Vagaratiya 6 - Bhaibheri Rakachena muChindau

Twariranai Mitwaro

¹ Hama, kuti munhu abatwa ngechishaishi, imwimwi voMweya muunziridzirenyi wakadaro ngomweya wokupfaa, wechidzingwarira iwewe pachako newewo usazoedzwa.

² Twariranai mitwaro, ngokuita kudaro muzadzise mupango waKristu.

³ Ngokuti dai munhu echidzipinimidzira kuti urinane kupinda vamweni, apo asikavapindi, iye unodzichengedzera pachake.

⁴ Asi munhu weshe ngaaedze mushando wake wemene; naapo unozodzionera kuti ungaganza ngenyi pachake, haiwa ngomushando womuakirwana wake.

⁵ Ngokuti munhu weshe unozodzitwarira mutwaro wake.

⁶ Asi uwo unodzidziswa izwi ngaakoanisirane zviro zveshe zvakanaka nomudzidzisi wake.

⁷ Musachengedzerwa; Mwari aaitirwi jee, ngokuti munhu unovhuna kunyazwi ngechiri chaanokusha.

⁸ Ngokuti uwo unodzikushira nyama yake, unozovhuna kuora kubva kunyama; asi uwo unodzikushira Mweya, unozovhuna kubva kuMweya kupona kusikaperi.

⁹ Tisaremba kuita zvakanaka, ngokuti ngenguva kwayo tinozovhuna, kudai tisikademeri.

¹⁰ Ndizvo zvino kudai ngezvetinayo nguva, ngatishande zvakanaka kunevanhu veshe, kakurutu kuneavo vari vemhuri yokutenda.

Kunyowedza kwoKupedzisira noKuvhaisa

¹¹ Munoona kukura kwetsamba yendakanyora kwomuri ngenyara yangu yemene!

¹² Ndivo avo vanoda kuoneka vari vakanaka munyama, vanomuangiridza kuti muchekwe; kwega kuti vasazotambudzwa ngendaa yomuchinjiko waKristu.

¹³ Ngokuti kunyazwi naavo vemene vakachekwa, avangwariri Mupango, asi vanechidisiso chokuti muchekwe kuti vaganze ngenyama yenyu.

¹⁴ Asi kusaitika kuti inini ndiganze ngechiro chimweni asi ngomuchinjiko waMambo wedu Jesu Kristu, kubudikidza ndiwo nyika yakakohomerwa kwendiri, neni ndakakohomerwa kunenyika.

¹⁵ Ngokuti kuchekwa nokuti kusikachekwa akuna shwiro, asi kuita chisikwa chitsva kuri zviro zveshe.

¹⁶ Kunyarara nenyasha ngazvigare padera pavo veshe vanohamba ngouyu murao nepadera pavaIsuraeri vaMwari.

¹⁷ Kubvira zvino kusaapo munhu unonditambudza; ngokuti ndinotwara pamuiri wangu magotsa aJesu.

¹⁸ Nyasha dzaMambo wedu Jesu Kristu ngadzigare nomweya yenyu, hama. Ameni.