Vahebheru 11 - Bhaibheri Rakachena muChindau

Biningidzo roKugonda

¹ Zvino kugonda kutenda gwinyiso reizvo zvinogarirwa, gwinyiso rezviro zvisikaoneki.

² Ngegwinyiso ngokugonda madzibaba makuru edu vakapupurirwa zvakanaka.

³ Ngokugonda tinozwisisa kuti nyika dzakaitwa ngeizwi raMwari, ndizvo izvo zvinooneka zvakaitwa ngezviro zvisikaoneki.

Chionero chaAbhera, Enokhi naNoa

⁴ Ngokugonda Abhera wakapa Mwari mudiro wakanasa kunaka kupinda waKheni. Kubudikidza ndiwo kwakapupurirwa kwaari kuti waiya akarurama, Mwari pachake echipupura ngendaa yezvipo zvake; wakafa, asi kubudikidza ngegonda rake uchandoereketa.

⁵ Ngokugonda Enokhi wakatorwa kuti asaona rufu; “Naye aazi kuoneka, ngokuti Mwari waiya amutora.” Ngokuti zvakapupurwa ndiye asati atorwa kuti, “Wakanasa kudakadza Mwari.”

⁶ Asi pasina kugonda azvingaitiki kumudakadza, ngokuti kunyazwi ndiani uwo unouya kunaMwari, unosisira kuti atende kuti uriyo, naye unopa muthuso avo vanomutsvaka.

⁷ Ngokugonda Noa, echipangwa ndiMwari ngendaa yezvaizoitika zvaiya zvisati zvaoneka, echimutya Mwari, wakanasira ngarava kuti vaponeswe vemhatso yake; ngokudaro wakaitira ndaa nyika, wakaita unogara nhaka yokururama kubudikidza ngokugonda.

Kugonda kwaAbrahama

⁸ Ngokugonda Abrahama wakapurutana apo adaidzwa, kuti abude kuenda kundau yaaizoashira kuita nhaka; naye wakabuda kuenda, asikazii paaienda.

⁹ Ngokugonda wakaita munhu mupara munyika yaakagondiswa, kudai ngouri munyika isiri yake, echigara mumatende, kudai ngezvakaita Isaka naJakobe, avo vaiya vagari venhaka naye yechigondiso chimwe.

¹⁰ Ngokuti wairingirira dhorobha rine madzeyo, Mwari ndiye ngwazi nomuaki waro.

¹¹ Ngokugonda Sara emene kunyazwi waiya ngomwa wakaashira simba rokuita mimba apo aamusharuka, ngokuti wakamuerenga kuita wakagondeka uwo wakagondisa.

¹² Ndizvo kubva kuno munhu umwe, naye wakaita kudai ngowakafa, yakabarwa mibarirwana yakawanda kudai ngouwandu hwenyeredzi dzomudenga nokuwanda kudai ngouwandu hwejecha riri pahumbikumbi yoruandhle risikaerengeki.

¹³ Veshe ava vakafa mukugonda vasikazi kuashira zvigondiso, asi vakazviona, vakazvichingamidza zviri kuretu. Vakatenda kuti vaiya vanhu vapara nevahambi munyika,

¹⁴ ngokuti vanhu avo vanoronza zvakadaro vanoonisa pamhene kuti vanotsvaka nyika yavo.

¹⁵ Ngegwinyiso dai vaikarakadza ngenyika yevakabuda kubva kweiri, vaizoano mukuwo wokuhwirirayo.

¹⁶ Asi zvino vanodisisa nyika yakapinda kunaka, kuronza kuti, yomudenga. Ndizvo Mwari aatsveruki kudaidzwa kuti Mwari wavo. Ngokuti wakavanasirira dhorobha.

¹⁷ Ngokugonda Abrahama, apo echiedzwa, wakapira Isaka kuita mudiro. Eya, uwo wakaashira zvigondiso, wakanasirira akapira mukororo wake wakabarwa ari ega,

¹⁸ ndiyezve wakaronzwa kuti, “Kubudikidza ndiIsaka mibarirwana yako inozodudzwa ngezina rako,”

¹⁹ echierenga kuti Mwari unesimba rokumumusa, eya kubva kwevakafa, apapozve wakamuashira mumuedzaniso.

