Vafiripi 3 - Bhaibheri Rakachena muChindau

Kururama kweGwinyiso

¹ Pakugumisira, hama dzangu, dakarai munaMambo. Kunyorazve kwomuri zviro izvo azvindinesi inini, asi kwomuri kungwaririka.

² Ngwarai imbwa, ngwarai vashandi vezvakashata, ngwarai ngaavo vanocheka nyama.

³ Ngokuti tisu tiri vakachekwa, avo vanodira Mwari muMweya nokuganza munaKristu Jesu, tisikagondi munyama,

⁴ kunyazwi inini pachangu ndinazvo zvendingagondawo munyama. Kudai aripo munhu unokarakadza kuti ungagonda nyama, inini ndingamupinda:

⁵ ndakachekwa ngezuva rechisere, ndiri worudzi rwevanhu vaIsuraeri, ndiri wedzinza raBhenjamini, ndiri muHebheru wakabarwa ngevaHebheru; paMipango ndiri muFarisi;

⁶ ngendaa yokutsamwirira ndakaita mutambudzi wechiara; ngendaa yokururama kweMipango ndakaita usina ndaa.

⁷ Asi izvo zvaiya upfumi kwendiri, ndakazvierenga kuita zvisina shwiro ngendaa yaKristu.

⁸ Eya ngegwinyiso, ndinoerenga zveshe kuti zviri zvisina shwiro ngendaa yokunaka kukurutu kwokumuzia Kristu Jesu, Mambo wangu. Ngendaa yake ndakatambudzika ngokurashikirwa ngezviro zveshe, neni ndinozvierenga kuti zviri marara, kuitira kuti ndiuyirwe ndiKristu,

⁹ ndioneke mwaari ndisina kururama kuri kwangu, kunobva muMupango, asi ukwo kunouya kubudikidza ngokugonda munaKristu, kururama kunobva kunaMwari ngokugonda.

¹⁰ Inini ndinoda kumuzia Kristu nesimba rokumuka kwake, nokukowana naye mukutambudzika kwake, ndechitodzaniswa naye mukufa kwake,

¹¹ kuti zvanyadini ndihanire mukumuka kubva kwevakafa.

Kurumba Kuenda kuMagumo

¹² Andikwopi kuti ndatohanira ichi nokuti kuita waperera zvino; asi ndinoangirira kuenda mberi kuti chiite changu icho chaakandibatira Kristu Jesu.

¹³ Hama, inini ndemene andidzierengi kuti ndabata kuita changu; asi chiro chimwe chendinoita, ndinoriarwa zviri sure nokunanambira zviri mberi,

¹⁴ ndinogwinyisira kuenda kumagumisiro, koopuwa chipo chokudaidzwa kunobva mudenga kuri munaKristu Jesu.

¹⁵ Ndizvo isusu teshe vakura ngatiwe nomupinimidzo wakadaro; nokudai muno mupinimidzo umweni nokuti ngowechiri chiro, neichozve Mwari unozochionisa kwomuri.

¹⁶ Kwega ngatibatisise kuneizvo zvetakahanira kwezviri.

¹⁷ Hama, itai vanondiedzerera, muringisise avo vanohamba kudai ngechionero chomunacho kwetiri.

¹⁸ Ngokuti vazhinji vanohamba kudai ngemagaa omuchinjiko waKristu; ndakamuronzera ndivo kazhinji, nazvino ndinomuronzera ngokuchema.

¹⁹ Magumo avo kuparadzwa, chimwari chavo indani dzavo, navo vanoganza ngezvinotsverudza zvavo; vanopinimidza ngezvomunyika.

²⁰ Asi nyika yedu iri mudenga, kubveyozve tinogarira kuuya kwoMuponesi, Mambo Jesu Kristu,

²¹ uwo unozotsandudza muiri woupashi hwedu, kuti uite unotodzana nomuiri wouthende hwake, kubudikidza ngesimba iro rinomuitawo kuti akone kupfaisa zveshe pashi pake.