Vagaratiya 3 - Bhaibheri Rakachena muChindau

Mupango nokuti Kugonda

¹ Imwimwi vaGaratia mapenzi! Ndiani wakamurowa? Imwimwi pamberi pemadziso enyu Jesu Kristu wakaoniswa pamhene akakohomerwa pamuchinjiko!

² Chiro chega chendinoda kuzwa kubva kwomuri ngeichi: Mwakaashira Mweya ngemishando yeMupango here nokuti ngokugonda zvemwakazwa?

³ Muri mapenzi akadai here? Mwakatoamba ndiMweya, zvino mwogumisira ngenyama here?

⁴ Mwakatambudzikira zviro zvakawanda kudaro pasina shwiro here? Kudai zvakadaro ngegwinyiso pari pasina shwiro.

⁵ Ndizvo uwo unomupa Mweya, echishanda mishamiso pakati penyu, unozviita ngemishando yeMupango here nokuti ngokuzwa mwakagonda?

⁶ Kudai ndiAbrahama “Wakagonda Mwari, nakwo kwakaerengerwa kwaari kuti ndikwo kururama.”

⁷ Ndizvo munoona kuti avo vanogonda ndivo vakororo vaAbrahama.

⁸ Nezvinyorwa zvechiona ngepamberi kuti Mwari waizopembedza vemadzinza ngokugonda, zvakachumaira vhangeri karetu kunaAbrahama zvechiti, “Mweuri madzinza eshe anozofumiswa.”

⁹ Ndizvo zvino avo vokugonda vanofumiswa pamwepo naAbrahama uwo waiya nokugonda.

¹⁰ Ngokuti veshe avo vanogonda mishando yeMupango vari pashi pechituko, ngokuti kwakanyorwa kuti, “Wakatukwa weshe usikangwariri zveshe zvakanyorwa mubhuku reMupango kuti azviite.”

¹¹ Zvino zviri pamhene kuti apana munhu unopembedzwa ngeMupango pamberi paMwari; ngokuti, “Uwo wakarurama unozopona ngokugonda.”

¹² Asi Mupango autseyami pakugonda, ngenjira imweni, “Kunyazwi ndiani unoita mishando yeMupango unozopona ndiyo.”

¹³ Kristu wakatiripira kubva pachituko cheMupango, iye aitwa wakatukwa ngendaa yedu; ngokuti kwakanyorwa kuti, “Wakatukwa weshe unoturikwa pamuti,”

¹⁴ kuti munaKristu Jesu chifumiso chaAbrahama chiuye padera pevemadzinza, kuti tiashire chigondiso choMweya kubudikidza ngokugonda.

Mupango neChigondiso

¹⁵ Hama, ngomuedzaniso wendaramo yemazuva eshe, akuna munhu ungaita chitenderano chevanhu kuti chiite chisina shwiro kunyazwi kututsira kwechiri apo chatotsimiswa.

¹⁶ Zvino zvigondiso zvakaitwa kunaAbrahama nokunemubarirwana wake; azvironzi kuti, “Nokumibarirwana,” kuronza yakawanda, asi chinoti, “Nokumubarirwana wako,” ndikwo kuti, kumunhu umwe, uri Kristu.

¹⁷ Chendinoronza ngeichi; Mupango wakauya mazana marongomuna nemakumi matatu emakore karetu achingaiti kuti chiite chisina shwiro chitenderano chaiya chakaemeswa ndiMwari karetu, kuti chigondiso chaMwari chikorere.

¹⁸ Ngokuti kudai nhaka yechipuwa ngokungwarira Mupango, aichabvi muchigondisopi; asi Mwari wakaipa kunaAbrahama kubudikidza ngechigondiso.

¹⁹ Mupango ngewenyi? Uwo wakatutsirwa ngendaa yezvipaukwa, metsa mubarirwana uapo, uwo wakaitirwa chigondiso; nacho chakaemeswa kubudikidza ngengirosi ngomuiyanisi.

²⁰ Zvino muiyanisi azvironzi rupande rumwe akadi; asi Mwari ndiumwe.

Biningidzo roMupango

²¹ Ndizvo Mupango unorwisana here nezvigondiso zvaMwari? Haiwa! Ngokuti kudai ngezvewakapuwa Mupango unesimba rokukona kuita ruponeso ngegwinyiso kururama kwaizouya kubudikidza ngeMupango.

²² Asi zvinyorwa zvakakonyera zveshe pashi pesimba rokushaisha, kuti icho chakagondiswa kubudikidza ngokugonda munaJesu Kristu chipuwe kwavari avo vanotenda.

²³ Asi kugonda kusati kwaguma, taiya takakonyerwa pashi peMupango, metsa kutenda kwaoniswa.

²⁴ Ndizvo Mupango wakaita mudzidzisi wedu metsa Kristu auya, kuti tipembedzwe kubudikidza ngokugonda.

²⁵ Asi zvino apo kugonda kwaguma, atichiri pashi pomudzidzisiwo,

²⁶ ngokuti munaKristu Jesu imwimwi mweshe muri vakororo vaMwari kubudikidza ngokugonda.

²⁷ Ngokuti avo veshe pakati penyu vakabhabhatidzwa munaKristu, mwakamupfeka Kristu.

²⁸ Apachina muJudha nokuti muGiriki, apachina wakasungwa nokuti wakasunhurika, apachina mwamuna nokuti mukadzi, ngokuti imwimwi mweshe muri umwe munaKristu Jesu.

²⁹ Zvino kudai muri vaKristu, muri mibarirwana yaAbrahama, muri vadyi venhaka kudai ngechigondiso.