²⁰ Ngokugonda Isaka wakafumisa Jakobe naIsau ngezviro zvaizoitika panguva ichauya.

²¹ Ngokugonda Jakobe, pakufa kwake, wakafumisa umwe ngaumwe wevakororo vaJosefa, “Pakudira akatseama padera pendonga yake.”

²² Ngokugonda Josefa, pamagumisiro okupona kwake, wakaronza ngendaa yokubuda kwevana vaIsuraeri, wakapanga ngendaa yemagodo ake.

Kugonda kwaMosi

²³ Ngokugonda Mosi wakafishwa ngevabari vake mwedzi mitatu pakubarwa kwake, ngokuti vakaona kuti mwana waiya akanaka; navo avazi kutya mupango wamambo.

²⁴ Ngokugonda Mosi, apo akura, wakaramba kuzwi mukororo womwanasikana waFaro.

²⁵ Wakatsanangura kuitirwa zvakashata pamwepo nevanhu vaMwari kuno kudakara kamukuwo muzvidakadziso zvokushaisha,

²⁶ echierenga kuti kutsverudzwa ngendaa yaKristu kuri upfumi hwakakura kupinda upfumi hweEgipite, ngokuti wairingirira mberi kumusharo.

²⁷ Ngokugonda wakabuda kubva muEgipite, asikatyi ushungu hwamambo; ngokuti wakashingirira kudai ngowaimuona uwo usikaoneki.

²⁸ Ngokugonda wakangwarira Phasika nokufafazwa kwengazi, kuti muurayi asazogwama matangwe aIsuraeri.

Kugonda kweNgwazi dzimweni dzaIsuraeri

²⁹ Ngokugonda vanhu vakaambuka Ruandhle Rwakatsvuka kudai ngevanoambuka panyika yakaoma, asi apo vaEgipite vechiedzererawo kuambuka vakanzvaidzwa.

³⁰ Ngokugonda marukumbati eJerikho akawa pashi, sure kwokutendererwa mazuva manomwe.

³¹ Ngokugonda Rahabhi chifebi aazi kufa pamwepo naavo vaiya vasikapurutani, ngokuti waiya aashira vadongoreri ngokunyarara.

³² Chiinyi chimweni chendingaronza? Ngokuti mukuwo unozondiperera kudai ndechironza ndiGidheoni, Bharaki, Samusoni, Jefetha, Dhavhidha, Samueri nevaprofeti,

³³ avo kubudikidza ngokugonda vakanyisa umambo, vakashanda zvakarurama, vakahanira zvigondiso, vakakonya miromo yemhondoro,

³⁴ vakadzima mirazvu yomuriro waibaka, vakapokonyoka kubva kushoti dzaipinza, pakurembaremba vakagwinyiswa, vakaita vanesimba guru mukurwa, vakadzinga hondo dzemadzinza.

³⁵ Vakadzi vakapuwa vakafa vavo vamuswa. Vamweni vakarwadziswa, vechiramba kuashira kununurirwa, kuti vahanire kumuka kwakapinda kunaka.

³⁶ Vamweni vakaedzwa ngokuitirwe jee nokushwapurwa, kunyazwi vakasungwa ngemaketani nokukonyerwa mutirongo.

³⁷ Vakapondwa ngemapuwe, vakaadzwa ngepakati ngesaho, vakaurawa ngeshoti. Vakahamba vakasimira matoo emakwai neembudzi, vechitama, vechitambudzwa, vechiitirwa zvakashata;

³⁸ (avo nyika aizi kuvasisira,) vechipepesheka mumashango nomumitunhu, mumapako nomumabani enyika.

³⁹ Naava veshe kunyazwi vakapupurirwa ngokugonda kwavo, avazi kuashira icho chakagondiswa.

⁴⁰ Mwari waiya akatinasirira chiro chimweni chakapinda kunaka, kuti ngokubanze kwedu ivo vasazoita vakaperera.