Vahebheru 3 - Bhaibheri Rakachena muChindau

Jesu Mukuru Kupinda Mosi

¹ Ndizvo, hama dzakacheneswa, vanoashirawo kudaidzwa kwomudenga, pinimidzai ndiye Jesu, Mupostori noMupristi Mukuru wokutenda kwedu,

² uwo waigondeka kwaari uwo wakamuemesa, kudaiwo ndiMosi waigondeka mumhatso yaMwari yeshe.

³ Ngokuti Jesu wakaerengwa kuita unosisira kuremeredzwa kupinda Mosi, kudai ngouwo wakaaka mhatso unoremeredzwa kupinda mhatso yemene.

⁴ Ngokuti mhatso yeshe inoakiwa ngomunhu, asi uwo wakaaka zveshe ndiMwari.

⁵ Zvino Mosi waigondeka mumhatso yaMwari yeshe kudai ngomuranda, kuti aite chapupu cheizvo zvaaizoereketa panguva yaiteera.

⁶ Asi Kristu waigondeka padera pemhatso yaMwari kudai ngomukororo, nesu tiri mhatso yake kudai techibatisisa pakushinga kwedu negonda retinodzikudza ndiro mukugonda kwedu.

⁷ Ndizvo, kudai ngezvaanoereketa Mweya Wakachena, “Nyamashi, kudai mwechizwa izwi rake,

⁸ “Musakonzesa mwoyo yenyu kudai ngenguva yokumukirana, kudai ngezuva rokuedzwa mushango,

⁹ paakandiedza madzibaba enyu echindinesa, akaona mishando yangu

¹⁰ makore makumi marongomuna. Ndizvo ndakanyangadzwa ngorudzi urwu, ndikati, ‘Vanogara vechipauka mumwoyo yavo navo avazi kuzia njira dzangu.’

¹¹ Kudai ngezvendakapika muushungu hwangu kuti, ‘Avazopoteri mukuzorora kwangu.’ ”

¹² Ngwarai, hama, kuti kusazoapo naumwe wenyu unemwoyo wakashata usikatendi, unofuratira kubva kuna Mwari unopona.

¹³ Asi gwinyisanai umwe ngaumwe wenyu mazuva eshe kuchadaidzwa kuti, “Nyamashi,” kuti kusazoapo naumwe wenyu unokonzeswa ngokuchengedzerwa kwokushaisha.

¹⁴ Ngokuti isusu takaitwa vanokoanisirana naKristu, kudai techibatisisa kuamba kwokugonda kwedu metsa pakugumisira.

¹⁵ Apo kucharonzwa kuti, “Nyamashi, kudai mwechizwa izwi rake, musakonzesa mwoyo yenyu kudai ngenguva yokumukirana.”

¹⁶ Ndiani avo vakazwa, vakamumukira? Andivopi veshe here vakabudiswa Egipite ndiMosi?

¹⁷ Ndianizve vaakanyangadzirwa makore makumi marongomuna? Andivopi avo vakashaisha here, miiri yavo yakawira mushango?

¹⁸ Wakapikazve kunaani kuti avazopoteri mukuzorora kwake, kudai kusiri kwavari avo vaiya vasikamupurutani?

¹⁹ Ndizvo tinoona kuti avasaikona kupoteramwo, ngokuti vaiya vasikatendi.