Varoma 15 - Bhaibheri Rakachena muChindau

Dakadzai Vamweni, Haiwa paChenyu

¹ Isusu takagwinya tinosisira kutwara kurembedzeka kwevasina simba, haiwa kuti tidzidakadze pachedu.

² Umwe ngaumwe wedu ngaadakadze muakirwana wake ngezvakanaka, zvinomuaka.

³ Ngokuti Kristu aazi kudzidakadza pachake; asi, kudai ngezvakanyorwa, “Kutuka kweavo vakakutuka iwewe kwakawira padera pangu.”

⁴ Ngokuti kunyazwi ngezviri zvakanyorwa karetu zvakanyorwa kuti isusu tidzidze, kuti kubudikidza ngokusengerera nokuembedzerwa kwezvinyorwa tiwe nokugonda.

⁵ Mwari wokusengerera nowokuembedzera ngaamupe kuti muite mupinimidzo umwewo umwe kunoumweni, kudai ngezvinoda Kristu Jesu,

⁶ kuti muri pamwepo ngeizwi rimwe mukudze Mwari naBaba aMambo wedu Jesu Kristu.

Mashoko Akanaka kuvaJudha nokuVanhu veMadzinza

⁷ Ndizvo ashiranai umwe noumweni, kudai ndiKristu wakamuashirawo kuti Mwari akudzwe.

⁸ Ngokuti ndinomuronzera kuti Kristu wakaitwa muranda kune vakachekwa kuti aonise gwinyiso raMwari, kuti agwinyisise zvigondiso zvakagondiswa kumadzibaba,

⁹ nokuitira kuti madzinza akudze Mwari ngendaa yenyasha dzake. Kudai ngezvakanyorwa kuti, “Ngeiyi ndaa ndinozomukudza pakati pevemadzinza, ndiembere kukudzwa kwezina renyu.”

¹⁰ Zve unoti, “Dakarai, imwimwi vemadzinza, pamwepo nevanhu vake.”

¹¹ Zve, “Kudzai Mambo Mwari, imwimwi mweshe vemadzinza, vanhu veshe ngavamukudze.”

¹² Zve Isaya unoti, “Runzinde rwaJese runozouya, nouwo unozomiruka kutonga padera pevemadzinza; vemadzinza vanozogondera mwaari.”

¹³ Zvino Mwari wokugonda ngaamuzarise ngokudakara kweshe nokunyarara mukutenda, kuti kubudikidza ngesimba roMweya Wakachena muwe negonda rinofashukira.

Chizato Chakaita kuti Phauri Anyore ngoKushinga

¹⁴ Inini ndemene ndinonasa kuzia ndimwi, hama dzangu, kuti imwimwi mwemene mwakazara ngokunaka, mwakazara ngokuzia kweshe, munokonazve kupangana umwe kunoumweni.

¹⁵ Asi ndakanyora kwomuri ngokushinga yaamho ngezviro zvimweni, kumukarakadzisa ngendaa yenyasha dzakapuwa kwendiri ndiMwari,

¹⁶ kuti ndiite mushandiri waKristu Jesu kunevemadzinza mumushando woupristi muvhangeri raMwari, kuti vemadzinza vangaita mudiro unoashirika, wakacheneswa ndiMweya Wakachena.

¹⁷ Ndizvo ndinakwo kuganza ngomushando wangu munaKristu Jesu ngezviro zvaMwari.

¹⁸ Ngokuti andizoshingi kuereketa ngezviro zvimweni kwega ngeizvo zvaakaita Kristu kubudikidza ndini kuitira kuti vemadzinza vapurutane, ngeizwi nomushando,

¹⁹ ngesimba rezvioniso nemishamiso, ngesimba roMweya waMwari, kuti kubvira ngeJerusarema nokunharaunda dzaro metsa kuguma Iririkomu ndakanasa kuchumaira vhangeri raKristu.

²⁰ Eya, ngokudaro ndakadisisa kuchumaira vhangeri pandau dzisaiziikanwa zina raKristu, kuti ndisazoaka padera petsikiro roumweni munhu,

²¹ asi kudai ngezvakanyorwa kuti, “Vanozoona avo vasikazi kuronzerwa mashoko ndiye, naavo vanozozwisisa uwo wevasikazi kuzwa ndiye.”

Urongwa hwaPhauri hwoKuhambira Roma

²² Iyi ndiyo ndaa yakandipinga kazhinji kuti ndisauya kwomuri.

²³ Asi zvino, ndisina ndau yokushanda kuneidzi nyika, ndinodisisa ngaaya makore akawanda kuti ndiuye kwomuri.

²⁴ Ndinogonda kuti ndinozomuona apo ndoopinda kuenda Sipeini, nokuperekedzwa ndimwi parwendo rwangu, apo ndambodakara pamwepo nemwi kamukuwo kadoko.

²⁵ Asi zvino, eya, ndinoenda Jerusarema kooshandira vakacheneswa vaMwari.

²⁶ Ngokuti zvakavadakadza avo veMasedhonia neveAkhaiya kupa zvipo kunevarombo vari pakati pevakacheneswa muJerusarema.

²⁷ Vakadakara kuzviita, ngegwinyiso ivo vane chikwereti kwavari; ngokuti kudai vemadzinza vakauya vakakoanisirana navo zvifumiso zvavo zvoMweya, ivo vanosisirawo kuvashandira ngezviro zvevanotama zvomuiri.

²⁸ Ndizvo apo ndapedza kuita izvi nokuvaunzira michero iyi yakaunganidzwa, ndinozopinda kuenda Sipeini ngekwenyuyo;

²⁹ neni ndinozia kuti apo ndoouya kwomuri, ndinozouya ngokufumiswa kwakazara kwaKristu.

³⁰ Zvino ndinomupota, hama, ndiMambo wedu Jesu Kristu norudo rwoMweya, kuti mutambudzike pamwepo neni mumikumbiro yenyu kunaMwari ngendaa yangu,

³¹ kuti ndinunurwe kubva kunevasikatendi vari muJudhia, nokuti nomushando wangu kuneveJerusarema uashirike kunevakacheneswa vaMwari,

³² ndizvo kuti ngokuda kwaMwari ndingauya kwomuri ngokudakara kuti ndizorore pamwepo nemwi.

³³ Zvino Mwari wokunyarara ngaagare nemwi mweshe. Ameni.