Vahebheru 8 - Bhaibheri Rakachena muChindau

Jesu Mupristi wedu Mukuru weChitenderano Chitsva

¹ Zvino ndaa huru yeizvi zvetinoereketa ndizvo ngeiyi, kuti tinaye mupristi mukuru wakadaro, uwo wakagara pashi ngokumudyo kwedendemaro roUmambo hwomudenga,

² ari mushandi wezvakachena nowetende regwinyiso, raakaaka Mambo, haiwa munhu.

³ Ngokuti mupristi mukuru weshe unoemeserwa kupira zveshe zvipo nemidiro; ndizvo kunosisira kuti uyu mupristi naye aanachowo chokupira.

⁴ Zvino kudai aiya munyika, aasaizoita mupristipi, kudai ngezvevaripo vapristi vanopira zvipo kudai ngezvinodiwa ngeMipango.

⁵ Vanoita midiro mundau yakachena iri muedzaniso nebvute reiyo yomudenga; ngokuti Mosi, apo ooda kudzimika tende, wakapangwa kwechizwi, “Ngwara kuti uite zveshe kudai ngechionero icho chakaoniswa kwouri pamutunhu.”

⁶ Asi Jesu zvino wakahanira mushando wakapindisisa kunaka, ndizvo ndiye muiyanisi wechitenderano chakapinda kunaka, chakaitwa kubudikidza ngezvigondiso zvakapinda kunaka.

⁷ Ngokuti kudai chitenderano chokutanga chaiya chakaperera, akusaizotsvakwazve chechipiri.

⁸ Ngokuti Mwari unovaitira ndaa, apo paanoti: “Mazuva achazouya, unoronza Mambo Mwari, apo pendinozoita chitenderano chitsva nemhatso yaIsuraeri nemhatso yaJudha;

⁹ haiwa chakadai ngechitenderano chendakaita nemadzibaba avo, ngezuva rendakavatora ngenyara kuvatungamirira kubuda munyika yeEgipite; ngokuti avazi kuangira kugara muchitenderano changu, neni andizi kupinimidza ndivo, unoronza Mambo Mwari.

¹⁰ Ngokuti ichi ndicho chitenderano chendinozoita nevemhatso yaIsuraeri ngesure kwemazuva awo, unoronza Mambo Mwari; ndinozoisa Mipango yangu mumipinimidzo yavo, ndinozoinyora mumwoyo yavo, neni ndinozoita Mwari wavo, navo vanozoita vanhu vangu.

¹¹ Navo avazodzidzisani umwe kuno umweni, nokuti kuronzerana umwe kuno umweni wake, echiti, ‘Ziai Mambo Mwari,’ ngokuti veshe vanozondizia, kubvira kumudoko wakatsongesesa metsa kumukuru wavo wakakurisisa.

¹² Ngokuti ndinozoita nyasha pane zvinonyangadza zvavo, nezvishaishi zvavo andichazozvikarakadzizve.”

¹³ Mukuronza kuti, “Chitenderano chitsva,” ngokudaro wakachiita chokutanga chisharuka. Asi icho chaita chisharuka nokutsakara chaapasinde pokurova.