Vahebheru 6 - Bhaibheri Rakachena muChindau

Ngozi yoKupauka

¹ Ndizvo ngatiangire kuenda mberi mukuperera, techisiya sure zvidzidziso zvokutanga zvaKristu, tisikaradzikizve dzeyo rokutenderuka kubva kumishando yakafa nokugonda kuna Mwari,

² nokuchidzidziso chokubhabhatidzwa nokuiswa nyara nechokumuka kwevakafa nechokutongwa kwemhera nariini.

³ Neizvi tinozozviita, kudai Mwari echitendera.

⁴ Ngokuti azviitiki kuvapetudzazve kuti vatenderuke avo vakambojekiswa nokuraira chipo chomudenga, vaashira chikoaniswa muMweya Wakachena,

⁵ vakaraira unaku hweizwi raMwari nemasimba enguva inouya,

⁶ kudai vechipauka kuhwirira sure, azvingaitiki kuvatenderudzazve, ngokuti vanokohomerazve Mukororo waMwari vechimutsverudza pamhene.

⁷ Ngokuti nyika inomwirira mvura inonaya kazhinji padera payo, kudai yechimera miriwo inosisira avo vayakarimirwa, inoashira chifumiso chinobva kuna Mwari.

⁸ Asi kudai yechibereka minzwa nemakato, inoita isina shwiro yaapasinde pokutukwa, magumisiro ayo kupishwa.

⁹ Kunyazwi tinoereketa kudai, vanodikanwa, tinegonda rezviro zvakapinda kunaka ndimwi, zviro zvoruponeso.

¹⁰ Ngokuti Mwari aasiri wokusikaruramapi; aazoriyarwi mushando wenyu norudo rwemwakaonisa ngendaa yezina rake mukushandira vakacheneswa, kudai ngezvemuchavashandira nazvino.

¹¹ Nesu tinodisisa kuti umwe ngaumwe wenyu aonise kutsamwirira kwakadaro kunokugonda kwakaperera metsa pakugumisira,

¹² kuti musaita nungo, asi vaedzereri veavo vanogara nhaka yezvigondiso kubudikidza ngokugonda nokusengerera.

Gwinyiso reChigondiso chaMwari

¹³ Ngokuti apo Mwari paakaita chigondiso kuna Abrahama, wakapika ndiye pachake, ngokuti paiya pasina mukuru wokuti apike ndiye,

¹⁴ echiti, “Ngegwinyiso ndinozomufumisa nokumuwanza.”

¹⁵ Ngokudaro Abrahama echishingirira mukusengerera wakahanira chigondiso.

¹⁶ Ngegwinyiso vanhu vanopika ngomukuru wakavapinda pachavo, nemhiko inogwinyisa inopedza hasha dzeshe.

¹⁷ Ngenjira imweyo, apo Mwari, paakada kunasa kuonisa kwavari avo vanogara nhaka yechigondiso, icho chine chiemo chisikatsandudzwi biningidzo racho, wakachigwinyisa ngemhiko,

¹⁸ kuti kubudikidza ngezviro zviiri zvisikashanduki, mwezviri amungaitiki kuti Mwari anyepe, isusu tione kugwinyiswa kwakagwinya, isusu takatiza kubatisisa gonda rakaiswa pamberi pedu.

¹⁹ Tinaro gonda iri kuita chitsimiso chomweya, rine gwinyiso rakatsima rinopotera muneicho chiri mukati mwejira rechisitiro,

²⁰ umwo Jesu mutungamiriri wakapoteramwo pokutanga ngendaa yedu, apo aitwa mupristi mukuru mhera nariini kudai ngourongwa hworudzi rwaMerekhizedheki.