Vahebheru 9 - Bhaibheri Rakachena muChindau

Kudira Mwari muNyika noMudenga

¹ Zvino kunyazwi nechitenderano chokutanga chaiya nemitemo yokudira nendau yakachena yepanyika.

² Ngokuti tende rokutanga rakanasirwa, umwo mwaiya nechigadzikiro chechibani, tafura nezvingwa zvaipirwa kunaMwari; iyi inodaidzwa kuti, “Ndau yakachena.”

³ Ngesure kwemachira ezvisitiro echipiri, paiya netende rinodaidzwa kuti, “Rakapindisisa kuchena.”

⁴ Mukati mwaro mwaiya nearita yomukore yokupishira mutombo unonuhwira nebhokisi rechitenderano rakasetwa marutii aro eshe ngomukore, mukati mwaro mwaiya nehari yomukore ine mana nendonga yaAroni yakatungira mashakani matsva nemapuwe akanyorwa chitenderano;

⁵ padera paro paiya nemakherubhi outhende echithibikira chigaro chenyasha. Ngendaa yeizvi zviro atikoni kuereketa ndizvo zvino chimwe ngachimwe.

⁶ Zvino kunasirirwa uku kwaitwa kudaro, vapristi vaigara vechipotera kundau yokutanga yetende vechiita mishando yokudira Mwari;

⁷ asi kundau yechipiri yetende kwaipotera mupristi mukuru ega, kamwe ngegore, haiwa asina ngazi, yaapira ngendaa yake nendaa yezvishaishi zvevanhu zvakaitwa ngokusikazia.

⁸ Mweya Wakachena wechionisa kuti njira yokupotera mundau yakachenesisa yaiya isati yaoniswa, apo tende rokutanga richakaema.

⁹ Ichi chiri muedzaniso wenguva ino, yavanopira ndiyo zveshe zvipo nemidiro, zvisikakoni kuita kuti mhumba younodira iperere,

¹⁰ asi zvaiya zviemeso zvega zvenyama, zvokudya, zvokumwa norubhabhatidzo rwakaparadzana, zvakaemeswa metsa kuguma kumukuwo wokutsandudzwa.

¹¹ Asi apo Kristu auya ari mupristi mukuru wezviro zvakanaka zvauya, zvino kubudikidza ngomutende rakapinda kukura nokuperera, risikazi kuitwa ngenyara, kuronza kuti andiropi rokusikwa uku,

¹² haiwa nengazi yembudzi neyemakonyana, asi nengazi yake yemene, unopoteramwo kamwe kwega mundau yakachenesisa, wakationera kuripirwa kusikaperi.

¹³ Ngokuti kudai ngazi yembudzi neyemikono, nemarota etsiru echifafazirwa kwavari vakasvipiswa, zvechivachenesa kuti nyama isukike,

¹⁴ ngazi yaKristu inozopinda kwakaitawani, uwo kubudikidza ngomweya wemhera nariini wakadzipa asina chaangapomerwa kunaMwari, kuchenesa mhumba dzedu kubva kumishando yakafa kuti tishandire Mwari unopona!

¹⁵ Ngeiyi ndaa iye uri muiyanisi wechitenderano chitsva, ngokuti rufu rwakauya kuti vaponeswe kubva kuzvipaukwa zvavo vaiya pashi pechitenderano chokutanga; kuti avo vanodaidzwa vaashire chigondiso chenhaka isikaperi.

¹⁶ Ngokuti apo pane tsamba yokukoanisa nhaka, panosisira kuti kuapo pakutanga rufu rwouwo wakainyora.

¹⁷ Ngokuti tsamba yokukoanisa nhaka ine simba apo munhu uwo afa, zvino aina simba kuti uwo wakainyora achapona.

¹⁸ Ndizvo nechitenderano chokutanga achizi kugwinyiswa pasina ngazi.

¹⁹ Ngokuti apo mipango yeshe yaiya yaronzwa ndiMosi kuvanhu veshe kudai ngezvinodiwa ngeMipango, wakatora ngazi yemakonyana neyembudzi, pamwepo nemvura, nehombori yehisopi yakasungwa ngemamviri akatsvuka, wakafafazira tsamba nevanhu veshe

²⁰ echiti, “Iyi ingazi yechitenderano chomwakapangwa ndiMwari.”

²¹ Ngenjira imweyo, wakafafazira ngazi zveshe tende nendiro dzomushando wokudira.

²² Ngegwinyiso, zviro zvinoda kuita zveshe pashi peMipango zvinocheneswa ngengazi, pasina kuparadzwa ngazi apana kurekererwa kwezvishaishi.

Kudzipira kwaKristu Kunobvisa Zvishaishi

²³ Ndizvo kwaisisira kuti miedzaniso yeizvo zviri mudenga zvisukwe ngemidiro iyi, asi zviro zvomudenga zvemene zvinocheneswa ngemidiro yakapinda iyi kunaka.

²⁴ Ngokuti Kristu aazi kupotera kundau yakachenesisa, yakaitwa ngenyara dzomunhu, yakadai ngomuedzaniso weizvo zvegwinyiso, asi wakapotera mudenga remene, kuti zvino aeme pamberi pehope yaMwari ngendaa yedu.

²⁵ Zve, aazi kupindamwo kuti adzipire kuita mudiro kazhinji, kudai ngezvaaipotera mupristi mukuru kundau yakachenesisa gore ngegore ane ngazi isiri yake;

²⁶ ngokuti zvino kwaisisira kuti atambudzike kazhinji kubvira mukuemeswa kwenyika. Asi zvino pakugumisira kwenguva iye wakaoneka kamwe kuti abvise zvishaishi ngokudzipira kuita mudiro.

²⁷ Kudai ngezvekwakaemeserwa kuvanhu kufa kamwe, ngesure kwazvo kutongwa,

²⁸ ndizvo Kristu wakapirwa kamwe kuti atware zvishaishi zvevazhinji, unozoonekazve ngokwechipiri asikatwari zvishaishi, asi kuponesa avo vanomugarira.