Varoma 6 - Bhaibheri Rakachena muChindau

Kufa noKumuka naJesu

¹ Ndizvo tinozotinyi? Tondogara mukushaisha here kuti nyasha dziwanzwe?

² Haiwa! Isusu takafa kuzvishaishi tingachaita maponerenyi mukati mwazvo?

³ Nokuti amuzii here kuti isusu teshe takabhabhatidzwa munaKristu Jesu takabhabhatidzirwa murufu rwake?

⁴ Ndizvo takaikwa pamwepo naye ngokubhabhatidzwa murufu, ndizvo kudai ndiKristu akamuswa kubva kwevakafa ngouthende hwaBaba, ngokudaro isusuwo tihambe mukupona kutsva.

⁵ Ngokuti kudai takabatanidzwa pamwepo naye murufu rwakadai ngorwake, ngegwinyiso tinozobatanidzwa naye mukumuka kwakadai ngokwake;

⁶ techizia kuti munhu wedu wekare wakakohomerwa pamwepo naye kuti muiri wokushaisha upere, kuti isusu tisachazoita varanda vokushaisha.

⁷ Ngokuti uwo wafa wapembedzwa kubva kuzvishaishi.

⁸ Asi kudai isusu takafa pamwepo naKristu, tinogonda kuti tinozoponazve naye.

⁹ Ngokuti tinozia kuti Kristu amuswa kubva kwevakafa aachatongofizve; rufu aruchazotongi padera pake.

¹⁰ Ngokuti rufu rwaakafa, wakafa kuzvishaishi kamwe kega; asi ndaramo yaanopona, unopona kunaMwari.

¹¹ Ndizvo ngokudaro mwechidzierenga nemwi kuti muri vakafa kuzvishaishi, asi kuti munopona kunaMwari munaKristu Jesu.

¹² Ndizvo musatendera kuti kushaisha kutonge mumiiri yenyu inofa, kuti mupurutane kuemura kwayo.

¹³ Zve, musapa zvemiiri yenyu kuita midziyo inoshandiswa kuita zvisikazi kururama, asi dzipirenyi kunaMwari kudai ngevanhu vakamuswa kubva kwevakafa, nezvemiiri yenyu kuita midziyo yokushanda zvokururama kunaMwari.

¹⁴ Ngokuti kushaisha akuzotongi padera penyu akadi, ngokuti imwimwi amusiri pashi peMipango asi pashi penyasha.

Hloko dzoKururama

¹⁵ Zvino chiinyi? Tinozoshaisha here ngokuti atisiri pashi peMupango asi pashi penyasha? Haiwa!

¹⁶ Amuzii here kuti uwo womunodzipa kwaari kuita hloko dzinopurutana, munoita hloko dzouwo womunopurutana, kunyazwi dzokushaisha kunoisa murufu nokuti dzokupurutana kunoisa mukururama?

¹⁷ Asi ngaabongwe Mwari kuti kunyazwi imwimwi mwaiya hloko dzokushaisha, mwakaita vanopurutana ngomwoyo weshe kugwinyiso rinooneka mudzidziso yakapuwa kwomuri,

¹⁸ nokuti imwimwi, mwechisunhurwa kubva mukushaisha, mwakaita hloko dzokururama.

¹⁹ Ndinoereketa ngomushuma wevanhu, ngendaa yokutama simba kwenyu muchibarirwe. Ngokuti kudai ngezvemwakapira nhengo dzemiiri yenyu kuita hloko dzokusikasukika nedzokushaisha kuti muite zvakashata yaamho, ndizvo zvino mwechipira nhengo dzemiiri yenyu kuita hloko dzokururama kunomuita vakacheneswa.

²⁰ Naapo pemwaiya hloko dzokushaisha, mwaiya mwakasunhurwa kubva kundaa dzokururama.

²¹ Ndizvo zvino mwaiya nemichero yakaitawani ngouwo mukuwo kubva kuneizvo zviro zvomunotsveruka ndizvo? Ngokuti magumo azvo rufu.

²² Asi zvino mwasunhurwa kubva mukushaisha mwaita hloko dzaMwari, munemichero yenyu inoita kuti mucheneswe, nemagumo enyu kupona kusikaperi.

²³ Ngokuti misharo yokushaisha kufa, asi chipo chenyasha dzaMwari kupona kusikaperi munaKristu Jesu Mambo wedu.