Varoma 3 - Bhaibheri Rakachena muChindau

¹ Ndizvo muJudha unenyi chaanopinda vamweni ndicho? Nokuti kuchekwa kunodetserenyi?

² Kakurutu ngenjira dzeshe. Kutanga ndivo vaJudha vakapuwa mazwi aMwari.

³ Ndizvo kunozoitikenyi kudai vamweni vavo vasikazi kugondeka? Kusikagondeka kwavo kunozoita here kuti kugondeka kwaMwari kuite kusina shwiro?

⁴ Haiwa! Mwari ngaaoneke ari gwinyiso, kunyazwi munhu weshe munyepi, kudai ngezvakanyorwa, “Kuti iwewe upembedzwe ngemazwi ako nokunyisa mukutongwa kwako.”

⁵ Asi kudai kusikarurama kwedu kwechionisa kururama kwaMwari, tinozotinyi? Mwari uri usikazi kururama here, uwo unounzidzira ngoushungu? (Ndinoereketa kudai ngomunhu.)

⁶ Haiwa! Ngokuti kudai zvakadaro Mwari ungazoita matongerenyi nyika?

⁷ Asi kudai gwinyiso raMwari rechiwanzwa ngokunyepa kwangu, kuita kukudzwa kwake, ngenyi inini ndichatongwa kudai ngomushaishi?

⁸ Atironzi ngenyi (kudai ngokureyiwa kwedu nokudai ngezvevanoronza vamweni tisu kuti tinoti), “Ngatiite zvakashata kuti kunaka kuuye?” Avo kurashwa kwavo kunovasisira!

Akuna Wakarurama

⁹ Zvino chiinyi? Isusu vaJudha tirinane kuvapinda here? Haiwa, azvizi kudaro; ngokuti ngepamberi tambotonga kuti vanhu veshe, vaJudha nevaGiriki, vari pashi pesimba rokushaisha,

¹⁰ kudai ngezvakanyorwa kuti, “Apana naumwe wakarurama, haiwa, apana naumwe;

¹¹ apana naumwe unozwisisa, apana naumwe unotsvaka Mwari.

¹² Veshe vakapauka, veshe pamwepo vakaita vasina shwiro; apana naumwe unoita zvakanaka, haiwa, apana naumwe.”

¹³ “Mikuro yavo iiba rakabeuka; ngorurumi rwavo vanochengedzera.” “Uroyi hwechianzo huri pashi pemiromo yavo.”

¹⁴ “Miromo yavo yakazara ngokutuka nokuvava.”

¹⁵ “Tsoka dzavo dzinohambisa kuenda kooparadza ngazi;

¹⁶ kuparadzwa nokutambudzika zviri munjira dzavo,

¹⁷ nenjira yokunyarara avazi kuizia.”

¹⁸ “Apana kutya Mwari pamberi pemadziso avo.”

¹⁹ Zvino tinozia kuti kunyazwi ngechiri chinoronzwa ngoMupango chinoereketwa kwavari vari pashi peMupango, kuti miromo yeshe inyaradzwe, nenyika yeshe iuye mukutonga kwaMwari.

²⁰ Ngokuti akuna munhu naumwe ungapembedzwa pamberi pake ngemishando yoMupango, ngokuti kubudikidza ngoMupango kushaisha kwakaziikanwa.

Kururama kubudikidza ngoKugonda

²¹ Asi zvino kururama kwaMwari kwakaoniswa ngepabanze peMupango, kunyazwi Mupango nevaprofeti zvinoita chapupu ndizvo,

²² kururama kwaMwari kunouya kubudikidza ngokugonda Jesu Kristu kwavari veshe vanotenda. Ngokuti apana muparadzaniso,

²³ ngokuti veshe vakashaisha avahaniri kuuthende hwaMwari;

²⁴ vechipembedzwa ngenyasha dzake ngokuripirwa kuri munaJesu Kristu,

²⁵ uwo waakaemesa Mwari kuita mudiro wokuiyanisa, ngokugonda, ngengazi yake, kuti kuashirwe ngokugonda. Uku ndikwo kunoonisa kururama kwaMwari, ngokuti mukusengerera kwake wakafuratira zvishaishi zvakaitwa ngepamberi.

²⁶ Kwaiya kuonisa ngouyu mukuwo kuti iye pachake wakarurama nokupembedza uwo unotenda munaJesu.

²⁷ Zvino kuganza kwedu kunoitenyi? Kwakabviswa. Ngomupango uri? Ngomupango wemishando here? Haiwa! Asi ngomupango wokugonda.

²⁸ Ngokuti tinotenda kuti munhu unopembedzwa ngokugonda ngepabanze pemishando yoMupango.

²⁹ Zve Mwari ndiMwari wevaJudha vega here? Andiyepi Mwari wevemadzinzawo here? Eya, uri wevemadzinzawo.

³⁰ Mwari ndiumwe ega; naye unozopembedza vakachekwa kubudikidza ngokugonda nevasikazi kuchekwa kubudikidza ngokugonda.

³¹ Ndizvo tinorekeredza Mupango ngokugonda uku here? Haiwa! Asi tinogwinyisisa Mupango.