Varoma 5 - Bhaibheri Rakachena muChindau

Michero yoKupembedzwa

¹ Ndizvo, kudai ngezvetinopembedzwa ngokugonda, tino kunyarara naMwari kubudikidza ndiMambo wedu Jesu Kristu.

² Kubudikidza ndiye takapotedzwa ngokugonda munyasha idzi dzetinoema mukati mwadzo, nesu tinoganza mukugonda ngokuwa nouthende hwaMwari.

³ Andizvopi zvega, asi tinoganza mumadambudziko edu, techizia kuti kutambudzika kunobara kusengerera

⁴ nokusengerera kunobara kurovedzera, nokurovedzera kunobara kugonda,

⁵ nokugonda akutitsverudzi, ngokuti rudo rwaMwari rwakadururwa mumwoyo yedu kubudikidza ndiMweya Wakachena wakapuwa kwetiri.

⁶ Ngokuti apo petaiya tisina simba, ngomukuwo wakasisira Kristu wakafira vasikatendi Mwari.

⁷ Ngokuti zvakakonza kuti munhu afire munhu wakarurama, kunyazwi pamweni umwe ungashingirira kufira munhu wakanaka.

⁸ Asi Mwari unoonisa rudo rwake kwetiri ngokuti apo tichiri vashaishi Kristu wakatifira.

⁹ Kakurutu zvino, takapembedzwa ngengazi yake, tinozoponeswa ndiye kubva kuushungu hwaMwari.

¹⁰ Ngokuti kudai apo taiya magaa takaiyaniswa kunaMwari kubudikidza ngokufa kwoMukororo wake, kakurutu tiri vakaiyaniswa, tinozoponeswa ngendaramo yake.

¹¹ Andizvopi zvega, asi tinoganzazve kunaMwari kubudikidza ndiye Mambo wedu Jesu Kristu, zvino kubudikidza ndiye takaashira kuiyaniswa.

Adhamu naKristu

¹² Ndizvo kudai ngezvokwakapotera kushaisha munyika kubudikidza ngomunhu umwe norufu rwakauya kubudikidza ngokushaisha, ngokudaro rufu rwakagumira vanhu veshe ngokuti veshe vakashaisha;

¹³ ngegwinyiso kushaisha kwaiyapo munyika Mupango usati waapo, asi kushaisha akuerengwi apo pasina Mupango.

¹⁴ Asi rufu rwakatonga kubvira kunaAdhamu metsa kuguma kunaMosi, kunyazwi nokwavari vasikazi kushaisha ngenjira yaakapauka ndiyo Adhamu, uwo waiya muedzaniso wouwo waiya echizouya.

¹⁵ Asi chipo chenyasha achizi kuedzaniswa nokupauka. Ngokuti kudai vazhinji vakafa ngokupauka kwomunhu umwe, kakurutu nyasha dzaMwari nechipo chenyasha chomunhu umwe, Jesu Kristu, chakawanziswa kune vazhinji.

¹⁶ Asi chipo chenyasha achizi kuedzanisirwa uwo wakashaisha. Ngokuti kutongwa kwakaguma ngoumwe kwakaunza kurashwa, asi chipo chenyasha chakauya ngokupauka kwavazhinji kuti kupembedzwe.

¹⁷ Kudai, ngokuti munhu umwe wakashaisha, rufu rwakatonga kubudikidza ngomunhu umwe, kakurutu avo vanoashira ngokuwanda kwenyasha nechipo chokururama vanozotonga mukururama kubudikidza ngomunhu umwe, Jesu Kristu.

¹⁸ Ndizvo kudai kupauka kwoumwe kwakaunza kurashwa kwevanhu veshe, ndizvo kubudikidza ngokuita kwomunhu umwe wakarurama chipo chenyasha chakatungamirira vanhu veshe mukupembedzwa nomukupona.

¹⁹ Ngokuti ngokusikapurutana kwomunhu umwe vazhinji vakaitwa vashaishi, ngokudaro ngokupurutana kwomunhu umwe vazhinji vanozoitwa vakarurama.

²⁰ NoMupango wakapotera kuti kushaisha kuwande; asi apo kushaisha kwawanzwa, nyasha dzakapinda kakurutu kuwanzwa,

²¹ ndizvo, kudai kushaisha kwakatonga kubudikidza ngorufu, nyasha dzinotongawo kubudikidza ngokururama kunotungamirira kupinda mukupona kusikaperi kubudikidza ndiye Jesu Kristu Mambo wedu.