Vahebheru 2 - Bhaibheri Rakachena muChindau

Ruponeso Rwakakura

¹ Ndizvo tinosisira kuti tipinde kungwarira zvetakazwa, kuti tirekere kukukuzwa kubva kwezviri.

² Ngokuti kudai izwi iro rakaereketwa kubudikidza ngengirosi rakaoniswa kuti rakagwinya, nokupauka kweshe nokusikapurutana zvakathuswa ngokuunzidzirwa kwakasisira,

³ isusu tingaita mapokonyokerenyi kudai techirekeredza ruponeso rukuru rwakadai? Urwo rwakatanga kuereketwa kubudikidza ndiye Mambo, rukagwinyisiswa kwetiri ngaavo vakamuzwa,

⁴ naapo Mwari wakapupurawo pamwepo navo ngezvioniso nemishamiso nemishando yakawanda yesimba nezvipo zvoMweya Wakachena, zvakapuwa kudai ngokuda kwake.

Umwe Unotitungamirira muRuponeso

⁵ Ngokuti aazi kuipfaisa pashi pengirosi nyika inouya, yetinoereketa ndiyo.

⁶ Asi umwe wakapupura pandau imweni echiti, “Munhu chiinyi kuti ukarakadze ndiye? Nokuti mukororo womunhu kuti mumungwarire?

⁷ Wakamuita kwekamukuwo kadoodori ari pashi pengirosi; wakamupfekedza dzungudza routhende nokuremeredzwa.

⁸ Wakapfaisa zveshe pashi petsoka dzake.” Ngokuti pakuisa pashi pake zviro zveshe, aazi kusiya chiro chisikazi kuiswa pashi pake. Asi zvino atisati taona kuti zveshe zvakaiswa pashi pake.

⁹ Asi tinoona Jesu, uwo wakaitwa mudoko pashi pengirosi kwenguva doko, asi zvino akapfekedzwa dzungudza routhende nokuremeredzwa ngendaa yokutambudzika kworufu, kuti ngenyasha dzaMwari araire rufu ngendaa yomunhu weshe.

¹⁰ Ngokuti kwakamusisira Mwari, iye wakaitirwa zviro zveshe, nokubudikidza ndiye zviro zveshe zviripo, mukuunza vana vazhinji muuthende, kuti apererise mukutambudzika uwo uri mutungamiri woruponeso rwavo.

¹¹ Ngokuti uwo unochenesa naavo vakacheneswa vana Baba umwe. Ngeiyi ndaa Jesu aatsveruki kuvadaidza kuti hama

¹² echiti, “Ndinozochumaira zina rako kuhama dzangu, ndinozoemba kukukudza pakati pembungano.”

¹³ Zve, “Ndinozogonda kwaari.” Zve, “Inini ndiri pano, nevana avo vaakandipa Mwari.”

¹⁴ Ndizvo kwechioneka kuti vana vakakoanisirwa ngazi nenyama, iye emene ngokudaro wakakoana navo pane zviro zvakadaro, kuti kubudikidza ngokufa ungaparadza uwo unesimba rorufu, ndiye Dhiabhorosi

¹⁵ nokusunhura veshe avo vaiya muusungwa mukupona kwavo kweshe mukutya rufu.

¹⁶ Ngokuti ngegwinyiso aazi kuuya koodetsera ngirosi, asi kudetsera mibarirwana yaAbrahama.

¹⁷ Ndizvo unosisira kuti atodzane nehama dzake ngezviro zveshe, kuti aite mupristi mukuru unenyasha nounogondeka mumushando waMwari, kuti aripire zvishaishi zvevanhu.

¹⁸ Ngokuti iye emene wakatambudzika echiedzwa, unesimba rokudetsera avo vanoedzwa.