Varoma 4 - Bhaibheri Rakachena muChindau

Chionero chaAbrahama

¹ Ndizvo tinozotinyi ndiAbrahama, baba edu ngokwenyama?

² Ngokuti kudai Abrahama akapembedzwa ngemishando, unacho chokuganza ndicho, asi haiwa pamberi paMwari.

³ Ngokuti zvinyorwa zvinotinyi? “Abrahama wakagonda Mwari, kwakaerengerwa kwaari kuti kuri kururama.”

⁴ Zvino kwaari unoshanda, muthuso wake auerengwi kuti chipo, asi kuti muthuso.

⁵ Asi kwaari usikashandi asi iye unogonda kunouwo unopembedza vasikadi Mwari, kugonda kwake kunoerengerwa kwaari kuti kururama.

⁶ Dhavhidhawo unofumisa munhu uwo waakaerengera Mwari kuti kururama ngepabanze pemishando

⁷ echiti, “Vanomuchena avo vane zvinyangadzo zvavo zvakarekererwa, nezvishaishi zvavo zvakafishwa;

⁸ unomuchena munhuwo waasikaerengi Mambo kuti uno kushaisha.”

⁹ Ndizvo chifumiso ichi ngechevakachekwa here nokuti kunevasikazi kuchekwawo? Ngokuti tinoti, “Kuna Abrahama kugonda kwake kwakaerengerwa kwaari kuti wakarurama.”

¹⁰ Ndizvo kwakaita maerengerwenyi kwaari? Zvakaitika achekwa here nokuti asati achekwa? Haiwa achekwa, asi asati achekwa.

¹¹ Wakaashira kuchekwa kuita chioniso chinogwinyisa kururama kwokugonda ukwo kwaaiya anakwo asati achekwa, kuti aite baba weavo veshe vanotenda, kunyazwi vasina kuchekwa, kuti kuerengerwe kwavari kuti vakarurama,

¹² nokuti aite baba vevakachekwa haiwa vevakachekwa vega asi veavozve vanohamba muzvitsiko zvokugonda kwavaiya vanakwo baba edu Abrahama apo vaiya vasati vachekwa.

Chigondiso chaMwari Chinoashirwa ngoKugonda

¹³ Ngokuti chigondiso chokuti unozogara nhaka yenyika achizi kuitwa kunaAbrahama nokuti kunevana vake kubudikidza ngoMupango akadi, asi chakaitwa kubudikidza ngokururama kwokugonda.

¹⁴ Ngokuti kudai avo veMupango vari vanogara nhaka, kugonda kwaitwa kusina shwiro nechigondiso chinoita chisina shwiro.

¹⁵ Ngokuti Mupango inounza ushungu, asi apo pasina Mupango apana kupauka.

¹⁶ Ndiyo ndaa kwechiitwa ngokugonda, kuitira chigondiso kuti chiitwe ngenyasha, chigwinyiswe kumibarirwana yeshe, haiwa kwavari veMupango, asi nokwavari avo vanokoanisirana kugonda kwaAbrahama, uri baba edu teshe,

¹⁷ kudai ngezvakanyorwa, “Ndakakuita baba wemadzinza akawanda” mukuona kwaMwari uwo waakatenda, unomusa vakafa echidaidza izvo zvisipo kudai ngezviripo.

¹⁸ Abrahama wakatenda Mwari kunyazwi paiya pasina chizato chaiita kuti agonde, ngokudaro wakaita baba wemadzinza akawanda, kudai ngezvaakaronzerwa kuti, “Mubarirwana wako unozowanda.”

¹⁹ Aazi kurembedzeka mukugonda, apo paakapinimidza ngomuiri wake uwo waiya wakadai ngowakafa, anemakore anoda kuita zana, nokuti ngokufa kwechibereko chaSara.

²⁰ Akuna kugononda kwakamuita kuti apere simba ngechigondiso chaMwari, asi wakagwinyiswa mukugonda kwake echikudza Mwari,

²¹ echigwinyisa kakurutu kuti Mwari unokona kuita icho chaakagondisa.

²² Ndiyo ndaa yakaita kuti kugonda kwake, “Kuerengerwe kwaari kuti kururama.”

²³ Zvino akuzi kunyorwa ngendaa yake yega kuti, “Kwakaerengerwa kwaari kuti kururama,”

²⁴ asi ngendaa yeduwo. Kunozoerengerwa kudaro kwetiri isusu tinotenda kwaari uwo wakamusa Jesu Mambo wedu kubva kunevakafa,

²⁵ uwo wakapirwa ngendaa yezvishaishi zvedu, echimuswazve kuitira kupembedzwa kwedu.