Varoma 11 - Bhaibheri Rakachena muChindau

Nyasha dzaMwari kunaIsuraeri

¹ Ndinobvunza zvino, Mwari wakaramba vanhu vake here? Haiwa! Ngokuti inini pachangu ndiri muIsuraeri, wedzinza raAbrahama, wemhatso yaBhenjamini.

² Mwari aazi kuramba vanhu vake vaakazia ngekaretu. Amuzii here izvo zvinoronza zvinyorwa ndiErija, ngenjira yaakapota ndiyo kuna Mwari kuitira vaIsuraeri ndaa?

³ “Mambo Mwari, vakauraya vaprofeti vako, vakaputsira pashi maarita ako; inini ndini ndega ndasara, navo vanotsvaka kundiuraya.”

⁴ Asi mupinguro waMwari unotinyi kwaari? “Ndakadzisiira makumi emazana manomwe evanhu vasikazi kugwadamira Bhaari ngemabvi avo.”

⁵ Ndizvo ngomukuwo unozve varipo vakasara, vakatsanangurwa ngenyasha.

⁶ Asi kuti kuri kwenyasha, akuchiri kwemishando akadi; kuti zvakadaro nyasha adzichazi kuita nyasha.

⁷ Ndizvo chiinyi? Icho chaakatsvaka Isuraeri aazi kuchiona. Vakatsanangurwa vakachiona, asi vamweni veshe vakakonziswa.

⁸ Kudai ngezvakanyorwa kuti, “Mwari wakavapa mweya wokukangaidzwa, wakavapa madziso okuti vasaona nenzee dzokuti vasazwa, metsa kuguma kuneiri zuva.”

⁹ Dhavhidha unoti, “Tafura ravo ngariite murau nechirimbana, ngavawe nokuunzidzirwa kwavo;

¹⁰ madziso avo ngaaitiswe rubuma, kuti vasaona, uvakopfamise mishana yavo nguva dzeshe.”

Ruponeso rweveMadzinza

¹¹ Ndizvo ndinobvunza kuti, vakapumhunwa here kuti vawe? Haiwa! Asi kubudikidza ngokushaisha kwavo ruponeso rwakauya kunevemadzinza, kuvamusira godo.

¹² Zvino kudai kushaisha kwavo kwechiita upfumi hwenyika, nokukorera kwavo kwechiita upfumi hwevemadzinza, kuzara kwouwandu hwavo kunozopinda kwakaitawani!

¹³ Asi ndinoereketa kwomuri imwimwi vemadzinza. Kwechioneka zvino kuti inini ndiri mupostori wevemadzinza, ndinokudza mushando wangu,

¹⁴ kuti pamweni ndingaita kuti vanhu vangu vaIsuraeri vaite godo, kuti ndikone kuponesa vamweni vavo.

¹⁵ Ngokuti kudai kurashwa kwavo kuri kuiyaniswa kwenyika, kuashirwa kwavo kunozoronzenyi? Kunozoita kupona kunevakafa!

¹⁶ Kudai hlama yakapirwa kuita michero yokutanga yakacheneswa, ngokudarozve hlama yeshe yakachena; kudai nzinde yakachena, ndizvo nenhai dzakachenawo.

¹⁷ Asi kudai nhai dzimweni dzakagurwa, newe, uri muorivhi womushango, wakabatanidzwa mukati mwadzo, ukakoanisirana nadzo kunaka kwomuorivhi,

¹⁸ usaganza padera penhai. Kudai wechiganza, iwewe andiwepi unotwara nzinde, asi nzinde ndiyo inotwara iwewe.

¹⁹ Ndizvo unozoti, “Nhai dzakagurwa kuti inini ndibatanidzwe.”

²⁰ Zvakanaka. Dzakagurwa ngendaa yokugononda kwadzo, asi iwewe unoema kubudikidza ngokugonda. Usadzikudza mumupinimidzo wako, asi itya.

²¹ Ngokuti kudai Mwari asikazi kurekera nhai dzepo, aazokurekeri newewo.

²² Ndizvo ringira nyasha noushungu hwaMwari: ushungu hwakaoniswa kwavari vakawa, asi dzakaoniswa nyasha dzaMwari kwouri, kudai wechizoangira kugara munyasha dzake; pamweni newe ungazotemwawo.

²³ Kunyazwi naavo vaIsuraeri, kudai vasikaangiri kugara mukugononda kwavo, vanozobatanidzwa, ngokuti Mwari unesimba rokuvabatanidzazve.

²⁴ Ngokuti kudai iwewe wakatemwa kubva kumuorivhi womushango pakusikwa nokubatanidzwa, ngenjira yakaparadzana pakusikwa, mukati mwomuorivhi womumunda, kunozopinda kwakaitawani idzi dziri dzepo kuti dzibatanidzwe kumuorivhi wadzo.

VaIsuraeri Veshe Vanozoponeswa

²⁵ Ngokuti andidi, hama, kuti muite vasikazii ngeichi chakafishika; kuti musadziita vakangwara mumipinimidzo yenyu, ngokuti vaIsuraeri vamweni vakagumirwa ngokutindiara kwomwoyo, metsa kugume kuzarisika kwouwandu hwevemadzinza.

²⁶ Ndizvo vaIsuraeri veshe vanozoponeswa; kudai ngezvakanyorwa, “Kunozobuda Mununuri kubva muZioni; iye unozodusa kusikatya Mwari kubva kunaJakobe.”

²⁷ “Neichi chinozoita chitenderano changu navo, apo pendinozodusa zvishaishi zvavo.”

²⁸ Ngendaa yevhangeri vari magaa a Mwari, ngendaa yenyu; asi ngendaa yokutsanangurwa vari vanodikanwa ngendaa yemadzibabamukuru avo.

²⁹ Ngokuti zvipo nokudaidza kwaMwari zviri zvisikakunukudzwi.

³⁰ Kudai ndimwi ngemikuwo yakapinda mwaiya vasikapurutani kunaMwari, asi zvino mwakaashira nyasha ngokusikapurutana kwavo,

³¹ ndizvo zvino vari vasikapurutani kuitira kuti ngenyasha idzo dzaoniswa kwomuri vangaashirawo nyasha.

³² Ngokuti Mwari wakavakonyera veshe mukusikapurutana, kuti avaitire nyasha veshe.

Ngaakudzwe Mwari

³³ Kukuranyi kwakaita upfumi noungwaru noruziyo rwaMwari! Ndiani ungakona kududzira zvitongero zvake nenjira dzake adzingazwisisiki!

³⁴ “Ngokuti ndiani wakazia mupinimidzo waMambo Mwari? Nokuti ndiani wakaita mupangi wake?”

³⁵ “Nokuti ndiani wakamupa chipo kutanga kuti azopuwawo chipo?”

³⁶ Ngokuti kubva kwaari nokubudikidza ndiye nekwaari zviro zveshe zvakasikwa ngezvake. Kwaari ngakuapo uthende husikaperi. Ameni.