Vahebheru 7 - Bhaibheri Rakachena muChindau

Merekhizedheki Mupristi

¹ Ngokuti uyu Merekhizedheki, mambo weSaremu, mupristi waMwari Uri-Padera-Pazveshe, wakashongana naAbrahama, echipetuka kubva koorwa nemadzimambo naye wakamufumisa.

² Kwaarizve Abrahama wakapa “Chimwe chegumi cheizvo zveshe.” Zina rake pakutanga rinoronza kuti, “Mambo wokurarama;” sure kwazvo unozwi, mambo weSaremu, rinoronza kuti, “Mambo wokunyarara.”

³ Asina baba, asina mai, asina madzisekuru, asina maambo emazuva nokuti magumo endaramo, asi wakaitwa kudai ngomuedzaniso woMukororo waMwari, unogara ari mupristi mhera nariini.

⁴ Wonai kukuranyi kwaakaita! Kunyazwi naAbrahama, baba mukuru, akamupa chimwe chegumi cheizvo zvaakachakata.

⁵ Ngegwinyiso naavo vemhuri yaRevhi vanoashira mushando woupristi, vanopangwa ngeMipango kuti vatore chegumi kuvanhu, ndikwo kuti kubva kuhama dzavo, kunyazwi vakabva muchiunu chaAbrahama.

⁶ Asi munhu uyu, mubarirwana wake usikazi kuerengwa rudzi rwake kwavari, wakatora chegumi kubva kunaAbrahama, akamufumisa uwo wakaashira zvigondiso.

⁷ Zviri pamhene pasina kuphikisa kuti mudoko unofumiswa ngomukuru.

⁸ Panapa vanhu vanofa vanoashira chimwe chegumi; pamweni ngoumweni uwo unopupurwa ndiye kuti unorarama.

⁹ Umwe ungaronza kuti Revhi pachake unoashira chegumi, wakapawo chegumi kubudikidza ndiAbrahama,

¹⁰ ngokuti iye waiya achiri muchiunu chababa ake, apo Merekhizedheki paakashongana naye.

¹¹ Zvino kudai kuperera kwakaoneka kubudikidza ngoupristi hwaRevhi (ngokuti vanhu vakaashira Mipango paupristi uhu) kwaiya kuchatamikenyi kuti tierekete ngomupristi umweni kudai ngokuteera urongwa hwoupristi hwaMerekhizedheki, pane kuti umwe worudzi rwaAroni?

¹² Ngokuti apo upristi hwechishandurwa kunosisira kuti Mipango ishandurwe.

¹³ Ngokuti uwo unoereketwa ndiye ngeizvi zviro ngowedzinza rimweni, kubva kwaari akuna naumwe wakamboshanda paarita.

¹⁴ Ngokuti zviri pamhene kuti Mambo wedu wakabva kudzinza raJudha, ngeiri dzinza Mosi aazi kuereketa chiro ngendaa yevapristi.

Mupristi Umweni Wakadai ndiMerekhizedheki

¹⁵ Izvi zvakapinda kunasa kuita pamhene, kudai kwechimiruka mupristi umweni wakatodzana nomuemo waMerekhizedheki,

¹⁶ uwo usikazi kuitwa mupristi kudai ngechironzo chomupango wenyama, asi wakaitwa ngesimba rokupona kusikaperi.

¹⁷ Ngokuti ndiye unopupurirwa kuti, “Iwewe uri mupristi mhera nariini kudai ngourongwa hworudzi rwaMerekhizedheki.”

¹⁸ Ngokuti kuripo, munyara imweni, kutama simba kwomupango wokutanga ngendaa yokurembedzeka nokusikadetsera kwawo.

¹⁹ (Ngokuti mupango apana chiro chowakaita chakaperera); kuripozve, munyara imweni, kutanga kwegonda rakapinda kunaka, kubudikidza ndiro tinokwedzera kunaMwari.

²⁰ Ichi chakagwinyiswa ngemhiko; ngokuti ivo ngegwinyiso vakaitwa vapristi pasina mhiko,

²¹ asi uyu wakaitwa mupristi ngokupika mhiko ngendaa youwo wakati kwaari, “Mambo wakapika naye aazokunukudzi mupinimidzo wake, ‘Iwewe uri mupristi mhera nariini.’ ”

²² Ndizvo Jesu wakaitwa chibatiso chechitenderano chakapinda kunaka.

²³ Vapristi vokutanga vaiya vazhinji, ngokuti vairambidzwa ngorufu kuangira kugara varimwo mumushando;

²⁴ asi unogara mhera nariini, anawo upristi hwake, ngokuti unoangira mhera nariini.

²⁵ Ndizvozve unesimba rokuponesa yaamho avo vanokwedzera kunaMwari kubudikidza ndiye, ngokuti unorarama nguva dzeshe kuti avakumbirire.

²⁶ Ngokuti zvaiya zvakanaka kuti taisisira kuwa nomupristi mukuru, wakachena, usikashooreki, usina chinosvipisa, wakaparadzaniswa nevashaishi, wakamirudzwa padera pematenga.

²⁷ Uwo usikatami kupira midiro zuva ngezuva, kutanga ngendaa yezvishaishi zvake, ngesure kweizvo ngendaa yezvishaishi zvevanhu, kudai ngezvevakaita avo vapristi vakuru. Ngokuti wakaita izvi kamwe kega, apo paakadzipira pachake.

²⁸ Ngokuti Mipango inoemesa kuita vapristi vakuru vanhu vakarembedzeka, asi izwi remhiko, rakateera kuuya sure kwokupirwa kweMipango, rakaemesa Mukororo uwo wakaitwa wakaperera mhera nariini.