Varoma 2 - Bhaibheri Rakachena muChindau

Kutonga kwaMwari

¹ Ndizvo auchaiti usina ndaa, kunyazwi ndiani unotonga umweni; ngokuti ngeicho chounotonga umweni ndicho unodziitira ndaa ndicho, ngokuti iwewe, mutongi, unondoita zviro ndizvo ndizvo.

² Tinozia kuti kutonga kwaMwari kunegwinyiso kunowira padera paavo vanoita zviro zvakadaro.

³ Iwe munhuwe, unotonga avo vanoita zviro zvakadaro, asi newe wechiitawo zvakadaro, unopinimidza kuti iwewe unozopokonyoka kutonga kwaMwari here?

⁴ Nokuti unoshoora here upfumi hwenyasha dzake nokushingirira nokusengerera, usikazii kuti nyasha dzaMwari dzinokukweera kuti utenderuke?

⁵ Asi ngokukonza nokusikatenderuka kwomwoyo wako unodziunganidzira pachako ushungu pazuva roushungu, apo panozooniswa kutonga kwakarurama kwaMwari.

⁶ Uwo unozounzidzira kumunhu weshe kudai ngemishando yake;

⁷ kwavari avo ngokusengerera vanoita zvakanaka mukutsvaka uthende nokuremeredzwa nokusikaori, unozovapa kupona kusikaperi;

⁸ asi kwavari vanodzida vasikapurutani gwinyiso, asi vanopurutana zvisikazi kururama, kunozoapo ushungu nokutseneka.

⁹ Kunozoapo kutambudzika nokurwadziwa padera pomunhu weshe unoita zvakashata, kutanga kuvaJudha nokuvaGirikiwo,

¹⁰ asi uthende nokuremeredzwa nokunyarara kunozoa kunomunhu weshe unoita zvakanaka, kutanga kuvaJudha nokuvaGiriki navo.

¹¹ Ngokuti kunaMwari akuna mukheto.

¹² Ngokuti avo veshe vakashaisha vasina Mupango vanozofawo vasina Mupango, navo veshe vakashaisha vari pashi peMupango vanozotongwa ngeMupango.

¹³ Ngokuti andivopi vazwi veMupango vanozopembedzwa pamberi paMwari, asi vaiti veMupango vanozopembedzwa.

¹⁴ Naapo vemadzinza avo vasina Mupango vanodziitira zvinodiwa ngeMupango, ava kunyazwi vasina Mupango vari mipango pachavo.

¹⁵ Vanoonisa zvinodiwa ngeMupango zvakanyorwa mumwoyo yavo, naapo mwoyo yavo inoita chapupu nawo nemipinimidzo yavo umwe ngaumwe inovaitira ndaa nokuti kuvapembedza,

¹⁶ ngeiro zuva raanozotonga ndiro Mwari zvakafishika zvevanhu, ndiye Kristu Jesu, kudai ngevhangeri rangu.

VaJudha neMupango

¹⁷ Asi kudai iwewe wechidzidaidza pachako kuti uri muJudha, wechigonda Mupango nokuganza ndiMwari,

¹⁸ wechizia kuda kwake, wechikona kutsara izvo zvakapinda kunaka, ngokuti unodzidziswa muMupango,

¹⁹ newe unegwinyiso kuti uri mutungamiriri wemapofu, nokujeka kwaavo vari muchidima,

²⁰ nomupangi wemapenzi, nomudzidzisi wevana, iwewe muMupango une chiemo chokuzia nechegwinyiso,

²¹ ndizvo iwewe unodzidzisa vamweni, audzidzidzisi here? Iwewe unochumaira kuti munhu asazoba, unoba here iwewe?

²² Iwewe unoti munhu asazoomba, unoomba here iwewe? Iwewe unonyenya miedzaniso inodirwa, unoba here zvakacheneswa mumatemperi?

²³ Iwewe unodziganzisa ngeMupango, ngokugura kwako Mupango, unoita here kuti Mwari asaremeredzwa?

²⁴ Ngokuti, kudai ngezvakanyorwa kuti, “Zina raMwari rinotukwa pakati pevemadzinza ngendaa yenyu.”

²⁵ Ngokuti ngegwinyiso kuchekwa kunodetsera kudai uri muiti weMupango; asi kudai uri muguri weMupango, kuchekwa kwako kunoita kusikachekwi.

²⁶ Ndizvo, kudai avo vasikazi kuchekwa vechingwarira zviemeso zveMupango, kusikachekwa kwavo akuzoerengwi here kuti kuri kuchekwa?

²⁷ Zvino avo vasikazi kuchekwa kuri chibarirwe kudai vechingwarira Mupango avazokutongi iwewe uneMupango yakanyorwa nokuchekwa asi unogura Mupango.

²⁸ Ngokuti andiyepi muJudha emene unooneka akadaro ngokubanze, nokuti kuchekwa ukwo kuri kwokubanze kwomuiri.

²⁹ Asi muJudha ndiye uri muJudha ngomukati, nokuchekwa kwemene kwomumwoyo, kunoitwa mumweya andikwopi kwezvakanyorwa. Kukudzwa kwake akubvi kuvanhu asi kunobva kunaMwari.