Vafiripi 4 - Bhaibheri Rakachena muChindau

¹ Ndizvo, hama dzangu, avo vendinoda nevendinoshuwira, kudakara kwangu nedzungudza rangu, ngokudaro emai mwakagwinya munaMambo, vanodikanwa vangu.

Kudzidzisa

² Ndinopota Yuodhia, ndinopota Sintikhe, kuti vaano mupinimidzo umwewo munaMambo.

³ Eya ndinokumbirawo, iwewe mungani wangu wegwinyiso, detsera madzimai aya, ngokuti vakashanda pamwepo neni muvhangeri, pamwepo naKrementi nevamweni vangani vangu vendinoshanda navo, avo mazina avo ari mubhuku rokupona.

⁴ Dakarai munaMambo ngenguva dzeshe; zve, ndinozoti, Dakarai.

⁵ Kupfaa kwenyu ngakuziikanwe kuvanhu veshe. Mambo waapasinde.

⁶ Musanyunyutira chiro, asi muzviro zveshe kubudikidza ngomukumbiro nokupota pamwepo nokubonga, mikumbiro yenyu ngaiziikanwe kunaMwari.

⁷ Kunyarara kwaMwari, kunopinda kuzwisisa kweshe, kunozongwarira mwoyo yenyu nemipinimidzo yenyu munaKristu Jesu.

⁸ Pakugumisira, hama, zveshe zviri zvegwinyiso, zveshe zvinoremeredzeka, zveshe zviro zvakarurama, zveshe zviri zvakachena, zveshe zvinodikanwa, zveshe zvine mbiri yakanaka, kudai kuripo kunaka, kudai kuripo kukudzwa, pinimidzai ngeizvi zviro.

⁹ Rambai mwechiita zviro izvo zvemwakadzidza nokuashira nokuzwa nokuona mwendiri; naMwari wokunyarara unozogara nemwi.

Phauri Unobonga Chipo

¹⁰ Inini ndinodakara kakurutu munaMambo kuti zvino pakupedzisira mwakamusirira kupinimidza ndini; ngegwinyiso mwaipinimidza ndini, asi mwakatama mukuwo wokuzvionisa.

¹¹ Haiwa kuti ndinoereketa ngendaa yokutama; ngokuti ndakadzidza kugutiswa kunyazwi ngohuri ugaro hwendinahwo.

¹² Ndinozia kuita murombo nokuita mupfumi. Kuzviro zveshe nepakati pazvo zveshe, ndakadzidza zvakafishika zveshe kugutiswa nokuita nzara, zveshe kupfuma nourombo.

¹³ Ndingaita zveshe ndiye unondigwinyisa.

¹⁴ Asi mwakaita zvakanaka kuti mwakatambudzika neni mukutambudzika kwangu.

¹⁵ Imwimwi vaFiripi ngegwinyiso munozia kuti pakutanga kwevhangeri, apo pendakabva Masedhonia, apana chiara chakatambudzika neni ngendaa yokupa neyokuashira, asi imwimwi mwega.

¹⁶ Ngokuti kunyazwi apo pendaiya muThesaronika, mwakatumira kamwe nokwechipiri kundidetsera mukutama kwangu.

¹⁷ Haiwa kuti ndinotsvaka chipo, asi ndinotsvaka michero yomunozofumiswa ndiyo.

¹⁸ Asi ndaanazvo zviro zveshe, ndafumiswa. Ndagutiswa, ndaashira kubva kunaEphafrodhitusi zvipo zvemwakatumira kubva kwomuri, zviri gwema rakanaka, mudiro unoashirika unodakadza kunaMwari.

¹⁹ Asi Mwari wangu unozomugutisa ndizvo zveshe zvomunotama, kudai ngoupfumi hwake muuthende munaKristu Jesu.

²⁰ Kuna Mwari Baba wedu ngakugare uthende mhera nariini nariini. Ameni.

Kuvhaisa kwoKugumisira

²¹ Tambisai vakacheneswa veshe vari munaKristu Jesu. Hama dzineni dzinomutambisa.

²² Veshe vakacheneswa vanomutambisa, kakurutu avo vemhuri yaSiza.

²³ Nyasha dzaMambo Jesu Kristu ngadzigare nomweya yenyu.