Varoma 1 - Bhaibheri Rakachena muChindau

Kuchingamidza

¹ Phauri, muranda waJesu Kristu, wakadaidzwa kuita mupostori, wakaemeserwa vhangeri raMwari,

² iro raakagondisa karetu kubudikidza ngevaprofeti vake muzvinyorwa zvakachena,

³ ngendaa yoMukororo wake, wakabarwa kubva kurudzi rwaDhavhidha ngokwenyama,

⁴ wakaoniswa ngesimba kuti Mukororo waMwari ndimweya wokuchenesa ngokumuka kwake kubva kwavakafa, Jesu Kristu Mambo wedu,

⁵ kubudikidza ndiye takaashira nyasha noupostori kuti tiunze kupurutana kwokugonda pakati pamadzinza eshe ngendaa yezina rake,

⁶ nemwiwo muri pakati pavo mwakadaidzwa kuita vaJesu Kristu.

⁷ Kwavari veshe vari muRoma vanodikanwa ndiMwari, vakadaidzwa kuita vakacheneswa. Nyasha kwomuri nokunyarara kunobva kunaMwari Baba wedu naMambo Jesu Kristu.

Mukumbiro woKubonga

⁸ Pakutanga, ndinobonga Mwari wangu kubudikidza ndiye Jesu Kristu ngendaa yenyu mweshe, ngokuti kugonda kwenyu kunochumairwa munyika dzeshe.

⁹ Ngokuti Mwari uwo wendinoshandira mumweya wangu muvhangeri roMukororo wake, ndiye chapupu changu, kuti ndinomukarakadza ngenguva dzeshe mumikumbiro yangu,

¹⁰ ndechikumbira ngokuda kwaMwari pakugumisira ndingabudirira kuti ndiuye kwomuri.

¹¹ Ngokuti ndine chishuwo chokuda kumuona, kuti ndingakoanisirana nemwi chimwe chezvipo zvomweya kuti mugwinyiswe,

¹² zvinoronza kuti, isusu tingagwinyisana ngokugonda kwoumwe ngaumwe wedu, kweshe kwenyu nokwangu.

¹³ Ndinoda kuti muzie, hama, kuti kazhinji ndaida kuti ndiuye kwomuri (asi ndakapingwa metsa zvino), kuti ndianemuchero umweni pakati penyu kudai ngezvendinawozve kumadzinza amweni.

¹⁴ Ndine chikwereti kwavari veshe vaGiriki nevapara, vakangwara nemapenzi;

¹⁵ ndizvo kudai ngezvendinodisisa ndakasisira kuchumaira vhangeri kwomurizve imwimwi vari muRoma.

Simba reVhangeri

¹⁶ Ngokuti andina nyowa ngevhangeri; ngokuti isimba raMwari rokuponesa veshe vanotenda, kutanga kuvaJudha nokuvaGirikiwo.

¹⁷ Ngokuti mukati mwaro rinoonisa kururama kwaMwari kubva mukugonda kuenda mukugonda; kudai ngezvakanyorwa, “Uwo wakarurama kubudikidza ngokugonda unozopona.”

Ndaa yoMunhu Weshe

¹⁸ Ngokuti ushungu hwaMwari hunooniswa hwechibva mudenga kurwa nazvo zveshe zvisikasisirani naMwari nokusikarurama kwevanhu vanotsikirira gwinyiso ngokusarurama.

¹⁹ Ngokuti izvo zvinoziikanwa ngevanhu ngendaa yaMwari zviri pamhene kwavari, ngokuti Mwari wakazvionisa kwavari.

²⁰ Ngokuti kubvira pakusikwa kwenyika zviro zvake zvisikaoneki, zvechiziikanwa kudai ngezviro zvakasikwa, zvinoti, simba rake remhera nariini noUmwari hwake, zvinonasa kuoneka. Ndizvo avachaiti vasina ndaa;

²¹ ngokuti kunyazwi vechimuzia Mwari avazi kumuremeredza kudai ndiMwari nokuti kumubonga, asi vakaita vasina shwiro mumipinimidzo yavo nemwoyo yavo isina kungwara yakaita chidima.

²² Vechidziita vakangwara, vakaita mapenzi;

²³ vakatenganisana uthende hwaMwari husikaori kuti vaashire muemo womuedzaniso womunhu unoora nokuti weshiri nokuti wemhuka dzine mirenje mirongomuna nokuti wezvinotamanda.

²⁴ Ndizvo Mwari wakavarekera mukuemura kwomwoyo yavo kutsvina, kuti vadzishaishire miiri yavo pakati pavo pachavo,

²⁵ vakatenganisa gwinyiso raMwari kuti vaashire manyepo nokudira nokushandira icho chakasikwa pandau yoMusiki, uwo unomuchena mhera nariini! Ameni.

²⁶ Ngeiyi ndaa Mwari wakavarekera mukuemura kwavo kunotsverudza. Ngokuti nevakadzi vavo vakatenganisana chibarirwe kuita izvo zvinosiyana nechibarirwe,

²⁷ ngokudarowo vamuna navo vechirekera chibarirwe chavo nevakadzi, vakatsva ngokuemurana kwavo umwe kunoumweni, vamuna vechiita nevamuna izvo zvisikasisiri, vechiashira mukati mwavo ukwo kuthuswa kunosisira kupauka kwavo.

²⁸ Kudai ngezvevasikazi kuona zvakanaka kugara vasikazii Mwari, Mwari wakavarekera mukupinimidza kunonyangadza nokuita zviro zvisikasisiri.

²⁹ Vaiya vakazadzwa ngokusikarurama kweshe, kuomba, kuboka, kuitirana zvakashata. Vakazadzwa ngendurumwa, kuuraya, hasha, kuchengedzera, kushatisisa, kureya,

³⁰ kushonyongora, kunyenya Mwari, kudada, kudzikudza, kuganza, kutanda zvakashata, kusikapurutana vabari,

³¹ mapenzi, vasikagondeki, vasina rudo kuhama, vasina nyasha.

³² Kunyazwi vechizia chiemeso chaMwari chinoti avo vanoita zvakadaro vanosisira kufa, avateri kuita izvi zvega, asi vanotenderazve naavo vanogara vechizviita.