Vakorose 3 - Bhaibheri Rakachena muChindau

Kupona Kutsva munaKristu

¹ Ndizvo kudai mwakamuswa pamwepo naKristu, tsvakai zviro zviri padera, apo pana Kristu, akagara ngokumudyo kwaMwari.

² Emesai mipinimidzo yenyu kunezviro zviri padera, haiwa kuzviro zviri munyika,

³ ngokuti imwimwi mwakafa, nokurarama kwenyu kwakafishwa pamwepo naKristu munaMwari.

⁴ Naapo Kristu uwo uri kurarama kwenyu ooneswa, munozoonekawo pamwepo naye muuthende.

Kupona kweKaretu noKutsva

⁵ Ndizvo urayai zviemuriro zvenyu zvenyika: kuomba, kusikasukika, kuemura kwomuiri, kudisisa zvakashata nokuemura pfuma, ukwo kuri kudira miedzaniso.

⁶ Ngendaa yeizvi zviro ushungu hwaMwari hunouya padera peavo vokusikapurutana.

⁷ Kwezviri imwimwiwo mwakahamba mukati mwazvo karetu, apo muchagara mukati mwazvo.

⁸ Asi zvino imwimwiwo rashai zviro zveshe izvi: kutseneka, ushungu, kunyenya, kutuka nokuereketa zvinotsverudza ngemiromo yenyu.

⁹ Musanyeperana, kwechioneka kuti mwakarasha munhu wekaretu nezviito zvake,

¹⁰ nemwi mwakadzipfekedza munhu mutsva, uwo unomusirirwa muruziyo kuti aedzane nomuedzaniso wouwo wakamusika.

¹¹ Apachina muGiriki nokuti muJudha, wakachekwa nokuti usikazi kuchekwa, wenyika mukanza, muSkuthia, hloko nowakasunhurika. Asi Kristu ndiye zveshe nomukati mwazvo zveshe.

¹² Ndizvo, kudai ngevakatsanangurwa vaMwari, vakacheneswa nevanodikanwa, pfekai pachenyu mwoyo wokuzwira urombo, nyasha, kunaaniswa, kupfaa nokusengerera,

¹³ mwechisengerera umwe noumweni, mwechirekererana, kuti aripo munhu unendaa kunoumweni; kudai ngezvaakamurekerera Mambo, ndizvo nemwiwo munosisira kurekererana.

¹⁴ Kupinda izvi zveshe, dzipfekedzei ngorudo, runosungira zviro zveshe pamwepo mukunyarara kwakaperera.

¹⁵ Tenderai kuti kunyarara kwaKristu kutonge mumwoyo yenyu; ndikwo kwemwakadaidzirwa mumuiri umwe. Mwechibonga.

¹⁶ Izwi raKristu ngarigare mukati mwenyu ngokuwandisa, mwechidzidzisana nokupangana umwe noumweni muungwaru hweshe; mwechibonga mumwoyo yenyu embai nduyo, ngoma nengoma dzoMweya kunaMwari.

¹⁷ Kunyazwi chiinyi chomunoita, ngeizwi nokuti ngomushando, itai zviro zveshe ngezina raMambo Jesu, mwechibonga kunaMwari Baba kubudikidza ndiye.

Ukama Hwedu muKupona Kutsva

¹⁸ Vakadzi, pfairai vamuna venyu, kudai ngezvinosisira vari muna Mambo.

¹⁹ Vamuna, idai vakadzi venyu, musaita ushungu kwavari.

²⁰ Vana, purutanai vabari venyu ngezviro zveshe, ngokuti ichi chiri mushando wenyu unodakadza Mambo.

²¹ Madzibaba, musatsenesa vana venyu, kuti mwoyo yavo isazopera simba.

²² Hloko, purutanai madzimambo enyu omunyika ngezviro zveshe, haiwa ngokurindwa, kudai ngevanodakadzisa vanhu, asi ngomwoyo weshe, mwechitya Mambo.

²³ Kunyazwi chiinyi chomunoita, shandai ngomwoyo, kudai ngevanoshandira Mambo, haiwa vanhu,

²⁴ mwechizia kuti munozoashira musharo wenhaka kubva kunaMambo. Munoshandira Mambo Kristu.

²⁵ Ngokuti iye unoita zvakashata unozoashira zvakashata zvaakaita; akuna mutsananguro.