Vagaratiya 2 - Bhaibheri Rakachena muChindau

Phauri neVapostori Vamweni

¹ Zvino kwapera makore gumi namarongomuna ndakakwirazve Jerusarema, pamwepo naBhanabhasi, ndikatorazve Thithusi.

² Neni ndakakwirayo ngokuti ndakaoniswa chioniso. Ndakaisa pamberi pavo vhangeri rendinochumaira pakati pemadzinza, (asi ndakariisa kunevakuru vari vega ngokufishika,) kuitira kuti ndaizotera kurumba nokuti ndaiya ndakambotera kurumba pasina shwiro.

³ Asi kunyazwi naThithusi uwo waiya neni, aazi kuangiridzwa kuti achekwe kunyazwi waiya muGiriki.

⁴ Asi ndakaita kudaro ngendaa yevatendi vokunyepa avo vakapotedzwamwo tisikazii, vechipoteramwo ngokufishika kuti vanengere kusunhurika kwedu kwetinakwo munaKristu Jesu, kuti vatipotedze muuhloko.

⁵ Atizi kudzipfaisa kwavari, kunyazwi nepadoko, kuitira kuti gwinyiso revhangeri rigare nemwi.

⁶ Asi kubva kunaavo vaiya nembiri yokuti vari vakuru (kunyazwi vari vakadini, azvina ndaa kwendiri; Mwari aatsananguri unhu hwomunhu); avo ndinoti, vaiya vanembirikira avazi kututsira chiro kwendiri.

⁷ Asi ngenjira imweni, apo vaona kuti inini ndakapuwa vhangeri kune vasikazi kuchekwa, kudai ngezvakapuwawo Petro vhangeri kunevakachekwa;

⁸ (ngokuti uwo wakashanda kubudikidza ndiPetro kumuita mupostori kune vakachekwa, wakashandawo kubudikidza ndini ngokunditumira kune vemadzinza),

⁹ naapo Jakobe, Khefasi naJohani, avo vaizwi ndivo madzeyo vakazia nyasha idzo dzakapuwa kwendiri, vakatibata inini naBhanabhasi ngenyara dzokumudyo ngoukama, kuti isusu tiende kunevemadzinza, navo vaende kunevakachekwa.

¹⁰ Chiro chimwe chega chevakatironzera kuti tikarakadze ngevarombo; icho chaiya acho chendaidisisa kuita inini.

Phauri Unophikisa Petro muAntiokhi

¹¹ Asi apo Khefasi aguma Antiokhi, ndakamuphikisa pamberi pehope yake, ngokuti waiya anendaa pachake,

¹² ngokuti vasati vaguma vanhu vamweni vechibva kunaJakobe, iye waidya pamwepo nevemadzinza. Asi apo vaguma, wakanyongoroka akadzipaura, akagara ega pachake, ngokuti waitya chikwata chevakachekwa.

¹³ Nevamweni vaJudha vakadziitisawo kudai ndiye; kunyazwi naBhanabhasi wakapaukiswawo ngokudziitisa kwavo.

¹⁴ Asi apo ndaona kuti avazi kuhamba ngokururamisa, kudai ngegwinyiso revhangeri, ndakati kunaKhefasi pamberi pavo veshe, “Kudai iwewe kunyazwi uri muJudha, asi unogara kudai ngevari vemadzinza, haiwa kudai ngezvevanoita vaJudha, unovaangiridza ngenjiranyi vemadzinza kuti vagare kudai ngevaJudha.”

VaJudha neVemadzinza Vanoponeswa ngoKugonda

¹⁵ Isusu pachedu tiri vaJudha ngechibarirwe, haiwa vemadzinza vashaishi.

¹⁶ Asi techizia kuti munhu aapembedzwi ngemishando yeMupango, asi kubudikidza ngokugonda munaKristu Jesu, isusu nesu takatenda muna Kristu Jesu, kuti tipembedzwe ngokugonda munaKristu, haiwa ngokuita mishando yeMupango, ngokuti akuna naumwe ungazopembedzwa ngemishando yeMupango.

¹⁷ Asi kudai, taitsvaka kupembedzwa munaKristu, isusuwo temene takaoneka tiri vashaishi, ndizvo Kristu waamushandi wokushaisha here? Haiwa!

¹⁸ Asi kudai ndechizoakazve izvo zvendakaparadza, ndinodzionisa kuti ndiri mupauki.

¹⁹ Ngokuti inini kubudikidza ngeMupango ndakafa kuneMupango, kuti ndipone kunaMwari.

²⁰ Ndakakohomerwa pamwepo naKristu; asi andinipi ndichapona, asi ndiKristu unopona mukati mwangu. Nendaramo yendinopona zvino munyama, ndinopona ngokugonda kuri kunoMukororo waMwari, uwo wakandida, akadzipira ngendaa yangu.

²¹ Andirerusi nyasha dzaMwari; ngokuti kudai kupembedzwa kwechizounzwa ngeMupango, ngokudaro Kristu wakatera kufa pasina shwiro.