Vakorose 2 - Bhaibheri Rakachena muChindau

¹ Ngokuti ndinoda kuti muzie kuti kukura kwakaitawani kwokutambudzika kwendinakwo ngendaa yenyu, nendaa yaavo vari muRaodhisia, naavo veshe vasati vatongoona hope yangu ngokwenyama,

² kuti mwoyo yavo igwinyiswe nokubatana pamwepo murudo, kuti vawe noupfumi hweshe hwokuzwisisa hwakakwana nokuwa noruziyo rwechakafishika chaMwari, zvinoronza Kristu emene,

³ mwaari kwakafishwa upfumi hweshe hwoungwaru nehworuziyo.

⁴ Ndinoronza izvi kuti kusazoapo naumwe unozomuchengedzera ngemazwi ourimbwi.

⁵ Ngokuti kunyazwi ndisipo ngomuiri, asi ndinemwi mumweya, ndechidakara, ndechiringira kuzwanana kwenyu nokugwinya kwokugonda kwenyu munaKristu.

Kuzara kweNdaramo munaKristu

⁶ Ndizvo kudai ngezvemwakaashira Kristu Jesu Mambo, angirai kupona mukati mwake,

⁷ munenzinde dzakadzimikwa nokuakwa mukati mwake, mwechigwinyiswa mukugonda, kudai ngezvemwakadzidziswa, mwechizadzwa ngokubonga.

⁸ Ngwarai kuti asazoapo naumwe unomushaishira ngoungwaru hwevanhu nokuchengedzera ngezvisina shwiro, kuteera mishuma yevanhu, kudai ngokudzidzisa kwomweya yomunyika, haiwa kwaKristu.

⁹ Ngokuti mwaari munekuperera kweshe kwoUmwari kunogara mumuiri,

¹⁰ mwaari imwimwiwo muri vakaperera, uwo uri soro padera pevatongi veshe nepadera pevane simba.

¹¹ Mwaariwo imwimwi mwakachekwa ngokuchekwa kusikaitwi ngenyara, ngokubviswa kwomuiri wenyama, mukuchekwa ukwo kuri kwaKristu;

¹² apo pemwakaikwa pamwepo naye murubhabhatidzo, rwemwakamuswazve pamwepo naye kubudikidza ngokugonda musimba raMwari uwo wakamumusa kubva kwevakafa.

¹³ Naapo pemwaiya vakafa mukupauka kwenyu nokusikachekwa kwenyama yenyu, Mwari wakamuita kuti mupone pamwepo naye, apo paakatikungurira kupauka kwedu kweshe,

¹⁴ atsukutidza chisungo chakanyorwa cheMipango, icho chakatiitira ndaa nemitemo yacho chinopesana nesu; naye wakachibvisa munjira, akachikohomera pamuchinjiko.

¹⁵ Wakadusapo vatongi nevane simba, akavabudisa pamhene, echivanyisa ndiwo.

¹⁶ Ndizvo musatendera munhu kuti amutonge ngendaa yezvokudya nokuti zvokumwa nokuti ngendaa yemishongano yokudya nokuti yokutawa kwomwedzi nokuti yemaSabatha.

¹⁷ Izvo zviri bvuri rezvinouya, asi muiri ngowaKristu.

¹⁸ Musatendera naumwe kuti amukorerese kuashira chipo chenyu ngokudzipfaisa ngamaune nokudira ngirosi, echibatisisa kuneizvo zvaakaona, echidzikudza kusina shwiro ngomupinimidzo wenyama,

¹⁹ asikanasi kubatirira kuSoro, kweriri muiri weshe unonasa kugutswa nokugwinyiswa ngenhengo nemidzira, unokura ngokukuriswa ndiMwari.

Kufa noKupona naKristu

²⁰ Kudai mwakafa pamwepo naKristu kubva kuzvidzidziso zvokutanga zvenyika, munodzipfaisa ngenyi kungwarira zviemeso, kudai ngevachapona ngezvomunyika?

²¹ Izvo zvinoti, “Musabata, musaraira, musagwama.”

²² Mitemo iyi yeshe inoereketa ngezviro zvinopera ngokushandiswa; ndiyo mipango nezvidzidziso zvevanhu zvega.

²³ Zviro zvakadai ngegwinyiso zvinooneka zvakadai ngezvinoungwaru mukudira kwokuda nokudzipfaisa nokurekeredza muiri; asi azvina simba rokunyisa kuda kwenyama.