Varoma 10 - Bhaibheri Rakachena muChindau

¹ Hama, chidisiso chomwoyo wangu nokukumbira kwangu kunaMwari ngendaa yevaIsuraeri kuti vaponeswe.

² Ngokuti ndinovaitira chapupu kuti vanotsamwirira kunaMwari, asi vanoita ngokusikazia.

³ Ngokuti, vasikazii kururama kunobva kunaMwari, vechitsvaka kuemesa kururama kwavo, avazi kudzipfaisa pashi pokururama kwaMwari.

⁴ Ngokuti Kristu ndiye magumo oMupango, kuti weshe unogonda aruramiswe.

Ruponeso ngerweVeshe

⁵ Mosi unonyora ngendaa yokururama kunobva kuMupango echiti, “Munhu uwo unoita kururama kweMipango, unozopona ndiyo.”

⁶ Asi kururama ukwo kunobva mukugonda kunoronza kuti, “Usaereketa mumwoyo mwako kuti, ‘Ndiani unozokwira mudenga?’ ” (ukwo kunoti, kudzasa Kristu pashi).

⁷ “Nokuti, ‘Ndiani unozodzaka mukudzama?’ ” (ukwo kunoti, kumubudisa Kristu kubva kunevakafa).

⁸ Asi zvinoronzenyi? “Izwi riri pasinde pako, pamuromo pako nomumwoyo mwako” (ndikwo kuti, izwi rokugonda retinochumaira);

⁹ ngokuti kudai wechipupura kuti Jesu ndiMambo ngomuromo wako nokutenda mumwoyo mwako kuti Mwari wakamumusa kubva kunevakafa, unozoponeswa.

¹⁰ Ngokuti munhu unotenda ngomumwoyo wake naye unoruramiswa, naye unopupura ngomuromo wake unoponeswa.

¹¹ Ngokuti zvinyorwa zvinoti, “Kunyazwi ndiani unotenda mwaari aazotsverudzwi.”

¹² Ngokuti akuna muparadzaniso pakati pomuJudha nomuGiriki; ngokuti Mambo umwewo ndiye Mambo wavo veshe unodururira upfumi hwake padera pavo veshe vanokumbira kwaari.

¹³ Ngokuti, “Kunyazwi ndiani unokumbira ngezina raMambo unozoponeswa.”

¹⁴ Asi vangazoita makumbirirenyi kwaari uwo wevasikazi kutenda? Zve, vangazoita matenderenyi kwaari uwo wevasikazi kuzwa ndiye? Zve, vangazoita mazwirenyi pasina muchumairi?

¹⁵ Vangazoita machumairirenyi kuti vasikazi kutumwa? Kudai ngezvakanyorwa kuti, “Manakirenyi akaita tsoka dzaavo vanochumaira mashoko akanaka!”

¹⁶ Asi andivopi veshe vakapurutana vhangeri; ngokuti Isaya unoti, “Mambo Mwari, ndiani wakatenda izwi redu?”

¹⁷ Ndizvo kugonda kunouya ngokuzwa, nokuzwa kunouya ngeizwi raKristu.

¹⁸ Asi ndinobvunza, avazi kuzwa here? Eya, ngegwinyiso vakazwa; “Izwi ravo rakabuda kuenda panyika peshe, nemazwi avo akaguma kumagumo enyika.”

¹⁹ Asi ndinobvunzazve, vaIsuraeri avazi kuzwisisa here? Pakutanga Mosi unoti, “Ndinozomuita kuti muite ndurumwa ngavanhu vasiri dzinza; ngedzinza risina kungwara ndinozomutsenesa.”

²⁰ Naapo Isaya asingatyi unoti, “Ndakaoneka ngaavo vasikazi kunditsvaka; ndakadzionisa kwavari vasikazi kubvunza ndini.”

²¹ Asi kuvaIsuraeri unoti, “Zuva reshe ndakatambanudzira nyara dzangu kunevanhu vasikapurutani nevanoramba.”