Varoma 14 - Bhaibheri Rakachena muChindau

Usatonga Umweni

¹ Ashirai munhu wakarembedzeka mukugonda, muashirenyi, asi musikaphikisani naye ngendaa yemipinimidzo.

² Munhu umwe unogonda kuti ungadya zviro zveshe, asi munhu wakarembedzeka unodya miriwo yemashakani.

³ Iye unodya asashoora usikadyi, naye usikadyi asatonga unodya; ngokuti Mwari wakamuashira.

⁴ Urianani iwewe unotonga muranda woumweni? Zviri pamberi pamambo wake kuti aeme nokuti kuwa. Asi unozoema, ngokuti Mambo unesimba rokuita kuti aeme.

⁵ Munhu umweni unoremeredza zuva rimwe kupinda rimweni, umweni unoremeredza mazuva eshe kuti akatodzana. Munhu weshe ngaanase kuzia mumupinimidzo wake.

⁶ Uwo unongwarira zuva, unoringwaririra kukudza Mambo. Nouwo unodya, unodyira kukudza Mambo ngokuti unobonga Mwari; apo uwo usikadyi, aadyiri kukudzwa kwaMambo naye unobonga Mambo.

⁷ Ngokuti apana naumwe wedu unodziponera pachake ega, apanazve unodzifira pachake ega.

⁸ Ngokuti kudai techipona, tinoponera Mambo, nokuti dai techifa, tinofira Mambo; ndizvo zvino, kunyazwi techipona nokuti techinyafa, tiri vaMambo.

⁹ Ngokuti ngeiyi ndaa Kristu wakafa akaponazve, kuti aite Mambo wevakafa nevanopona.

¹⁰ Ngenyi iwewe wechiitira ndaa hama yako? Nokuti iwewe unoshoora ngenyi hama yako? Ngokuti isusu teshe tinozoema pamberi pechigaro chokutonga chaMwari.

¹¹ Ngokuti kwakanyorwa kuti, “Kudai ngezvendinopona, unoronza Mambo Mwari, mabvi eshe anozondigwadamira nendimi dzeshe dzinozokudza Mwari.”

¹² Ndizvo umwe ngaumwe wedu unozodzipingurira kunaMwari.

Usaita kuti Hama yako Iwe

¹³ Ndizvo tisachaitirana ndaa umwe kunoumweni, asi zvirinane kuti mugure kuti asazoapo munhu unoisa chipumhuniso munjira yehama yake nokuti kuita kuti iwe.

¹⁴ Ndinozia neni ndinoongiwa munaMambo Jesu kuti akuna chiro chinosvipisa mwechiri pachacho; asi chinoita chakasvipiswa kwaari unopinimidza kuti chakasvipiswa.

¹⁵ Ngokuti kudai hama yako yechisvipiswa mwoyo ngendaa yokudya kwako, ngokudaro auchahambi ngorudo. Usamuuraya ngokudya kwako uwo waakafira Kristu.

¹⁶ Ndizvo musatendera kuti kunaka kwenyu kuereketwe ndikwo kuti kwakashata.

¹⁷ Ngokuti umambo hwaMwari andihwopi hwokudya nokuti kumwa, asi kururama nokunyarara nokudakara muMweya Wakachena.

¹⁸ Kunyazwi ndiani unoshandira Kristu ngokuita izvi unoashirika kunaMwari nokuashirikazve kunevanhu.

¹⁹ Ndizvo ngatitsvake izvo zvinounza kunyarara neizvo zvetingagwinyisana ndizvo umwe kunoumweni.

²⁰ Musaparadza mushando waMwari ngendaa yezvokudya. Ngegwinyiso zviro zveshe zvakacheneswa, asi zvakashata kunyazwi kunaani unoita kuti vanhu vamweni vawe ngezvaanodya;

²¹ kwakanaka kurekera kudya nyama nokurekera kumwa vhini nokuti kurekera kuita chiro chimweni chinoita kuti hama yako ipumhunwe.

²² Kugonda kwounakwo, ngakugare pakati pako naMwari. Unomuchena usikadziitiri ndaa pazviro zvaanotendera.

²³ Asi uwo unogononda watoitirwa ndaa, kudai echidya, ngokuti aaiti ngokugonda; ngokuti kunyazwi ngechiri chisikaitwi ngokugonda kushaisha.