Varoma 13 - Bhaibheri Rakachena muChindau

Purutanai Vatongi

¹ Munhu weshe ngaapfaire madzimambo anotonga padera pake. Ngokuti akuna umambo usikazi kubva kunaMwari, navo varipo vakagadzwa ndiMwari.

² Ndizvo iye unoemesedzana noumambo, unorwisana neicho chaakaemesa Mwari, naavo vanorwisa vanodzitorera kutongwa.

³ Ngokuti vatongi avatyisi kwavari vanoita mishando yakanaka, asi kwavari vanoita zvakashata. Unoda kuita usikatyi mambo here? Ita zvakanaka newe unozokudzwa ndiye;

⁴ ngokuti iye muranda waMwari kwouri unokuitira zvakanaka. Asi kudai wechiita zvakashata, wechitya, ngokuti iye aateri kutwara shoti pasina chiro! Ngokuti muranda waMwari muunzidziri woushungu kunouwo unoita zvakashata.

⁵ Ndizvo munosisira kuti muvapfaire, haiwa ngendaa youshungu hwega, asi ngendaazve yemhumba.

⁶ Ngeiyi ndaa munobhadharazve chibharo, ngokuti madzimambo varanda vaMwari, vanogara vechiita izvi zviro.

⁷ Bhadharai kwavari veshe izvo zvinovasisira; chibharo kwavari vechibharo, murimwa kwavari vomurimwa, mwechitya vanotyiwa, remeredzai avo vanosisira kuremeredzwa.

Rudo kuneUmwe noUmweni

⁸ Musaita chikwereti chechiro kumunhu, kwega kuti mudane umwe noumweni; ngokuti iye unomuda muakirwana wake wakazadza Mupango.

⁹ Ngokuti Mupango unoti, “Usazoomba, usazouraya, usazoba, usazoemura,” neimweni mipango inoerengerwa pamwepo neizwi iri rokuti, “Unozomuda muakirwana wako kudai ngezvounodzida iwewe pachako.”

¹⁰ Rudo arushandi zvakashata kunomuakirwana; ndizvo rudo ruri kuzadza Mupango.

Tinosisira Kurinda

¹¹ Nemwi munozia awa kuti zvino yaanguva yaamho yokuti mumuke kubva muhope. Ngokuti zvino ruponeso rwedu rwaapasinde kwetiri kunomukuwo wetakatenda;

¹² usiku hwapera, kuedza kwaapasinde. Ndizvo ngatirashe mishando yechidima, ngatipfeke chihlangu chokujeka.

¹³ Ngatihambe ngenjira inosisira kudai ngevanohamba masikati, tisikahambi ngouhaya nokudhakwa, tisikahambi ngokushanja, nokuti ngokuemura kunotsverudza, tisikahambi ngehasha nendurumwa.

¹⁴ Asi mupfeke Mambo Jesu Kristu, musikatsvaki kudakadza nyama pakuemura kwayo.