Varoma 12 - Bhaibheri Rakachena muChindau

Kupona kwoKushandira Mwari

¹ Ndizvo ndinomupota, hama, ngenyasha dzaMwari, kuti mupire miiri yenyu kuita mudiro unopona, wakachena nounoashirika kunaMwari, uri mushando wenyu wokudira uneshwiro.

² Musatodzera zveiyi nyika, asi mwechitsandurwa ngokumusirirwa kwomupinimidzo wenyu, kuti mutsvakisise kuzia kuda kwaMwari, kwakanaka, kunoashirika nekwakaperera.

³ Ngokuti kubudikidza ngenyasha dzakapuwa kwendiri ndinoti kuno munhu weshe uri pakati penyu, asadzipinimidza iye pachake kupinda kupinimidza kunosisira, asi kuti apinimidze ngokutonga kwakangwara, kudai ngezvaakapa Mwari kunomunhu weshe kudai ngechipimo chokutenda kwake.

⁴ Ngokuti kudai ngezvetinadzo nhengo dzakawanda mumuiri umwe, andidzopi dzeshe nhengo dzine mushando umwewo,

⁵ ndizvo isusu, tiri vazhinji, tiri muiri umwe munaKristu, umwe ngaumwe inhengo umwe kunoumweni.

⁶ Tine zvipo zvakaparadzana, kudai ngenyasha dzakapuwa kwetiri: kudai chinyari chokuprofeta, ngatiprofete kudai ngokukura kwokugonda kwedu;

⁷ kudai uri mushando, ngazvioneke mukushandira; kudai ngomudzidzisi, ngazvioneke mukudzidzisa;

⁸ kudai ngomupangi, ngaazvioneke mukupanga; kudai ngomupi, ngazvioneke mukupa ngenyasha; kudai ngomutongi, ngaatonge ngokungwara; kudai ngomuiti wenyasha, ngaaite ngokudakara.

Rudo rweGwinyiso

⁹ Rudo ngaruite rusina kudziitisa; nyenyai izvo zvakashata, batirirai kuneizvo zvakanaka;

¹⁰ dananai umwe kunoumweni ngorudo rukuru; muremeredzane umwe kunoumweni.

¹¹ Shandai ngesimba, musaita nungo. Itai vanopisha mumweya, mwechishandira Mambo.

¹² Itai vanodakara mukugonda kwenyu, musengerere mumadambudziko, mwechiangirira mukukumbira.

¹³ Koveranai nevakacheneswa zvevanotama, ashirai vapfumba.

¹⁴ Fumisai vanomutambudza; vafumisenyi musavatuka.

¹⁵ Dakarai naavo vanodakara, mwechichema naavo vanochema.

¹⁶ Garai mukunyarara umwe kunoumweni; musatsvaka zvine mbiri, asi mwechihamba pamwepo nevakapfaa; musadziita vakangwara mumipinimidzo yenyu.

¹⁷ Musaunzidzira munhu kushata ngendaa yokuitirwa zvakashata, asi tsvakai zvakarurama mukuona kwevanhu veshe.

¹⁸ Kudai zvechiitika, ngepomunokona ndipo, garai mukunyarara nevanhu veshe.

¹⁹ Musaunzidzira pachenyu, vanodikana, asi taraukirai ushungu hwaMwari; ngokuti kwakanyorwa kuti, “Kuunzidzira ngekwangu, inini ndinozounzidzira, unoronza Mambo Mwari.”

²⁰ Haiwa, “Kudai gaa rako rafukama, wechiripa zvokudya; kudai rine nyota, wechiripa zvokumwa; ngokuti ngokuita kudaro unozoisa murwi wemasimbe anopisha omuriro padera pesoro raro.”

²¹ Musanyiswa ngokushata, asi nyisai kushata ngokunaka.