Varoma 8 - Bhaibheri Rakachena muChindau

Kupona muMweya

¹ Ndizvo zvino akuchina kuitirwa ndaa kwavari vari munaKristu Jesu.

² Ngokuti mupango woMweya wokupona munaKristu wakandisunhura kubva kunemupango wokushaisha neworufu.

³ Ngokuti Mwari wakaita izvo zvewaiya usikakoni kuita Mupango, ngendaa yokupera simba kwawo kubudikidza ngenyama; Mwari wakatuma Mukororo wake ari mumuemo wenyama ino kushaisha ngendaa yokushaisha, iye wakaitira ndaa kushaisha kuri munyama,

⁴ kuti kururama kwoMupango kuzarisike mukati mwedu, isusu tisikahambi ngezvenyama asi ngezvoMweya.

⁵ Ngokuti avo vanopona ngezvenyama vanoemesa mipinimidzo yavo kuzviro zvenyama, asi avo vanopona ngezvoMweya vanoemesa mipinimidzo yavo kuzviro zvoMweya.

⁶ Ngokuti kuemesa mupinimidzo kuzviro zvenyama kufa, asi kuemesa mupinimidzo kuzviro zvoMweya kupona nokunyarara.

⁷ Ngokuti mupinimidzo wezvenyama kuambana naMwari; ngokuti aupfairi Mupango waMwari, ngegwinyiso aungakoni;

⁸ naavo vari munyama avangamudakadzi Mwari.

⁹ Asi imwimwi amuri munyamapi, asi mwaa muMweya, kudai ngegwinyiso Mweya waMwari wechigara mukati mwenyu. Kunyazwi ndiani usina Mweya waKristu, uyu aasiri wake akadi.

¹⁰ Asi kudai Kristu ari mukati mwenyu, kunyazwi muiri wakafa ngendaa yokushaisha, Mweya unopona ngendaa yokururama.

¹¹ Kudai Mweya wouwo wakamusa Jesu kubva kwevakafa wechigara mukati mwenyu, uwo wakamusa Kristu kubva kwevakafa unozoponesazve miiri yenyu inofa ngoMweya wake unogara mukati mwenyu.

¹² Ndizvo zvino, hama, tine zvikwereti, haiwa kunyama, kuti tipone ngezvenyama,

¹³ ngokuti kudai mwechipona ngezvenyama munozofa, asi kudai ndiMweya mwechiuraya zviito zvomuiri munozopona.

¹⁴ Ngokuti veshe vanotungamirirwa ndiMweya waMwari ava vana vaMwari.

¹⁵ Ngokuti amuzi kuashira Mweya wouhloko kuti mutyezve, asi mwakaashira Mweya kuti muite vana vaMwari, ndiwo tinochema techiti, “Abha! Baba!”

¹⁶ Mweya emene unoita chapupu pamwepo nomweya wedu kuti isusu tiri vana vaMwari;

¹⁷ kudai tiri vana, tiri vanogara nhaka, vanogara nhaka yaMwari, naavo vanogara nhaka pamwepo naKristu, kudai ngegwinyiso techitambudzwa pamwepo naye kuti tikudzwewo pamwepo naye.

Uthende Huchauya

¹⁸ Ngokuti ndinoerenga kuti madambudziko omukuwo uno aasisiri kuedzaniswa nouthende uhwo hunozooniswa kwetiri.

¹⁹ Ngokuti ngokushuwira kukurutu zvakasikwa zvinogarira kuoniswa kwevana vaMwari;

²⁰ ngokuti zvakasikwa zvakapfaiswa kunezvisina shwiro, haiwa ngokuda kwazvo asi ngokuda kwouwo wakaita kuti zvipfaiswe mukugonda;

²¹ ngokuti zvakasikwa zvemene zvinozosunhurwa kubva muuranda hwokuora kupotera mukusunhurika kwouthende hwevana vaMwari.

²² Ngokuti tinozia kuti zvakasikwa zveshe zvinogomera pamwepo mukurwadziwa kudai ngekwokubara metsa nazvino.

²³ Andizvopi zvega zvisikwa, asi isusuwo pachedu, avo vane michero yokutanga yoMweya, tinogomera mukati mwedu techigarira kuitwa vana vaMwari, kusunhurwa kwemiiri yedu.

²⁴ Ngokuti takaponeswa ngokugonda. Asi kugonda ukwo kunooneka akusiri kugonda akadi. Ngokuti ndiani unogonda icho chaanoona?

²⁵ Asi kudai tine gonda reicho chetisikaoni, tinozochigarira ngokusengerera.

²⁶ Ngokudaro Mweya unotidetsera mukurembedzeka kwedu; ngokuti atizii njira inosisira yokukumbira ndiyo, asi Mweya emene unoita muemeri ngokugomera kusikabviri kuronzwa.

²⁷ Mwari unoringisisa mwoyo unozia mupinimidzo woMweya, ngokuti Mweya unokumbirira vakacheneswa kudai ngokuda kwaMwari.

²⁸ Nesu tinozia kuti zveshe zvinoshanda pamwepo kuita zvakanaka kwavari avo vanomuda Mwari, avo vakadaidzwa kudai ngokuemesa kwake.

²⁹ Ngokuti avo vaakazia ngekaretu wakavaemesa ngekaretu kuti vatodzaniswe nomuemo woMukororo wake, kuti iye aite dangwe pakati pehama dzakawanda.

³⁰ Naavo vaakaemesa ngekaretu wakavadaidzawo; naavo vaakadaidza wakavaruramisawo; naavo vaakaruramisa wakavakurisawo.

Rudo rwaMwari munaKristu Jesu

³¹ Ndizvo tinozotiyi kuneizvi? Kudai Mwari echitirwira, ndiani unozorwisana nesu?

³² Iye usikazi kuramba noMukororo wake, asi wakamupa ngendaa yedu teshe, aazotipi ngenyasha zviro zveshe zvaanazvo here?

³³ Ndiani unozoitira ndaa vakatsanangurwa vaMwari? NdiMwari unopembedza.

³⁴ Ndiani unozoitira ndaa? NdiJesu Kristu wakafa, eya, wakamuswa kubva kwevakafa, uwo uri ngokumudyo kwaMwari, uwozve unotikumbirira.

³⁵ Ndiani unozotiparadzanisa norudo rwaKristu? Madambudziko here, nokuti kurwadziwa, nokuti kutambudzwa, nokuti nzara, nokuti kutama zvokupfeka, nokuti ngozi, nokuti shoti?

³⁶ Kudai ngezvakanyorwa, “Ngendaa yako tinourawa zuva reshe; takaerengwa tiri vakadai ngemakwai akaemeserwa kuurawa.”

³⁷ Haiwa, muizvi zveshe tiri vanopinda vanyisi kubudikidza ndiye uwo wakatida.

³⁸ Ngokuti ndinaro gwinyiso kuti kunyazwi rufu nokuti kupona, nokuti ngirosi, nokuti umambo, nokuti zviri pano, nokuti zvinouya, nokuti masimba,

³⁹ nokuti urebu, nokuti udzamu, nokuti chiro chimweni chakasikwa, achingakoni kutiparadzanisa norudo rwaMwari ruri munaKristu Jesu Mambo wedu.