Vagaratiya 4 - Bhaibheri Rakachena muChindau

¹ Inini ndinoronza izvi kuti mudyi wenhaka mukuwo weshe waachiri ndumure, aana chaanopinda ndicho muranda, kunyazwi ndiye mambo wazvo zveshe;

² asi uri pashi pevarindi nevangwariri metsa igume nguva yakaemeswa ndibaba.

³ Ndizvo nesuwo, apo tichiri ndumure, taiya hloko dzomweya yaitonga mundau dzomudenga.

⁴ Asi apo nguva yakwana, Mwari wakatumira Mukororo wake wakabarwa ngomudzimai, wakabarirwa pashi peMupango,

⁵ kuti aripire avo vaiya pashi peMupango, kuti tiashire urerwa hwokuita vana.

⁶ Ngokuti muri vana, Mwari wakatumira Mweya woMukororo wake mukati mwemwoyo yedu, wechidaidzira wechiti, “Abha, Baba!”

⁷ Ndizvo iwewe auchaiti muranda, asi mwana; kudai uri mwana, unogarawo nhaka kubudikidza ndiMwari.

Phauri Unotambudzikira VaGaratia

⁸ Karetu musati mwazia Mwari, mwaiya hloko dzezviro zvechibarirwe zvaiya zvisiri zvimwari.

⁹ Asi zvino mwamuzia Mwari, kakurutu kuziikanwa ndiMwari, munoita mapetukirenyi sure kuneiyo mweya yokuamba isina simba neyoubemha, yomunoda kusungwazve ndiyo?

¹⁰ Munongwarira mazuva, mwedzi, nguva nemakore.

¹¹ Ndinomutyira, kuti mushando wangu pakati penyu ungaita usina shwiro.

¹² Ndinomupota, hama, itai vakadai ndini, ngokuti inini ndakadai ndimwi, amuzi kundishaishira.

¹³ Zvino munozia kuti indaa yokurwadziwa kwomuiri kwakaita kuti ndichumaire vhangeri kwomuri pakutanga;

¹⁴ kunyazwi kurwara kwangu kwaiya chiedzo kwomuri, amuzi kundinyenya nokuti kundiramba; asi mwakandiashira kudai ngevanoashira ngirosi yaMwari, kudai ngevanoashira Kristu Jesu.

¹⁵ Kuripari kudakadzwa kwenyu kwemwakazwa? Ngokuti ndinomuitira chapupu imwimwi kuti kudai zvaibvira, mwaizodai mwakabvita madziso enyu mukaapa kwendiri.

¹⁶ Ndizvo ndaita gaa renyu here ngokumuronzera gwinyiso?

¹⁷ Vanotsamwirira kumutsvaka asi haiwa ngenjira yakanaka; vanoda kumukonyera kubanze, kuti imwimwi muvatsamwirire.

¹⁸ Asi zvakanaka kutsamwirirwa ngenjira yakanaka ngenguva dzeshe, haiwa kwega apo ndinemwi.

¹⁹ Vana vangu vadoko, vendinotambudzikira metsa Kristu abarwe mukati mwenyu,

²⁰ ndaida kuti dai ndaiyapo nemwi zvino, kuti nditsandure izwi rangu; ngokuti ndinokangaidzwa ndimwi.

Muedzaniso waHaga naSara

²¹ Ndironzerenyi, imwimwi munoda kutongwa ngeMupango, amupurutani Mupango here?

²² Ngokuti kwakanyorwa kuti, “Abrahama waiya nevakororo vairi, umwe wakabarwa ngomurandakadzi, noumweni wakabarwa ngomukadzi wakasunhurika.”

²³ Asi mukororo womurandakadzi wakabarwa ngokuda kwenyama; asi mukororo womukadzi wakasunhurika wakabarwa kubudikidza ngechigondiso.

²⁴ Izvi zvinechidzidzo chomuedzaniso; ngokuti vakadzi vairi ava muedzaniso wezvitenderano zviiri. Umwe wevakadzi ndiHaga unobva kumutunhu weSinai, unobara vana vouranda.

²⁵ Zvino Haga idunhu reSinai muArabhia, unoedzaniswa neJerusarema rindoripo, ngokuti uri muusungwa pamwepo nevana vake.

²⁶ Asi mukadzi umweni unoedzaniswa neJerusarema iro romudenga rakasunhurika, ndivo mai edu.

²⁷ Ngokuti kwakanyorwa kuti, “Dakara, iwewe ngomwa usikabari. Pururidza, udaidzire, iwewe usikazi kurwadziwa ngokubara; ngokuti vanopinda kuwanda vana vomukadzi wakasiiwa kunouwo unemwamuna.”

²⁸ Zvino imwimwi, hama, muri vana vechigondiso kudai ndiIsaka.

²⁹ Asi kudai ngezvakaitika ngouwo mukuwo, iye wakabarwa ngokuda kwenyama wakatambudza uwo wakabarwa ngokuda kwoMweya, zvakandodaro nazvino.

³⁰ Asi chinyorwa chinotinyi? Chinoti, “Dzinga uwo murandakadzi nomukororo wake, ngokuti mukororo womurandakadzi aazogari nhaka pamwepo nomukororo womukadzi wakasunhurika.”

³¹ Ndizvo hama, isusu atiri vanapi vouwo murandakadzi, asi tiri vouwo wakasunhurika.