Vakorose 1 - Bhaibheri Rakachena muChindau

Kuchingamidza

¹ Phauri, mupostori waKristu Jesu ngokuda kwaMwari, naThimothi hama yedu,

² ndinonyorera kwavari vakacheneswa nehama dzakagondeka munaKristu vari muKhorose. Nyasha kwomuri nokunyarara zvinobva kunaMwari Baba wedu ngazvigare nemwi.

Mukumbiro woKubonga

³ Tinobonga Mwari, Baba aMambo wedu Jesu Kristu, techimukumbirira nguva dzeshe,

⁴ ngokuti takazwa ngokugonda kwenyu munaKristu Jesu norudo rwomunarwo kwavari veshe vakacheneswa,

⁵ ngendaa yegonda iro rakagadzikirwa imwimwi mudenga. Mwakazwa ndiro karetu ngeizwi regwinyiso, vhangeri,

⁶ iro rakaguma kwomuri, kudai ngezverinobara michero nokukura munyika yeshe, ndizvo raibara michero pakati penyu, kubvira kuiro zuva remwakazwa nokuzia nyasha dzaMwari mugwinyiso.

⁷ Izvi ndizvo zvemwakadzidza kubva kunaEphafrasi mungani wedu unodikanwa wetinoshanda naye. Muranda wakagondeka waKristu ngendaa yenyu,

⁸ uwo wakatiziisa ngorudo rwenyu muMweya.

⁹ Ngeiyi ndaa nesuwo, kubvira pazuva iro retakazvizwa, atizi kurekera kupota nokumukumbirira, kuti muzadzwe ngokuzia kuda kwake ngoungwaru hweshe nokuzwisisa kweshe kwoMweya,

¹⁰ kuti muhambe kudai ngezvinosisira kunaMambo, mwechinasa kumudakadza ndizvo zveshe, mwechibereka michero mumishando yeshe yakanaka, mwechikura mukuzia Mwari,

¹¹ mwechigwinyiswa ngokugwinya kweshe kunobva kusimba routhende hwake, kuti mukone kushingirira muzviro zveshe ngokusengerera kweshe nokudakara,

¹² mwechibonga kunaBaba, uwo wakamuita vanosisira kukoanisirwa nhaka yevakacheneswa mukujeka.

¹³ Uwo wakatinunura kubva kusimba rechidima, wakatiisa muumambo hwoMukororo wake unodikanwa,

¹⁴ mwaari tinakwo kuripirwa, kukungurirwa kwezvishaishi zvedu.

Unhu neMishando yaKristu

¹⁵ Ndiye muedzaniso waMwari usikaoneki, dangwe rezvakasikwa zveshe;

¹⁶ ngokuti mwaari zviro zveshe zvakasikwa, zviri mudenga nezviri munyika, zviro zvinooneka nezvisikaoneki, kunyazwi madendemaro nokuti umambo nokuti vatongi nokuti vane simba; zviro zveshe zvakasikwa kubudikidza ndiye, nazvo zvakasikirwa iye.

¹⁷ Ndiye unotangira zviro zveshe, nemwaari zviro zveshe zvakabatana pamwepo.

¹⁸ Ndiye soro romuiri, chiara; ndiye maambo, dangwe rokumuka kubva kwevakafa, kuti iye aite mukuru muzviro zveshe.

¹⁹ Ngokuti mwaari kuzara kweshe kwaMwari kwakadakara kugaramwo,

²⁰ nokubudikidza ndiye Mwari wakadakara kudziiyanisira zviro zveshe kwaari, kunyazwi zviro zviri munyika nokuti zviro zviri mudenga, aita runyararo kubudikidza ngengazi yepamuchinjiko wake.

²¹ Nemwiwo karetu mwaiya vapara nemagaa mukupinimidza kwenyu, mwechiita mishando yakashata,

²² zvino wakaiyanisa munyama yomuiri wake kubudikidza ngokufa, kuti amuise muri vakacheneswa nevasina ndaa, musikashooreki pamberi pake,

²³ kudai mwechiangira kugara mwakadzimikwa nokugwinyiswa mukugonda, musikatsukunuswi kubva mugonda remwakagondiswa ngevhangeri remwakazwa, iro rakachumairwa kunezvisikwa zveshe pashi pomudenga. Inini, Phauri, ndakaitwa mushandiri waro vhangeri iri.

Mushando waPhauri Muranda weChiara

²⁴ Zvino ndinodakara mukutambudzika kwangu ngendaa yenyu, ndechizadzisa munyama yangu icho chakasarira chemadambudziko aKristu ngendaa yomuiri wake, kuronza, chiara.

²⁵ Inini ndakaitwa mushandiri kudai ngoungwariri hwakapuwa kwendiri ndiMwari ngendaa yenyu, kuzadzisa izwi raMwari kuti rinase kuziikanwa,

²⁶ mushamiso waiya wakafishwa kubvira pakutanga kumibarirwana yeshe, asi zvino waoniswa kunevakacheneswa vake.

²⁷ Kwavari Mwari wakatsanangura kuti avaziise icho chiri upfumi hwouthende hwechakafishika pakati pevemadzinza, ndiye Kristu mukati mwenyu, gonda routhende.

²⁸ Ndiye uwo wetinochumaira, techipanga munhu weshe nokudzidzisa munhu weshe muungwaru hweshe, kuti tiunze munhu weshe akaperera munaKristu.

²⁹ Ngokuti ndizvo izvi zvendinoshandawo, ndechitambudzika ngesimba rake iro raakafemera mukati mwangu ngesimba.