraya; ndizvo ngokudaro vaIsuraeri vakagara nhaka yenyika yeshe yevaAmori, vagari veiyo nyika.

²² Vakagara nhaka yenyika yeshe yevaAmori, kubvira Arinoni metsa kuguma Jabhoki, nokubvira kushango metsa kuguma Jorodhani.

²³ Ndizvo zvino Mambo Mwari, Mwari waIsuraeri, wakadzinga vaAmori kubva pamberi pevanhu vake vaIsuraeri. Ndizvo zvino iwewe unoda kugara nhaka yavo ngenyi?

²⁴ Auzogari here nhaka yenyika younopuwa ngechimwari chako Khemoshi kuti uigare nhaka? Isusu atisisiriwo here kugara nhaka yeizvo zveshe zvaakanyisa Mambo Mwari, Mwari wedu, kuita zvedu?

²⁵ Zvino iwewe uri wakapinda kunaka here kunaBharaki mukororo waZiphori, mambo weMoabhi? Iye wakamboitirana hasha nevaIsuraeri here, nokuti kurwisana navo here?

²⁶ Naapo vaIsuraeri vachagara muHeshibhoni nomumaguta aro, nomuAroeri nemaguta aro, nomumadhorobha eshe akateererana nemigano yeArinoni, kupedza makore mazana matatu (300), ngenyi usikazi kupetudzazve kwouri ngepakati pouwo mukuwo?

²⁷ Ndizvo andina chendakashaisha kwouri, asi iwewe unondiitira zvakashata ngokurwisana neni. Asi Mambo Mwari uwo uri mutongi ngaaite mutongi pakati pevaIsuraeri nevaAmoni.”

²⁸ Asi mambo wevaAmoni aazi kupurutana mazwi aJefetha, aakatuma kwaari.

²⁹ Zvino Mweya waMambo Mwari wakauya padera paJefetha, naye wakahamba Gireadhi naManase. Wakahamba Mizipha reGireadhi, nokubva Mizipha reGireadhi wakahamba kuenda kuvaAmoni.

³⁰ Jefetha wakapika mhiko kunaMambo Mwari echiti, “Kudai ngegwinyiso wechizopira vaAmoni munyara dzangu,

³¹ ndizvo kunyazwi ndiani unozobuda kubva kumisiwo yemhatso yangu, kuuya kooshongana neni, apo ndopetuka ngokunyarara kubva kuvaAmoni, ngegwinyiso unozoita waMambo Mwari, neni ndinozomupira kuita mudiro wokupisha.”

³² Ndizvo Jefetha wakaambuka kuenda kunevaAmoni koorwa navo; naMambo Mwari wakavapira munyara dzake.

³³ Wakavabaya kubvira Aroeri, metsa kuguma Minithi, madhorobha makumi mairi, metsa kuguma Abherikeramimu, ngokuurawa kukurutu. Uku ngokudaro ndikwo kunyiswa kwevaAmoni pamberi pevaIsuraeri.

Mwanasikana waJefetha

³⁴ Zvino Jefetha wakauya Mizipha kumhatso yake; kwakabuda kooshongana naye mwanasikana wake anemakandira, echizvina. Naye waiya mwana wake ega; ngepabanze pake waiya asina mukororo nokuti mwanasikana.

³⁵ Apo amuona wakabaura zvokusimira zvake, akati, “Ihehe, mwanasikana wangu! Iwewe warwadzisa mwoyo wangu kakurutu, newe waita umwe weavo vanonditambudza, ngokuti ndakabeura muromo wangu kunaMambo Mwari kupika, neni andingarekeri kuchiita.”

³⁶ Iye wakati kwaari, “Baba vangu, kudai mwakabeura muromo wenyu kunaMambo Mwari, itai kwendiri kudai ngeicho chakabuda kubva kumuromo wenyu, kwechioneka kuti Mambo Mwari wamupa kuunzidzira magaa enyu, vaAmoni.”

³⁷ Naye wakati kunababa ake, “Ichi chiro ngachiitwe kwendiri. Ndirekere mwedzi miiri, kuti ndihambe apo naapo padera pemitunhu, ndichemere umhandara hwangu, inini neshamwari dzangu.”

³⁸ Naye wakati, “Enda.” Naye wakamuendesa mwedzi miiri. Ndizvo wakaenda neshamwari dzake, wakachemera umhandara hwake padera pemitunhu.

³⁹ Ngokupera kwomwedzi miiri, wakapetuka kunababa ake, avo vakaita kwaari kudai ngokupika kwemhiko yavo yaakapika. Naye aazi kumbozia mwamuna. Nakwo kwakabuda mushuma muIsuraeri

⁴⁰ wokuti vanasikana vaIsuraeri vaienda gore ngegore kuchiriro chomwanasikana waJefetha muGireadhi mazuva marongomuna ngegore.