Vahebheru 10 - Bhaibheri Rakachena muChindau

Kudzipira kwaKristu Kamwe Mhera nariini

¹ Ngokuti Mupango zveune mumvuri wega wezviro zvakanaka zvichauya, haiwa muemo wemene wezviro izvo zvegwinyiso, aungatongoiti kuti vaperere avo vanokwedzera pasinde ngemidiro imweyo inogara yechipirwa gore ngegore.

² Kudai zvaiya zvakadaro aisaizorekerwa kupirwa here, ngokuti kudai vadiri, apo vaiya vacheneswa kamwe mhera nariini, avasaichazoa nemhumba yokushaisha?

³ Asi mumidiro iyi uripo mukarakadzisi wezvishaishi gore ngegore.

⁴ Ngokuti azvingaitiki kuti ngazi yemikono neyembudzi iduse zvishaishi.

⁵ Ndizvo apo Kristu auya munyika wakati, “Mibairo nezvipo iwewe auzi kuzvida, asi wakandinasirira muiri;

⁶ Midiro yokupisha nemidiro yokushaisha amuzi kuidakarira.

⁷ Zvino ndakati, ‘Wona, ndauya kuti ndiite kuda kwako, A Mwari’ (mutsamba yakapetwa kwakanyorwa kudaro ndini.”)

⁸ Zvaakaronza pakutanga kuti, “Mibairo nezvipo nembeu dzeshe dzemidiro nemibairo yezvishaishi auzi kuzvida, zve, auzi kudakara ndizvo (izvo zvinopirwa kudai ngezvinodiwa ngoMupango.”)

⁹ Zvino wakati, “Wona, ndauya kuti ndiite kuda kwako.” Unodusa chokutanga kuti agwinyise chechipiri.

¹⁰ Ngokuda ukwo takacheneswa kubudikidza ngokupirwa kwomuiri waJesu Kristu kamwe kega.

¹¹ Nomupristi weshe ngegwinyiso unoema zuva ngezuva pamushando wake, echipira kazhinji midiro inotodzana, isikatongokoni kudusa zvishaishi.

¹² Asi apo Kristu aiya apira mudiro umwe wemhera nariini ngendaa yezvishaishi, wakagara pashi ngokumudyo kwaMwari,

¹³ kubvira ngouwo mukuwo echigara metsa magaa ake aitwa chitambarariro chetsoka dzake.

¹⁴ Ngokuti ngokupira mudiro umwe iye wakavaita vakaperera mhera nariini avo vakacheneswa.

¹⁵ NoMweya Wakachena unoitawo chapupu kwetiri, ngokuti ngesure iye wakati,

¹⁶ “Ichi ndicho chitenderano chendinozoita navo ngesure kwemazuva awo, unoronza Mambo Mwari; ndinozoisa Mipango yangu mumwoyo yavo, ndinozoinyora mumipinimidzo yavo,

¹⁷ nezvishaishi zvavo nezvinyangadzo zvavo andichazozvikarakadzizve.”

¹⁸ Zvino apo pane kurekererwa kweizvi, apachina kupirwa kwomudiro umweni ngendaa yokushaisha.

Ngatikwedzere pasinde naMwari

¹⁹ Ndizvo hama, apo tinokutsunga kwokupotera kundau yakachena ngengazi yaJesu,

²⁰ ngenjira itsva inopona yaakatibeurira, kubudikidza ngejira rechisitiro, ndikwo kuti kubudikidza ngenyama yake,

²¹ zvino zvetinaye mupristi mukuru padera pemhatso yaMwari,

²² ngatikwedzere tine mwoyo wegwinyiso mukugonda kwakazara, tine mwoyo yedu yakafafazwa kucheneswa kubva kumhumba yakashata nemiiri yedu yakashambwa ngemvura yakaera.

²³ Ngatibatisise kutenda kwegonda redu tisikazungunyiswi, ngokuti unogondeka uwo wakagondisa.

²⁴ Zve, ngatikarakadzane kumusirana rudo nokuita mishando yakanaka,

²⁵ tisikarekeredzi kuungana pamwepo kudai ngomuitiro wevamweni, asi techigwinyisana umwe kuno umweni, kakurutu apo munotoona kuti Zuva rinokwedzera.

²⁶ Ngokuti kudai techizoshaisha maune ngesure kwokuashira kuzwisisa gwinyiso, akuchina mubairo unopirwa ngendaa yezvishaishi,

²⁷ asi kwasara kugarira mukutya kutongwa, nomuriro uno ushungu unozopedza magaa.

²⁸ Munhu uwo wakagura Mipango yaMosi unofa asikaitirwi nyasha ngeizwi rezvapupu zviiri nokuti zvitatu.

²⁹ Kuororwa kwakapindisisa kushata kwakaitawani kukura kunozoitwa kuneuwo wakatsikatsika pashi petsoka Mukororo waMwari, akaerenga ngazi yechitenderano, yaakacheneswa ndiyo, kuti chiro chisina shwiro, akaita ngokushoora Mweya wenyasha?

³⁰ Ngokuti tinomuzia uwo wakaronza kuti, “Kuunzidzira ngokwangu, inini ndinozounzidzira.” Zve, “Mambo unozotonga vanhu vake.”

³¹ Ichi chiro chinotyisa kuwira munyara dzaMwari unopona.

³² Asi karakadzai ngemazuva okutanga, apo ngesure kwokujekiswa kwenyu, mwakashingirira kurwisana kakurutu ngokutambudzika.

³³ Pamweni mwakaemeswa pamhene kuti mutsverudzwe nokutambudzwa, pamwenizve mwakakoanisirana naavo vakaitirwa zvakadaro.

³⁴ Ngokuti mwakazwira urombo avo vaiya mutirongo, mwakadakara mukushaishirwa kwenhumbi dzenyu, mwechizia kuti imwimwi mwemene mune nhaka yakapinda kunaka neinopinda kugara.

³⁵ Ndizvo musarasha kushinga kwenyu, ukwo kuno musharo mukurutu.

³⁶ Ngokuti munosisira kusengerera, kuti apo mwaita kuda kwaMwari, mungaashira icho chakagondiswa.

³⁷ Ngokuti, “Mumukuwo mudoko, uwo unouya unozouya, aazononoki;

³⁸ asi wakarurama wangu unozorarama ngokugonda. Mwoyo wangu auzodakari ngouwo unopetuka sure.”

³⁹ Asi isusu atisiri pakati pavo avo vanopetuka sure kuenda mukurashwa, asi tiri pakati peavo vanogonda vanoponeswa mweya.