Vafiripi 1 - Bhaibheri Rakachena muChindau

Kuchingamidza

¹ Phauri naThimothi, varanda vaKristu Jesu, ndinonyorera kwavari veshe vakacheneswa munaKristu Jesu avo vari muFiripi, pamwepo nevatungamiriri vakuru vechiara nevadetseri.

² Nyasha ngadzigare kwomuri nokunyarara zvinobva kunaMwari Baba edu naMambo Jesu Kristu.

Phauri Unokumbirira Vafundi veTsamba yake

³ Ndinobonga Mwari wangu mikuwo yeshe yendinokarakadza ndimwi,

⁴ ngenguva dzeshe mukukumbira kwangu kweshe ndimwi mweshe ndinokumbira ngokudakara,

⁵ ngendaa yokubatana pamwepo kwenyu mukuhambisa vhangeri kubvira pazuva rokutanga metsa zvino.

⁶ Ndechigonda ichi, kuti uwo wakatanga mushando wakanaka mukati mwenyu unozouita kuti uperere metsa pazuva raJesu Kristu.

⁷ Kudai ngezvezvakanaka kuti ndiwe nomupinimidzo wakadaro ndimwi mweshe, ngokuti ndinemwi mumwoyo mwangu, ngokuti mukusungwa kwangu nokudzirwira nokugwinyisa vhangeri, imwimwi mweshe munokovana neni munyasha.

⁸ Ngokuti Mwari ndiye chapupu changu, munjira yendinomushuwira mweshe ndiyo kakurutu ngorudo rwaKristu Jesu.

⁹ Uyu ndiwo mukumbiro wangu, kuti rudo rwenyu ruangirire kuwanda nokuwanziswa mukuzia nokuzwisisa kweshe,

¹⁰ kuti muedze muzie zviri zvakapinda kunaka, kuti muite vakacheneswa vasina ndaa metsa pazuva raKristu,

¹¹ mwechizadzwa ngemichero yokururama, iyo iripo kubudikidza ndiye Jesu Kristu, mukukudza nokuirikidza Mwari.

Kuti Ndipone ndiKristu

¹² Asi ndinoda kuti muzie, hama, kuti izvo zvakaitika kwendiri zvakashanda kuhambisa vhangeri,

¹³ ndizvo kusungwa kwangu ngendaa yaKristu kwakaziikanwa kwavari veshe vari mumhatso yamambo nokunevamweni veshe;

¹⁴ hama zhinji dzakaitwa kuti dzigonde munaMambo ngokusungwa kwangu, nadzo dzinopinda kutsunga kuereketa izwi raMwari dzisikatyi.

¹⁵ Ngegwinyiso vamweni vanochumaira Kristu ngegodo nehasha, asi vamweni ngomwoyo unoda.

¹⁶ Vamweni vanoita kudaro ngorudo, vechizia kuti ndakaemeswa kurwira vhangeri;

¹⁷ asi vamweni vanochumaira Kristu ngehasha, vasikaiti ngegwinyiso, vechipinimidza kututsira kutambudzika kwendiri muusungwa hwangu.

¹⁸ Zvinendaa yenyi izvi? Kwega kuti ngenjira dzeshe, kunyazwi ngokudziitisa nokuti ngegwinyiso, Kristu unochumairwa; neni ndinodakara ndizvo. Eya, ndinozoangira kudakara,

¹⁹ ngokuti ndinozia kuti izvi zvinozokunukuka kuita ruponeso rwangu ngokukumbira kwenyu nokudetsera kwoMweya waJesu Kristu.

²⁰ Ndikwo kudisisa nokukarira kwokugonda kwangu, kuti andizotsveruki ngechiro nachimwe, asi kuti ngokuereketa kwangu ngokutsunga, kudai ngenguva dzeshe, kuti nazvino Kristu unozokuriswa mumuiri wangu kunyazwi mukurarama nokuti murufu.

²¹ Ngokuti kwendiri kurarama ndiKristu norufu kuuyirwa.

²² Asi kudai ndechipona munyama, zvinoronza michero yomushando wangu neni; andizii chendichatsanangura.

²³ Asi ndinomanikidzwa pakati peizvi zviiri. Chidisiso changu ngechokuti ndibve ndiende koogara naKristu, ngokuti ndizvo zvakapindisisa kunaka.

²⁴ Asi kugara munyama kunopinda kusisira ngendaa yenyu.

²⁵ Ndechigonda izvi, ndinozia kuti ndinozogara ndechiangirira kugara nemwi mweshe, mukuenda mberi nokudakara mukugonda,

²⁶ kuti kuganza kwenyu kuwanzwe munaKristu Jesu, ndapetukazve kwomuri.

²⁷ Kwega kuti muhambe kudai ngezvinosisira vhangeri raKristu, kuti kunyazwi ndechiuya koomuona nokuti ndisipo, ndingazwa ngendaa yokugara kwenyu, ndinozozia kuti mwakaema mwakagwinya ngomweya umwewo, ngomwoyo umwe mwechirwira kugondwa kwevhangeri,

²⁸ musikatyisidzirwi ngechiro nachimwe ngeavo vanorwisana nemwi. Kwavari izvi zviri chioniso chiri pamhene chokurashwa, asi kwomuri zviri chioniso choruponeso, urwu runobva kunaMwari.

²⁹ Ngokuti kwakatenderwa kwomuri nguva ngenyasha, haiwa yokutenda kwega munaKristu, asi yokutambudzika ngendaa yake,

³⁰ mwechirwawo kurwa kwemwakaona kwendiri nazvino munozwa kuti ngekwangu.