Vaefesu 6 - Bhaibheri Rakachena muChindau

Vana neVabari

¹ Vana, purutanai vabari venyu munaMambo, ngokuti izvi zvakarurama.

² “Remeredza baba ako namai ako,” (uyu uri mupango wokutanga une chigondiso,)

³ “Kuti zvinake kwouri, nokuti upone mukuwo wakareba munyika.”

⁴ Nemwi madzibaba, musatsamwisa vana venyu, asi muvarere mukudzidzisa nomukupanga kwaMambo.

Hloko neMadzimambo

⁵ Hloko, purutanai avo vari madzimambo enyu ngokwenyama, ngokutya nokuhuta, ngomwoyo wakarurama, kudai ngevanoitira Kristu;

⁶ musikashandi ngokuoneka ngemadziso, kudai ngevanodakadza vanhu, asi kudai ngehloko dzaKristu, mwechiita kuda kwaMwari mumwoyo,

⁷ mwechishanda ngokuda kudai ngevanoitira Mambo haiwa kuvanhu,

⁸ mwechizia kuti kunyazwi chiinyi chakanaka chaanoita munhu, unozochipuwa kubva kunaMambo, kunyazwi hloko nokuti wakasunhurika.

⁹ Nemwiwo madzimambo, itai zvakadaro kwavari, murekere kuvatyisidzira, mwechizia kuti Mambo wavo nowenyuwo uri mudenga, kwaari akuna mutsananguro wevanhu.

Chihlangu cheshe chaMwari

¹⁰ Pakugumisira, itai vakagwinya munaMambo nomukugwinya kwesimba rake.

¹¹ Pfekai nhumbi dzeshe dzokurwa ndidzo dzaMwari, kuti mukone kuema kurwisana nemazano akashata aDhiabhorosi.

¹² Ngokuti atidzipani nenyama nengazi, asi tinodzipana noumambo nevane simba nevanotonga nyika yechidima chino nomweya yakashata yomundau dzomudenga.

¹³ Ndizvo torai nhumbi dzeshe dzokurwa ndidzo dzaMwari, kuti mukone kurwisa pazuva rakashata nokuramba mwakaema apo mwapedza zveshe.

¹⁴ Ndizvo emai, mwakasimira gwinyiso muzviunu zvenyu, mwaisa chihlangu chepaditi chokururama,

¹⁵ mwapfeka mutsoka dzenyu kunasirirwa kwevhangeri rokunyarara;

¹⁶ muneizvi zveshe torai chihlangu chokugonda, chomunozokona kudzima ndicho misee yeshe yemirazvu yomuriro youwo wakashata.

¹⁷ Ashirai chiqoko choruponeso neshoti yoMweya, iri izwi raMwari.

¹⁸ Mukumbire nguva dzeshe muMweya, nokukumbira kweshe nokupota. Muneizvi mumipinimidzo ngwarai nokusengerera kweshe nokukumbirira vakacheneswa veshe,

¹⁹ neniwo mundikumbirire, kuti ndipuwe izwi rokuereketa ngokushinga, kuti ndidudzire zvakafishika zvevhangeri,

²⁰ ngendaa yaro inini ndiri muemereri wakasungwa ngemaketani; kuti ndierekete ngokushinga, kudai ngezvinosisira kuti ndierekete.

Kuvhaisa kwoKugumisira

²¹ Zvino kuti muziewo magarire angu nezvendinoita, Thichikusi, munun'una unodikanwa nenhunge inogondeka munaMambo, unozomuronzera zviro zveshe.

²² Ndamutumira kwomuri ngendaa iyi, kuti muzie kugara kwedu nokuti agwinyise mwoyo yenyu.

²³ Kunyarara ngakugare nevakoma, rudo pamwepo nokugonda, zvinobva kunaMwari Baba naMambo Jesu Kristu.

²⁴ Nyasha ngadzigare kwavari veshe vanomuda Mambo wedu Jesu Kristu ngorudo rusikaperi.