Vagaratiya 1 - Bhaibheri Rakachena muChindau

Kuchingamidza

¹ Phauri mupostori, (andizi kutumwa ndechibva kuvanhu nokuti kubva kumasimba evanhu, asi kubudikidza ndiJesu Kristu naMwari Baba, uwo wakamumusa kubva kwavakafa;)

² nehama dzeshe dzineni. Kuzviara zveGaratia.

³ Nyasha kwomuri nokunyarara zvinobva kunaMwari Baba edu nokuna Mambo Jesu Kristu,

⁴ uwo wakadzipira pachake ngendaa yezvishaishi zvedu, kuti atinunure kubva munguva ino yakashata, kudai ngokuda kwaMwari wedu naBaba,

⁵ kwaari ngaugare uthende mhera nariini nariini. Ameni.

Akuna Vhangeri Rimweni

⁶ Ndinoshamiswa kuti mwakasira kutiza kubva kwaari uwo wakamudaidza ngenyasha dzaKristu nokuenda kunerimweni vhangeri;

⁷ haiwa kuti ririyo vhangeri rimweni, asi kuti variyo vamweni vanomunzeremusa, vanoda kupausa vhangeri raKristu.

⁸ Asi kunyazwi tisu, nokuti ngirosi inobva mudenga, ikachumaira kwomuri vhangeri rakaparadzana neiro retakachumaira kwomuri, ngaitukwe!

⁹ Kudai ngezvetakaronza karetu, ndinoronzazve kudaro zvino kuti, kudai aripo munhu unochumaira kwomuri vhangeri rakaparadzana neiro remwakaashira, ngaatukwe!

¹⁰ Ngokuti inini zvino ndinotsvaka kudiwa ngevanhu here, nokuti kudiwa ndiMwari? Nokuti ndinoedza kudakadza vanhu here? Kudai ndaiya ndichadakadza vanhu, ngokudaro andingaiti muranda waKristu.

Kuitwa kwaPhauri Mupostori

¹¹ Ngokuti inini ndinoda kuti muzie, hama, kuti vhangeri rakachumairwa ndini, raiya risiri revanhu;

¹² ngokuti andizi kuriashira kubva kumunhu, nokuti kuridzidziswa, asi rakauya kwendiri kubudikidza ngokuoniswa ndiJesu Kristu.

¹³ Ngokuti mwakazwa ngegwinyiso ngendaramo yangu yenguva yakapinda, mukudira kwevaJudha. Inini ndakatambudza chiara chaMwari ngenjira inopinda binzo yaamho, ndaiedza kuchiparadza.

¹⁴ Neni ndakapinda vanhu vazhinji vendanga yangu mukudira kwevaJudha, pakati pevanhu vedzinza rangu, ndechivapinda kakurutu mukungwarira mishuma yemadzibaba angu.

¹⁵ Asi apo Mwari, uwo wakanditsanangura akandiemesa ndisati ndabarwa, akandidaidza kubudikidza ngenyasha dzake, wakadakadzwa

¹⁶ kuti aonise kwendiri Mukororo wake, kuti ndichumaire ndiye pakati pevemadzinza; paripo andizi kupangana nounenyama nengazi,

¹⁷ nokuti andizi kukwira Jerusarema kuneavo vaiya vapostori kutangira inini, asi paripo ndakaenda Arabhia, ndorondo hwirirazve Dhamasekusi.

¹⁸ Zvino kwapera makore matatu ndakakwira Jerusarema koomusa Khefasi, ndakagara naye mazuva gumi namashanu;

¹⁹ asi andizi kuona vamweni vapostori, ngepabanze paJakobe munun'una waMambo.

²⁰ Muneizvo zvendinonyora kwomuri, pamberi paMwari andinyepi.

²¹ Zvino ndakaenda kunharaunda yeSiria neyeSirisia,

²² ndaiya ndisikaziikanwi ngehope kunezviara zveJudhia zvaiya muna Kristu;

²³ asi vakazwa zvega kuti, “Uwo waititambudza, zvino waakuchumaira ukwo kutenda kwaakamboedza kuparadza.”

²⁴ Navo vakakudza Mwari kubudikidza ndini.