Varoma 7 - Bhaibheri Rakachena muChindau

Muedzaniso Unobva muKuroorana

¹ Amuzii here, hama, ngokuti ndinoereketa kuneavo vanozia mipango, kuti mipango inotonga padera pomunhu mukuwo wega waanopona?

² Ngokuti mukadzi unomwamuna unosungwa ngomupango kunomwamuna wake achapona; asi kuti mwamuna wake afa, unosunhurwa kubva kumupango wemwamuna wake.

³ Ndizvo kudai apo mwamuna wake achapona, akagara nemwamuna umweni, unozozwi muombi. Asi kuti mwamuna wake afa, iye unosunhurwa kubva kumupango, ndizvo aachazozwi muombi kunyazwi akagara nomwamuna umweni.

⁴ Ndizvo, hama dzangu, imwimwiwo mwakafa kuMupango kubudikidza ngomuiri waKristu, kuti muite vemunhu uwo wakamuswa kubva kwevakafa, kuti tiberekere Mwari michero.

⁵ Ngokuti apo petaiya munyama, kuemura kwokushata, kwakamuswa ngendaa yoMupango, kwakashanda munhengo dzomuiri wedu kukabudisa michero inounza rufu.

⁶ Asi zvino isusu takasunhurwa kubva kuMupango, takafa kuneizvo zvaiya zvakatiita vasungwa, ndizvo zvino atishandi tiri hloko pashi pemitemo yekaretu yakanyorwa, asi tiri mundaramo itsva yomweya.

Mupango neChishaishi

⁷ Ndizvo tinozotinyi? Mupango kushaisha here? Haiwa! Asi kudai waiya usiri mupango ndaizodai ndisikazi kuzia kushaisha. Ngokuti ndaizodai ndisikazi kuzia kuemura kudai mupango usikazi kuti, “Usazoemura.”

⁸ Asi kushaisha, kwechiona njira muzvironzo, kwakashanda mukati mwangu mbeu dzeshe dzokuemura. Ngokuti ngepabanze peMupango kushaisha kwakafa.

⁹ Neni ndaipona ngepabanze peMupango karetu, asi apo kwaguma zvironzo, kushaisha kwakamuswa

¹⁰ neni ndakafa, nomupango uwo waigondisa kupona, uyu ndakauona wechiita rufu kwendiri.

¹¹ Ngokuti kushaisha, kwechiona njira kubudikidza ngezvironzo, kwakandichengedzera nokubudikidza ndizvo kwakandiuraya.

¹² Ndizvo Mupango wakachena, nezvironzo zvakachena, zvakarurama zvakanaka.

¹³ Ndizvo izvo zviri zvakanaka zvakaita rufu kwendiri here? Haiwa! Asi ndikwo kushaisha, kunounza rufu kwendiri kubudikidza ngeicho chakanaka, kuitira kuti kushaisha kuoneke kuti kushaisha, ngokubudikidza ngezvironzo kuite kwakanyanyisisa kushata.

Kurwisana kwoMukati mwoMunhu

¹⁴ Ngokuti tinozia kuti Mupango ngewoMweya; asi inini ndiri wenyama, ndakatengeswa pashi pokushaisha.

¹⁵ Inini andizwisisi zvendinoita. Ngokuti andiiti izvo zvendinoda, asi ndinoita izvo zvendinonyenya.

¹⁶ Zvino kudai ndechiita zvendisikadi, ndinotendera kuti Mupango wakanaka.

¹⁷ Ndizvo zvino andinipi ndinoita kudaro, asi kushaisha kunogara mukati mwangu.

¹⁸ Ngokuti ndinozia kuti amuna zvakanaka zvinogara mukati mwangu, izvo zvinoronza munyama yangu. Ngokuti kuda kurimwo mukati mwangu, asi kuita zvakanaka amuna akadi.

¹⁹ Ngokuti zvakanaka zvendinoda kuita andizviiti, asi kushata kwendisikadi ndikwo kwendinoita.

²⁰ Zvino kudai ndechiita zvendisikadi, andinipi ndinozviita, asi kushaisha kunogara mukati mwangu.

²¹ Ndizvo ndinoona zvakaita mupango kuti apo ndooda kuita zvakanaka, kushata kundoripo pendiri.

²² Ngokuti ndinodakara muMupango waMwari ngomunhu womukati mwangu,

²³ asi ndinoona mupango umweni uri munhengo dzangu, wechiambana nomupango mumupinimidzo wangu wechindiisa muuranda kumupango wokushaisha uri munhengo dzangu.

²⁴ Munhu unotambudzika wakadai ndini! Ndiani unozondinunurira kubva kunouyu muiri worufu?

²⁵ Ngaabongwe Mwari kubudikidza ndiye Jesu Kristu Mambo wedu! Ndizvo zvino, inini ndemene ngomupinimidzo wangu ndiri hloko yoMupango waMwari, asi ngenyama yangu ndiri hloko yemipango yokushaisha.