Vahebheru 5 - Bhaibheri Rakachena muChindau

¹ Ngokuti mupristi mukuru weshe wakatsanangurwa kubva pakati pevanhu unoemeserwa vanhu kuita zviro zvaMwari, kuti apire zvipo nemidiro ngendaa yezvishaishi.

² Unokona kuzwira urombo kunevasikazii nevanopauka, ngokuti iye emene wakatendenedzwawo ngokurembaremba;

³ ngeiyi ndaa, unosisira kuti apire midiro ngendaa yezvishaishi zvake, kudai ngezvaanopira ngendaa yevanhu.

⁴ Akuna munhu unodzitorera kuremeredzwa uku, asi unotora kwega apo anodaidzwa ndiMwari, kudai ndiAroni.

⁵ Ndizvo Kristuwo aazi kudzikudza ngokuita mupristi mukuru, asi wakaemeswa ngouwo wakati kwaari, “Ndiwe Mukororo wangu, inini nyamashi ndakubara;”

⁶ kudai ngezvaakaronzazve kundau imweni kuti, “Iwewe uri mupristi mhera nariini kudai ngourongwa hworudzi rwaMerekhizedheki.”

⁷ Ngemazuva okupona kwake munyama, Jesu wakakumbira mikumbiro nokupota, ngokuchema kakurutu nemasodzi, kwaari umwe uwo waikona kumuponesa kubva murufu, naye wakazwika ngendaa yokumutya Mwari.

⁸ Kunyazwi waiya Mukororo, asi wakadzidza kupurutana kubudikidza ngeizvo zvaakatambudzika ndizvo;

⁹ naapo aitwa wakaperera, wakaita muambi wokuponeswa kusikaperi kwavari veshe vanomupurutana,

¹⁰ naapo aemeswa ndiMwari kuita mupristi mukuru kudai ngokuteererana kworudzi rwaMerekhizedheki.

Kungwadzwa ngendaa yoKurekeredza Kugonda

¹¹ Ngendaa yeizvi tinazvo zvakawanda zvokuronza zvakakonza kududzira, kudai ngezvemwaita vanhu vasikachakoni kuzwisisa.

¹² Ngokuti kunyazwi ngouyu mukuwo mwaisisira kuita vadzidzisi, zvino imwimwi munodazve kuti umweni amudzidzise zvidzidziso zvokutanga zvemazwi aMwari. Imwimwi mwatoita vanosisira kupuwa mukaka, haiwa kudya kwakagwinya;

¹³ ngokuti munhu weshe unomwa mukaka aazwisisi izwi rokururama, ngokuti mwana mudoko.

¹⁴ Asi kudya kwakagwinya ngokwevakuru, ngokuti avo mipinimidzo yavo yakadzidziswa ngokuita kutsanangura zvakanaka kubva panezvakashata.