Vahebheru 4 - Bhaibheri Rakachena muChindau

Zororo raAkagondisa Mwari

¹ Ndizvo, kudai ngezvechichipo chigondiso chokupotera mukuzorora kwake, ngatingware kuti kusazoapo naumwe wenyu ungaoneka echikorera kuhanira kwechiri.

² Ngokuti ngegwinyiso mashoko akanaka akauya kwetiri, kudai ngekwavari; asi izwi revakazwa arizi kuvadetsera, ngokuti arizi kubvengedzwa pamwepo nokugonda kwaavo vakarizwa.

³ Ngokuti isusu takatenda tinopotera mukuzorora ukwo, kudai ngezvaakaereketa echiti, “Kudai ngezvendakapika muushungu hwangu kuti, ‘Avazopoteri mukuzorora kwangu,’ ” kunyazwi mishando yake yakapedzwa kubvira mukuemeswa kwenyika.

⁴ Ngokuti pandau imweni wakaereketa ngendaa yezuva rechinomwe echiti, “Mwari wakazorora ngezuva rechinomwe kubva kumishando yake yeshe.”

⁵ Nepandau inozve echiti, “Avazopoteri mukuzorora kwangu.”

⁶ Ndizvo kuchakabeuka kuti vamweni vapoteremwo, naavo vakaashira mashoko akanaka karetu vakakorera kupoteramwo ngokusikapurutana,

⁷ unoemesazve zuva rimweni rinoti, “Nyamashi,” rechiti kubudikidza ndiDhavhidha ngesure kwomukuwo wakareba kudai, kudai ngezvezvakaereketwa karetu kuti, “Nyamashi, kudai mwechizwa izwi rake, musakonzesa mwoyo yenyu.”

⁸ Ngokuti kudai Joshua aiya avapa kuzorora, Mwari asaizoereketa ngezuva rimweni sure kweizvo.

⁹ Ndizvo zvino kuzorora kweSabatha revanhu vaMwari kuchiripo.

¹⁰ Ngokuti avo vakapotera muzororo raMwari vakazororawo kubva kumishando yavo, kudai ngezvaakaita Mwari kubva kuneyake.

¹¹ Ndizvo ngatitsamwirire kupotera muzororo iro, kuti kusazoapo naumwe unozowa kubudikidza ngokuteera icho chionero chokusikapurutana.

¹² Ngokuti izwi raMwari rinopona, rinoshanda, rinopinza kupinda shoti ine upanga huiri, rinobaya kugumira panoparadzana mwoyo nomweya, nhengo nomwongo; rinokona kuzwisisa zvinotendwa nezvinonyerwa mumwoyo.

¹³ Pamberi pake apana chisikwa chakafishika, asi zviro zveshe zviri pamhene nokufukurwa kumadziso ake uwo wetinozodzipingurira kwaari.

Jesu Mupristi Wakapinda Kukura

¹⁴ Ndizvo zvino zvetinaye mupristi wakapinda kukura, wakapinda ngepakati pematenga, Jesu, Mukororo waMwari, ngatibatisise kutenda kwedu.

¹⁵ Ngokuti atina mupristi mukuru usikakoni kutizwira urombo pakurembaremba kwedu, asi tinaye uwo wakaedzwa ngenjira dzeshe kudai tisu, asina kushaisha.

¹⁶ Ndizvo ngatikwedzere ngokushinga kudendemaro renyasha, kuti tiashire nyasha nokuona nyasha dzokutidetsera ngomukuwo wokutama.