Vahebheru 13 - Bhaibheri Rakachena muChindau

Njira yoKudakadza ndiyo Mwari

¹ Rudo pakati pehama ngarugare.

² Musariyarwa kuonisa rudo kuvahambi, ngokuti ngokuita kudaro vamweni vakaashira ngirosi vasikazii.

³ Karakadzai vakasungwa, mwechiita kudai ngevakasungwa pamwepo navo, naavo vanoitirwa zvakashata, kudai ngevanoitirwa pamwepo navo.

⁴ Kuroora ngakuremeredzwe ngevanhu veshe, nomubhedhi wakwo auzi kusvipiswa; ngokuti Mwari unozotonga zvifebi nevaombi.

⁵ Kupona kwenyu ngakuite kusikakariri mare, itai vanogutiswa ngeizvo zvomunazvo; ngokuti wakati, “Anditongokurekeri nokuti kukusiya.”

⁶ Ndizvo ngokutsunga tingakona kuronza kuti, “Mambo Mwari mudetseri wangu; andizotyi. Munhu ungazoitenyi kwendiri?”

⁷ Karakadzai vatungamiriri venyu, avo vakaereketa kwomuri izwi raMwari; mwechipinimidza ngemagumo okupona kwavo, muedzerere kugonda kwavo.

⁸ Jesu Kristu unogara akadaro zuro nanyamashi, eya, mhera nariini.

⁹ Musapauswa ngezvidzidziso zvakaparadzana nezvisikaziikanwi; ngokuti kwakanaka kuti mwoyo igwinyiswe ngenyasha, haiwa ngezvokudya, izvo zvevasikazi kudetserwa ndizvo avo vakahamba mwezviri.

¹⁰ Tine arita isusu revasikatenderwi kudya kubva kweriri avo vanoita mushando mutende.

¹¹ Ngokuti miiri yemhuka dzine ngazi inounzwa kundau yakachena ngomupristi mukuru kuita mudiro wokushaisha, inopishwa kubanze kwekamba.

¹² Ndizvo Jesu wakatambudzikawo kubanze kwomusiwo wedhorobha, kuitira kuti achenese vanhu kubudikidza ngengazi yake.

¹³ Ndizvo ngatibude tiende kwaari kubanze kwekamba, titware kutsverudzwa kwake.

¹⁴ Ngokuti munyika muno atina dhorobha rinogara, asi tinotsvaka dhorobha iro rinouya.

¹⁵ Kubudikidza ndiye, zvino, ngatiangire kupira mudiro wokukudza kunaMwari, kuronza kuti, kupira michero yemiromo yedu inopupura ngezina rake.

¹⁶ Asi musariyarwa kuita zvakanaka nokukoana zvomunazvo. Ngokuti Mwari unonasa kudakadzwa ngemidiro yakadaro.

¹⁷ Purutanai vatungamiriri venyu nokuvapfaira. Ngokuti ivo vanogara vakarinda mweya yenyu, navo vanozobvunziswa ngendaa yenyu. Ngavaite izvi ngokudakara, haiwa ngokutambudzika, ngokuti izvi zvingazomuremadza.

¹⁸ Tikumbirirenyi; ngokuti tinozia kuti tine mhumba isina ndaa, tinoemurira kuhamba takagondeka muzviro zveshe.

¹⁹ Ndinomupota kuti muite izvi, kakurutu kuti ndipetudzwe kwomuri ngokukasira.

Mukumbiro woKukonya

²⁰ Zvino Mwari wokunyarara, uwo wakaunzazve kubva kwevakafa Mambo wedu Jesu, muushi mukuru wemakwai ngengazi yechitenderano chisikaperi,

²¹ ngaamuchenese kuzviro zveshe zvakanaka, kuti muite kuda kwake, echishanda pakati pedu izvo zvinonasa kumudakadza pamberi pake, kubudikidza ndiye Jesu Kristu, kwaari ngahugare huripo uthende mhera nariini nariini. Ameni.

Mazwi oKugumisira

²² Ndinomupota, hama, sengererai izwi rangu rokupanga, ngokuti ndakanyora kwomuri ngemazwi mashomani.

²³ Ndinoda kuti muzie kuti hama yedu Thimothi wakasunhurwa kubva mutirongo; kuti iye akakasira kuuya, ndinozouya pamwepo naye apo ndouya koomuona.

²⁴ Tambisai veshe vatungamiriri venyu nevakacheneswa veshe. Avo vakabva Itaria vanomutambisa.

²⁵ Nyasha ngadzigare nemwi mweshe.