Varoma 9 - Bhaibheri Rakachena muChindau

Mwari neVanhu vake

¹ Ndinoronza gwinyiso ndiKristu, andinyepi; mhumba yangu inondiitira chapupu muMweya Wakachena,

² kuti ndinotambudzika kakurutu nokurwadziwa kusina magumo mumwoyo wangu.

³ Ngokuti ndaizoda kuti inini ndemene ndiite wakatukwa newakaparadzaniswa kubva kunaKristu ngendaa yehama dzangu, idzo dziri hama dzedzinza rangu.

⁴ Ndivo vaIsuraeri, kwavari wakavaita vana vake, vanouthende, zvitenderano, nokupuwa kwoMupango, kudira nezvigondiso;

⁵ ndiwo madzibaba mukuru avo, kubudikidza ndivo Kristu wakabarwa ngokwenyama, uwo uri padera pazveshe, Mwari ngaakudzwe mhera nariini! Ameni.

⁶ Asi azvironzi kuti izwi raMwari rakakorera. Ngokuti andivopi veshe akadi avo vakabva kunaIsuraeri vanoita vanhu vaIsuraeri,

⁷ andivopi veshe vanoita vana vaAbrahama; asi, “Kubudikidza ndiIsaka mibarirwana inozodudzwa.”

⁸ Izvi zvinoronza kuti andivopi vana vakabarwa ngokwenyama vanoita vana vaMwari, asi vana vechigondiso ndivo vanoerengwa kuti mibarirwana.

⁹ Ngokuti iri ndiro izwi rechigondiso rinoti, “Ngouyu mukuwo ndinozopetuka naSara unozoa nomukororo.”

¹⁰ Izvi andizvopi zvega zvakadaro; asi Rebheka naye apo aiya aanemimba ngemwamuna umwe, ndiIsaka baba edu,

¹¹ kunyazwi vana vasati vabarwa nokuti vasati vaita zvakanaka nokuti zvakashata, kuti zano raMwari rokutsanangura rigwinyiswe,

¹² haiwa ngemishando asi ngendaa yokudaidza kwake, kwakaronzwa kwaari, kuti, “Mukuru unozoshandira mudoko.”

¹³ Kudai ngezvakanyorwa zvinoti, “Jakobe ndakamuda, asi Isau ndakamuzonda.”

¹⁴ Zvino tinozotinyi? Kuripo kusikarurama here kunaMwari? Haiwa!

¹⁵ Ngokuti unoti kunaMosi, “Ndinozomuitira nyasha wendinoda kuitira nyasha, nokukungurira wendinoda kukungurira.”

¹⁶ Ndizvo azviiti ngokuda kwomunhu nokuti ngokuita kwomunhu, asi ngenyasha dzaMwari.

¹⁷ Ngokuti zvinyorwa zvinoti kunaFaro, “Ngeiyi ndaa ndakakuemesa kuti ndionise simba rangu mwouri, nokuti zina rangu riteketeswe munyika dzeshe.”

¹⁸ Ndizvo unoitira nyasha kwaari weshe waanoda kuitira nyasha, naye unokonzesa mwoyo wouwo weshe waanoda.

Nyasha noUshungu hwaMwari

¹⁹ Zvino unozoti kwendiri, “Ngenyi iye achiri kutsvaka ndaa? Ngokuti ndiani ungakona kuambana nokuda kwake?”

²⁰ Asi iwewe urianani, munhu, unopingurana naMwari? Chiro chakaumbwa chingaronza here kunouwo wakachiumba kuti, “Wakandiumba kudai ngenyi?”

²¹ Muumbi aana simba here padera pedongo, kubva pachimburumbwa chimwecho kuumba chidziyo chimwe chemishando inoremeredzeka nechimweni chemishando isikaremeredzeki?

²² Kungaanenyi kudai Mwari, echida kuonisa ushungu hwake nokuita kuti simba rake riziikanwe, akashingirira ngokusengerera kukurutu kumidziyo youshungu yakaemeserwa kuparadzwa,

²³ kuitira kuti aziise upfumi hwouthende hwake kumidziyo yenyasha, iyo yakanasirirwa uthende karetu,

²⁴ kunyazwi isusu avo vaakadaidza, haiwa vanobva kuvaJudha vega asi navozve vanobva kumadzinza?

²⁵ Kudai ngezvaakaronza mutsamba yaHosea echiti, “Avo vaiya vasiri vanhu vangu ndinozovadaidza kuti, ‘Vanhu vangu,’ nouwo waiya asikadikanwi ndinozomudaidza kuti, ‘Mudikani wangu.’

²⁶ Kunozoitika kuti pandau paakaronza kwavari kuti, ‘Amuri vanhu vangupi,’ vanozodaidzwa kuti, ‘Vana vaMwari unopona.’ ”

²⁷ NaIsaya wakadaidzira ngendaa yevaIsuraeri kuti, “Kunyazwi uwandu hwevana vaIsuraeri hwechinyazodai ngejecha roruandhle, vakasara vavo ndivo vanozoponeswa;

²⁸ ngokuti Mambo Mwari unozozadzisa izwi rake munyika echiripedzisa ngokukasira.”

²⁹ Kudai ngezvaakaronza Isaya karetu echiti, “Kudai Mambo Mwari wehondo asikazi kutisiira mibarirwana, tingadai takaitwa kudai ngeSodhoma nokudai ngeGomora.”

Kusikagonda kwaIsuraeri

³⁰ Ndizvo zvino, tinozotinyi? Kuti vemadzinza avo vasikazi kuteera kururama vakahanira kururama, ndikwo kuti, kururama kubudikidza ngokugonda;

³¹ asi Isuraeri echiteera mupango wokururama aazi kuhanira mupango uwo.

³² Ngenyi? Ngokuti avazi kukutsvaka ngokugonda, asi kudai ngounohanira ngemishando. Vakapumhunwa ngebuwe rokupumhunisa,

³³ kudai ngezvakanyorwa kuti, “Ringirai, ndinoradzika buwe muZioni rokupumhuna, ruware runozovaita kuti vawe, nouwo unotenda kwaari aazotsverudzwi.”